30 жылда бир жолу суранышты. Мигранттарды алып келүү маселеси чечилеби?

© Sputnik / Александр Кряжев / Медиабанкка өтүүЖүргүнчүлөр трапка барган автобуска кирип жатышат. Архив
Жүргүнчүлөр трапка барган автобуска кирип жатышат. Архив - Sputnik Кыргызстан
Жазылуу
Мекендештер “чет өлкөнүн авиакомпаниялары чартердик рейс менен жеткирүүгө макулдугун берген, бирок ага кыргыз өкмөтү уруксат бербей жатат” деп кайрылышкан.

БИШКЕК, 14-апр. — Sputnik. Бүгүн Жогорку Кеңештин эки комитетинин биргелешкен жыйынында чет жактагы кыргызстандыктарды алып келүү маселеси каралды.

Эл өкүлдөрүнүн айтымында, учурда Анталья, Стамбул, Анкара, Новосибирск жана Дубай шаарларындагы 4500дөй мигрант мекенине кайтууга аргасыз болууда. Алар “чет өлкөнүн авиакомпаниялары чартердик рейс менен жеткирүүгө макулдугун берген, бирок ага кыргыз өкмөтү уруксат бербей жатыптыр”, — деп кайрылышканын белгилешти.

Депутат Каныбек Иманалиев мигранттар 30 жылдан бери мамлекеттен биринчи жолу суранып жатканын айтты.

“Акчасын төлөп берели, болгону бизге аэропортту ачып, кабыл алыңыздар. Обсервацияда канча күн десеңер ошончо жаталы" деп жатышат. Чет жактагы мекендештер ушунча жылдан бери бизге “Кумтөрдөн” дагы көп акча которуп келген. Ушундай кырдаалда аларды алып келүүгө түздөн-түз милдеттүүбүз. 30 жылдан бери биринчи жолу суранып жатышат бизден. Ушул маселе чечилеби же жокпу, так айтып коюңуздар”, — деп суроо узатты Иманалиев.

Ал эми депутат Исхак Пирматов Дубай менен Новосибирсктен келе албай жаткан кыргызстандыктардын маселесин көтөрдү.

Россиянын чек арасында кезекте турган унаалар. Архив - Sputnik Кыргызстан
ТИМ Россия-казак чек арасындагы 100дөн ашык кыргызстандыктын абалын айтты
“Дубайдагы мигранттар Казакстан бир күндө эки учак жиберип жарандарын алып кетти, биздики канча күндөн бери чечилбей жатат”, — деп кайрылып жатышат. Ал жактагы авиакомпания Кыргызстан уруксат берсе эле чартердик рейс менен жеткирүүгө макул экенин айтыптыр. Новосибирскте болсо жарандарыбыз аэропортто күн өткөрүүдө. Аларга да S7 авиакомпаниясы “кыргыз тарап каттамга уруксат бербей жатат” дептир. Сиздерге эмне тоскоол болуп жатат?”, — деди Пирматов.

Депутаттардын суроолоруна биринчи вице-премьер Кубатбек Боронов да, тышкы иштер министринин орун басары Нурлан Абдрахманов да, транспорт жана жолдор министри Жанат Бейшенов да “учурда сүйлөшүүлөр жүрүп жатат” жооп берди. Бирок алып келүүгө эмне тоскоолдук болуп жатканын так айта алышкан жок. 

Буга канааттанбаган депутаттар шаршембидеги жалпы жыйынга мигранттардын көйгөйү боюнча так маалыматты алып келишин талап кылышты.

Жаңылыктар түрмөгү
0