Призывники во время прохождения медицинской комиссии

Серепчи: кыргызстандыктар ИМде эмес, Россияда кызмат өтөгөнү жакшы

110
(жаңыланган 08:48 12.01.2015)
Саясат таануучу Токтогул Какчекеев Россияда кызмат өтөө үчүн пайда болгон мүмкүнчүлүк кыргыз аскерлерин күчтөнтөт жана мындай өз ара аракеттешүү Кыргызстан үчүн пайда гана алып келет деп эсептейт.

БИШКЕК, 6-янв — Sputnik. Саясат таануучу Токтогул Какчекеев чет элдиктердин Россияда аскердик кызмат өтөө мүмкүнчүлүктөрү жөнүндө Sputnikтин кабарчысынын суроолоруна жооп берди.

— 2-январда РФтин президенти Владимир Путин Россиянын куралдуу күчтөрүндө чет элдиктерге келишим боюнча аскердик кызмат өтөөгө уруксат бере турган жарлыкка кол койду. Кандай дейсиз, биздин жарандар мындай мүмкүнчүлүктөн пайдаланууга кызыгабы?

— Мен, аскер адамы катары, кыргызстандыктар ИМ ("Ислам мамлекети") же башка ошол сыяктуу түзүмдөрдөн көрө, Россияда кызмат өтөгөнү артык деп айта алам. Биздин ондогон жарандар Афганистанда "Талибан" тарапта согушкан. Эми карагыла, биздин өлкөнүн тургундары Сирияга согушчандардын катарында күрөшүүгө кетип жатышат. Менин билишимче, 500дөн ашык адам азыр согуш аракеттери жүрүп жаткан аймакта. Алар өзүлөрү үчүн, республика үчүн эмне пайда табышат? Диний фанатизмден башка табар эч нерселери жок. Анан калса, динге мындай сокур берилгендикти алар бизге да алып келишет. РФ жөнүндө айтсак, биздин аскерлер өзүлөрүнүн материалдык абалын жакшырта алышат жана, менимче, дал ушул фактор чечүүчү болот. Андан сырткары, аскер кызматкерлери өзүлөрүнүн аскердик-билим деңгээлин жогорулатууга мүмкүндүк алышары да шексиз.

— Мында "улуттук" маселе курч болбойбу?

— Менимче, андай ойго негиз жок. Путиндин жарлыгынан кийин РФтин коргоо министринин россиялык аскер кызматкерлеринин чет элдик жарандарга карата иш-аракеттери кенен сүрөттөлгөн буйругу чыгат. Россияда көп сандаган элдер сопсонун эле тил табышып жашап келишет, эгер кандайдыр бир маселе пайда болсо да, ал арзыбаган эле күнүмдүк тиричилик деңгээлде болот. Жана, мүмкүн адам фактору менен байланышкан мындай көрүнүштөр, жалпы жагдайды көрсөтпөйт. Эскерте кетсек, кыргызстандыктардан 200 адам Украинада чыр-чатак күчөп турганда жардам берүү үчүн Россиянын аскерине кирүүнү каалагандыктарын дароо билдиришкен. Же казак улутундагы полковник Серик Султангабиевди алалык, ал жоокерлерди сактап калыш үчүн өз денеси менен гранатаны жаап калган. Бул жагдайлар мурдагы СССР элдеринин ортосундагы байланыш дагы эле үзүлө электигин айтып турат. РФтин жетекчилиги муну жакшы түшүнөт.

— Чет элдик жарандарга өз аскеринде кызмат өтөөгө уруксат берүүнүн Россияга кереги эмне?

