БИШКЕК, 20-фев. — Sputnik. Кыргызстанда жыл сайын Көчмөндөрдүн республикалык оюндары ар кайсы облустарда өткөрүлө баштайт. Бул тууралуу президент Сооронбай Жээнбеков билдирди.

Мамлекет башчынын маалымат кызматынан кабарлашкандай, президент иш сапарынын алкагында Баткен облусуна караштуу Кадамжай районунун тургундары менен жолугушту.

"Бул мелдештердин маанилүүлүгүн эске алуу менен Көчмөндөрдүн улуттук оюндарын жыл сайын республикалык деңгээлде өткөрүү чечимин кабыл алдык. Быйыл оюндар Талас облусунда өтөт ("Манас ордо" комплекси). Андан кийин эстафета башка облустарга узатылат", — деди Жээнбеков.

Көчмөндөрдүн дүйнөлүк үчүнчү оюндары өткөн жылы Ысык-Көл облусунда өтүп, ага 60 мамлекеттен келген спортчулар катышкан.

БИШКЕК, 19-апр.— Sputnik. Ош шаарында балдардын жугуштуу илдеттер ооруканасынын жаңы имараты курулуп бүтүп, ишке берилди. Бул тууралуу мэриянын маалымат кызматы кабарлады.

Ага ылайык, жаңы оорукананын ачылыш аземине саламаттык сактоо жана социалдык өнүктүрүү министри Алымкадыр Бейшеналиев, Ош шаарынын вице-мэри Эмиль Шадыханов катышкан. Иш-чарада министр дарыгерлердин айлык акылары көтөрүлө тургандыгын белгилеген.

Ал эми вице-мэр Эмиль Шадыханов былтыркы жылдагы каталыктарды кетирбеш үчүн шаар мэриясы болгон күч аракетин жумшап, жугуштуу илдет боюнча түшүндүрүү жана алдын алуу иш-чараларын көрүп жаткандыгын кошумчалаган.

100 орунга ылайыкташкан оорукананын курулушу бир жыл ичинде бүткөнү айтылды. Ал эми медициналык мекеменин эски имараты толугу менен капиталдык оңдоп-түзөөдөн өткөнү маалым болду.