— 30 ашык Европа өлкөлөрү Улуу Ата мекендик согушка катышкан, эми ошол эле мамлекеттер ЕБнын курамында Россияга каршы санкцияларды киргизип, анын күчүн кетирүүгө болушунча аракет кылып жатат. Тилектеш коңшу өлкөлөрсүз Россия дүйнөлүк улуу мамлекет боло албайт. Жаңы бутуна туруп келе жаткан мамлекетти баары кайра чөгөрүүгө аракет кылган азыркы дүйнөдө Евразия континентиндеги кызматташтык андай аракеттерге каршы олуттуу бөгөт болот. Жана Кыргызстандын ЕАЭБга кириши муну жакшы ырастап турат. Кызматташтык экономикалык, маданий жана саясий гана эмес, аскердик да болушу керек. Жана, албетте, бул фактор биздин коопсуздугубузга да оң таасирин берет.

— Мындай шериктештиктен пайда болобу?

— Мен Ленинграддын Жогорку саясий окуу жайынын бүтүрүүчүсү катары мындай өз ара аракеттешүү биздин өлкөгө пайда гана алып келет деп айта алам. Биздин жоокерлер ЖККУнун жана ШКУнун эл аралык аскердик окууларында эң мыкты натыйжаларды көрсөтүүдө. Жана, менимче, Россияда кызмат кылуу мүмкүнчүлүгү биздин аскердин жакшыруусуна гана алып келет, себеби келишим боюнча кызмат кылуучулар (жоокерлер, офицерлер), кайра келгенден кийин өз тажрыйбаларын биздин аскерлер менен бөлүшөт да. Мен муну өз мисалым менен ырастай алам: Ленинграддын Жогорку Саясий окуу жайын бүтүргөндүгүбүздүн 40 жылдыгына арналган жолугушууда биз өлкөлөрдүн аскердик тармакта кызматташуу келечегин кенен талкуулаганбыз. Мындан сегиз жыл мурун эле мен биздин Коргоо министрлигине РФ менен кызматташтыкты күчөтүүнү сунуштаган элем. Мисалы, кыргызстандык жана башка аскерлер үчүн аскер-деңиз кызматын өздөштүрүү үчүн биздин Ысык-Көлдө машыгуу базасын ачып же танк, аба аскерлери боюнча шериктештикти жакшыртууну сунуш кылгам. 

110
Белгилер:
Россия, Кыргызстан, Афганистан, Владимир Путин, Токтогул Какчекеев, Аскер кызматкери, Офицер, ЕБ, Шериктештик
Тема боюнча
Башкы штаб: НАТО аскердик инфраструктурасын Россиянын чек арасын көздөй жылдырууда
АКШ президенти Жо Байден. Архивдик сүрөт

Согуш отун тутантпасын деп… АКШ президентинен өзөктүк баскычты алып коюшту

214
(жаңыланган 20:02 19.09.2021)
Быйыл январда Америка Кошмо Штаттарынын мыйзамдуу шайланган президенти америкалык өзөктүк куралды көзөмөлдөгөн эмес. Мындай чуулгандуу жаңылыкты жарым кылым оболу президент Никсонго "Уотергейтти" уюштурган айтылуу журналист Боб Вудворд жарыялады.

Жакында эле жарык көргөн "Тобокелдик" ("Peril") китебинде журналистиканын 78 жаштагы патриархы АКШнын Штаб жетекчилеринин бириккен комитетинин төрагасы Марк Миллинин сөзүн келтирет. Айтымында, ал 6-январдагы окуядан соң Трамп кетеринде бир чуу салып кетет деп катуу чочулап, өзөктүк сокку уруу жөнүндөгү чечим кабыл алуу алгоритмин өзгөрткөн. Ошол билдирүү жана Кошмо Штаттардын өзөктүк курал жаатындагы жагдайга Виктория Никифорова баам салган.

Мыйзамга ылайык, АКШ президенти аскер жетекчилери, эң оболу Штаб жетекчилеринин бириккен комитетинин төрагасы менен консультация өткөргөн соң өзөктүк ракеталарды коё берүү жөнүндө буйрук берет. Аскерлердики кеңеш берүүчү гана добуш. Бирок Милли офицерлерди бул жааттагы Трамптын бардык буйруктары алгач ага маалымдоону буюрган, андан ары эмне кылышты өзү чечмек.

Бул аз келгенсип Трампка кабарлабастан генерал Милли өзүнүн кытайлык кесиптешине – Борбордук аскердик кеңештин Бириккен штабынын жетекчиси Ли Цзочэнго телефон чалып, кокус бир нерсе болуп кетсе кабатырланбоону өтүнгөн. "Эгер биз сиздерге кол сала турган болсок, генерал Ли, мен сизге кабарлап коём. Бул күтүүсүз болбойт", – деген ал.

Ушул тапта республикачылар жана демократтар ошол телефон чалуу мамлекетке чыккынчылык акты болгонбу же жокпу деп кызуу талкуулап жатышкан чагы. Кошмо Штаттардын мамлекеттик башкаруу тутумунда чындап эле баары чиеленишип калды, демократтар "сиздер түшүнбөй турасыңар, бул бөлөк!" деп кыйкырышат. Баарынан кызыгы көпчүлүк аларга кулак салып, ынанып да жаткандыгында.

Байдендин келиши менен кырдаал жакшыра түштүбү? Анткен жери жок. Афганистан туурасында суроолорго жооп алуу үчүн АКШнын башкы командачысын конгресске чакырышкан. Бирок Байдендин башка иштери чыгып калыптыр. Конгрессмендердин алдында ал үчүн жагдайдан таптакыр кабары жок мамлекеттик катчы Блинкен "соккуга калды".

"Деги бизде ким баарына жооп берет? Ким чечим кабыл алат?" — деп сурады андан сенатор Риш. Ал Калифорниядагы өрт боюнча кызмат өкүлдөрү менен жолугушуусунун эң кызуу жерине келгенде президенттин сөзүн эфирден кесип салышканын Блинкендин эсине салды.

Өлкөнүн Башкы штабынын жетекчиси башка мамлекеттин башкы штабындагы жолдошуна телефон чалып: "Кабатыр болбо, кокус силерди жардыра турган болсок, кабарлап коём" дегени да чындап эле кызык, анан да күдүк ойлорго түртпөй салбай койбойт.

Кошмо Штаттар кадимки, өзөктүк, биологиялык жана химиялык курал кору боюнча айныгыс чемпион эмеспи. Сүйлөп жаткан эфирин өчүрүп сала алышкан карыя жолбашчы ушул тапта дүйнө жүзүндө эң күчтүү армияны тескейт.

Анан да АКШнын аскердик машинасы азыр кызыктуу трансформацияны баштан кечирип жаткан чагы. Айрым аналитиктер державанын Афганистандан качышы жана Сауд Аравиясын аскердик колдоодон күтүүсүз баш тартышы тегин жерден эмес дешет. Бул маңызсыз жана баарын жадатып бүткөн "эл аралык террорчулукка каршы согуштун", эл аралык агрессиянын алда канча масштабдуу программасын жүзөгө ашыруу аракетинин аякташы экенин белгилешет.

Rand корпорациясынын маалыматы боюнча, 2014-жылы эле Пентагондо "Үчүнчү калыптануу" (The Third Offset) деп аталган кандайдыр бир табышмактуу планды талкуулоого киришкен. Анда АКШнын негизги аскердик каршылаштары болжол менен күчтөрү бирдей Кытай менен Россия болору камтылган. Аларды жеңүү Америкага жаңы көп полярдуу дүйнөдө үстөмдүктү камсыздап бермек.

Афганистан же Ирак өңдүү кенедей өлкөлөр унутта калып, күчтүн баары кудуреттүү державаларга каршы күрөшүүгө топтоштурулмак. Бул үчүн армия супертехнологиялык болуп, роботторго, жасалма интеллект, космостук технологияларга, кибер күчтөргө ээ болууга тийиш эле. Эмне үчүн "Үчүнчү калыптануу"? Алгачкысы – Корея согушунан кийинки АКШ армиясынын технологиялык кайра жаралуусу. Экинчи катары технологиялык секирик Вьетнамдагы согуштан утулгандан кийинки тирдениши айтылса керек. Үчүнчү калыптануу террорчулукка каршы согуштун аягына пландалган.

Анткен менен андай демилге колдоо тапкан эмес. Бирок 2018-жылы Трамптын тушунда улуттук коргоо стратегиясы кабыл алынган. Кошмо штаттардын башкы душмандары катары анда да дал Кытай менен Россия, ал эми болочоктогу согуштук аракеттердин негизги театры катары Индия жана Тынч океандын акваториясы белгиленген.

"Үчүнчү калыптануу" — чөлдө талибдерди кубалагандай эмес, башка стратегия, бөлөкчө курал, башка суммадагы каражат. Трамптын тушунда Пентагондун бюджети 700 миллиард доллардан ашып кеткен.

Байден 2022-жылга аскердик багытка 753 миллиард бөлгөнү турат. Болгондо да анын жүз миллиарддан ашууну аскердик жаңы технологиялардын флагманына, тагыраагы, АКШнын Коргоо министрлигинин келечектүү изилдөөлөр башкармалыгына берилет. Кибер күчтөр 10,4 миллиарддан көбүрөөк каражат алат. Ошол ири планда эбегейсиз роль жасалма интеллектке жүктөлгөн. Google аянтчасынын ээси Эрик Шмидт, Palantir платформасынын кожоюну Питер Тиль жана санарип жаатындагы олигархтар Пентагонго өз өндүрүмдөрүн ийгиликтүү сатып келе жатканына бир топ болду. Алар кандай иштейт, ал башка кеп.

Жасалма интеллект бир топ жолу таң калыштуу каталарды кетиргенине дүйнө күбө. Мисалы, 2003-жылы Ирак согушу башталган тушта учкучсуз учурулган америкалык "Патриот" ракеталары жаңылыштык менен адегенде британиялык, андан соң америкалык истребителдерди атып түшүргөн. Алардын учкучтары ошентип кокустуктан шейит болгон. Жакында эле Германиядагы америкалык Рамштайн базасындагы эрте маалымдоо системасы жалган сигнал берген. Дал ошол маалда Балтика деңизинде россиялык Аскер-деңиз флотунун машыгуулары өтүп жаткан эле. Компьютер окуу алкагында ракеталардын коё берилишин чыныгы сокку катары кабылдаган экен. Ошентсе да америкалык өнөктөштөр өзөктүк куралдануу жаатында жасалма интеллектти пайдаланууну пландоодо. Анан калса ракета коё берүү жөнүндө чечим кабыл алуу сымал өтө сезимтал багытында колдонулушу мүмкүн.

Америкалык коргоо жаатындагы басылмалар, ошол эле Rand корпорациясы коркунучту таап, ажыра билүү жана чечим кабыл алууда компьютер кантип ката кетирери туурасындагы ондогон сценарийлерди сүрөттөшкөн. Мисалы, аны атмосфералык өзгөчө көрүнүш деле жаңылтып коё алат. Компьютер аны душмандын ракетасы катары кабылдап, ага өз ракеталарын багытташы ыктымал. Аны байкаган каршылаш тарап чыныгы ракетасын чыгарып, ошентип кыямат-кайыңга кептеп коюшат деп чочулайсың.

Анткен менен демилге улам колдоого татып барат. Жасалма интеллект америкалык өнөктөштөргө түтүн түтөтүп көздөн жазгыруу ыкмасындай пайдалануу үчүн гана керекпи деген ойго эрксизден берилесиң. Ким буйрук берген? Тээтиги компьютер, болгону адашып калыптыр. Анан аягы "Кимди ким көрдү? Быржыбайды там басты" дегендей эле болот. Жоопкерчиликке да тартылчу жан болбойт. Мейкиндикти анча баамдай албаган президент. Керек учурда "терекке чыккан" вице-президент. Алсыздыгы айдан ачык мамлекеттик катчы. Аскерлерби? Генерал Марк Милли америкалык армияны түрлөнтүү жана анда маданий айырмачылыкты сактоого багытталган саясатты жүргүзүү менен алек.

Жасалма интеллектке буйрук берип, андан соң "түпкүрдөгү мамлекеттеги" белгисиз олигархтар тарабынан кабыл алынган чечимди компьютердин катасы деп кутулууну көздөшөбү?

СССРдин курамындагы республикалар өзүнчө бөлүнүп жатышкан 1990-жылдары америкалык өнөктөштөр кандай гана чуу салышпады. Талап-тоноо, өзөктүк куралдын аткезчилиги жөнүндө канча жоромолдорду жайышпады. Алардын эч бири орундалган жок. Советтик цивилизация соңку сыноону татыктуу жеңип, өзөктүк куралын сактап, жалпыга толук коопсуздукту камсыздап берди. Америкалыктардын өз ракеталарына мамилеси да кызык. Кезегинде Билл Клинтондун ракеталарды коё берүү коддорун (сыр сөздөрүн) жоготуп алганы аргасыз эске түшөт. Көпкө издеп убара тартышканы жаңылыктардан маалым. Эгер америкалык элитанын интеллекти ушундай болсо, анда алардын жасалма интеллекти кандай иштейт? Эл аралык коомчулук АКШнын өзөктүк кнопкасынын тегерегиндеги абалга көңүл бурууга учур келгендир...

214
Белгилер:
АКШ, президент, согуш
Тема боюнча
Мунайдын баасы дагы канча убакыт кымбаттайт? Саресеп
ШКУ мамлекеттеринин желектери. Архив

Пикирлештердин саммити: ШКУнун Афганистан боюнча кадамы кандай болот

50
(жаңыланган 13:59 18.09.2021)
ШКУнун тандоо мүмкүнчүлүгү бар. Афганистан менен өнөктөш мамлекеттердин кызыкчылыгын колдонуп пайда тапкыдай эки тараптуу байланышка басым жасаса болчудай. Же баары чогулуп, талибдер менен бирдиктүү фронт катары сүйлөшүүлөрдү жүргүзүшү керек.

Шанхай кызматташтык уюму пайдасыз структура деген убак да болгон. Борбор Азия өлкөлөрү менен Кытайдын чек ара маселелерин чечүү үчүн түзүлүп, кийин жарактан чыккан формат деп чыгышкан. Бүгүн мындай пикир түп тамырынан бери өзгөрдү дейт Россия өкмөтүнүн алдындагы Финансы университетинин доценти Геворг Мирзаян.

"Эч кимге бизге акыл үйрөтүүсүнө жол бербешибиз керек. Аймактагы өлкөлөрдүн ички ишине сырткы күчтөрдүн кийлигишпеши кажет. Уюмга мүчө мамлекеттин улуттук өзгөчөлүгүн эске алган өнүгүүнүн моделин кармануу зарыл. Биздин келечек дайыма өзүбүздүн гана колдо болушу керек", — деди Кытай лидери Си Цзиньпинь Душанбеде өткөн саммитте.

Афганистандан курал-жарагын, союздаштарын таштай качкан АКШнын жосунсуз жоругунан улам ШКУнун мааниси арта түшкөнүн Россия президенти Владимир Путин белгиледи. Анын айтымында, америкалыктардан кийинки башаламандык радикализм менен исламизмдин өнүгүп-өсүшүнө жакшы азык болуп керет.

Путин Америка 20 жылдык "ишмердүүлүгүнүн" кесепетин жоюуга анча ашыкпай турганына токтолуп, афган чек арасынан 10 миңдеген чакырым алыс болгондуктан, АКШ буга көп деле башын оорутпай турганын кошумчалады.

Натыйжада кооптуулук жараткан маселе менен Афганистандын коңшулары Иран, Кытай, Тажикстан, Өзбекстан, аймактык коңшу катары Россия, Индия алектениши керек болуп калды. Башкача айтканда, ШКУ мамлекеттери жана уюмга эми кире турган мамлекеттер чара көрүшү керек. Ушу тапта керек болсо "Талибан" менен алакасы жакшы Пакистан да кооптуулук жок деп айта албайт, анткени Афганистандагы абалды жөндөөгө эч кимдин шаасы жетпей калчу башаламандыкка айланып кетчүдөй болуп турат.

Ал эми ШКУнун тандоо мүмкүнчүлүгү бар. Мында Афганистан менен өнөктөш мамлекеттердин кызыкчылыгын колдонуп пайда тапкыдай эки тараптуу байланышка басым жасаса болчудай. Мисалы, Кытай Афганистандын мурунку бийлигинин тушунда Индия ээлик кылган кен чыккан жерлерди өзүнө ала алат. Ал эми Өзбекстан тажиктердин эсебинен Афганистанды байырлаган өзбек общиналары үчүн өзгөчө шарт түзүп алса болот.

Ошол эле учурда баары чогулуп, талибдер менен бирдиктүү фронт катары сүйлөшүүлөрдү жүргүзүү жолу бар.

Жеке жана жалпы кызыкчылык

Дал ушул экинчи вариант туура сыяктуу болуп турат. Анткени бир катар субъективдүү экономикалык кызыкчылык менен тышкы саясий каалоодон тышкары (мисалы, Индия менен Пакистан өз ара чырында Афганистанды курал катары пайдаланууну көздөйт) ШКУ мамлекеттеринин Афганистан боюнча кызыкчылыгы бирдей.

ШКУ мамлекеттеринин жогорку сот жыйынына даярдык. Архив
© Фото / Фотохост-агентство sco-russia2020.ru/ Евгений Биятов
Баары тең, Пакистан да, Афганистандын исламизм менен радикализмди жайылтуучусуна айланышын каалабайт. Талибдердин өздөрү "Жашыл революцияны" экспорттоону каалабаганы менен чет элдик жихад уюмдарына афган жергесинде жашап, иштөөгө укук бериши толук ыктымал. Же алардын жолун тосуп, Борбор Азия аймагында теракт уюштурууга, Иран менен Кытайдын мусулман райондорунда абалды курчутууга. ошондой эле даярдыктан өткөн террорчуларды Өзбекстан же Тажикстан аркылуу Россияга жиберүүгө тоскоол болбойт. Дал ушундай жагдайлардын алдын алуу үчүн талибдер менен сүйлөшүү керек.

Мындан тышкары, Россия менен Иран үчүн афган наркотрафиги курч маселе болуп турат. Мында кеп аталган өлкөлөр аркылуу баңгизаттын Европага чыгышында деле эмес, анын басымдуу бөлүгү транзит мамлекеттерде калып, ошол жактын тургундарынын пайдаланышында. Ошол эле Иранда баңгизат саткандарга колдонулган өлүм жазасы да өлкөнү баңги сазынан чыгара албай жатат. Муну менен жеринде, башкача айтканда, Афганистанда, экспорттун көлөмүн чектеп күрөшүү зарыл. Токтотуп эмес, чектеп, чындыкты тике карайлычы. Бул үчүн да талибдер менен ымга келүү маанилүү.

Ал эми ШКУ мамлекеттеринин "Талибанды" кызыктыра алчу нерсеси бар. Бул дипломатиялык таануу жана экономикалык долбоорлор. Өзбекстандын президенти Шавкат Мирзиёевдин айтымында, Ташкент ШКУ алкагындагы аймактык экономикалык долбоорлорго Афганистанды тартууга аракет жасамакчы.

"Биз дагы Афганистан ушу тапта тушуккан гуманитардык жана экономикалык көйгөйлөрдү чечүүгө колубуздан келген жардамды берүүгө даярбыз. Казакстандын инфраструктурасы менен логистикалык мүмкүнчүлүктөрүн колдонуп Алматыда Афганистанга эл аралык жардам жөнөтүү үчүн ШКУнун гуманитардык хабын түзүүнү сунуштайбыз", — деди өз кезегинде Казакстандын президенти Касым-Жомарт Токаев.

Бирок эксперттердин айтымында, бардык экономикалык жана дипломатиялык аракеттер талибдер үчүн ШКУ өлкөлөрүнүн кызыкчылыгын эске алуу менен кадам шилтей турганын иш жүзүндө көрсөткөндөн кийин гана жеткиликтүү болушу керек.

Россия президенти Владимир Путин аракеттерди "ШКУ — Афганистан" тобунун ишин жандантуудан баштоону сунуштады. "Жаңы афган бийлигин тынчтык орнотуу, коомдук жашоону жөнгө салуу, коопсуздукту камсыздоо боюнча берген убадасын аткартууну стимулдаштыруу керек. Мында "ШКУ — Афганистан" тобунун ишмердүүлүгүн жандандыруу маселесин иштеп чыгуу зарыл. Бул топ атайын афгандык өнөктөштөр менен иштөө үчүн түзүлгөн", — деди РФ лидери.

* — Кыргызстан, Россия жана башка бир катар мамлекеттерде тыюу салынган уюм.

50
Белгилер:
Афганистан, ШКУ, Индия, Пакистан, кызматташуу, 'Талибан' кыймылы, экономика, дипломатиялык мамиле
Тема боюнча
Си Цзиньпин: Кытай ШКУ өлкөлөрүнө жакырчылыктан чыгуу жолдорун көрсөтүүгө даяр
Путин ШКУнун террорчулукка каршы түзүмүн күчтөндүрүүнү сунуштады
ШКУ саммитинин жыйынтыгы боюнча кол коюлган документтер. Тизме
Ок атуу болгон Россиянын Пермь мамлекеттик улуттук изилдөө университетинин жаныдагы полиция кызматкерлери

ТИМ: Пермдеги ЖОЖдо ок жегендердин арасында кыргызстандыктар жок

0
(жаңыланган 00:29 21.09.2021)
Кечээ, 20-сентябрда, Пермдеги жогорку окуу жайдын студенти имараттын ичиндегилерге ок чыгарган. Бир нече убакыттан соң полиция аны жарадар кылып, кармаган.

БИШКЕК, 21-сен. — Sputnik. Россиянын Пермь мамлекеттик улуттук изилдөө университетинде болгон окуяда жабыркагандардын жана каза болгондордун арасында кыргызстандыктар жок. Бул тууралуу ТИМдин маалымат кызматынан кабарлады.

"Пермь аймагынын компетенттүү органдарынын алдын ала маалыматы боюнча, 2021-жылдын 20-сентябрында Пермь мамлекеттик улуттук изилдөө университетинде болгон окуяда жабыркагандардын жана каза болгондордун арасында Кыргызстандын жарандары жок", — деп айтылат таратылган билдирүүдө.

Эске салсак, бүгүн эртең менен Россиянын Пермь мамлекеттик изилдөө университетинде студент имараттын ичиндегилерди аткылап, алты киши каза таап, 26сы жаракат алган. Ок чыгарган студент полиция кызматкери окуя болгон жерге барганда аны көздөй бир нече ирет аткылаган. Тартип сакчысы куралчанды жарадар кылып, мылтыгын колунан алгандан кийин биринчи жардам көрсөткөн. Жыйынтыгында ок чыгарган студент кармалган.

0
Белгилер:
Россия, Пермь, студент, ок атуу, полиция
Тема боюнча
Пермдеги элди аткан студент полиция кызматкерине да ок чыгарган. Чоо-жайы
Жапаров Путинге Пермдеги окуя боюнча көңүл айтты