Абактын кайтаруу бөлүмү. Архив

Байзаков кылмыштуу топтун кечээ өлтүрүлгөн мүчөсү Сапарбековдун өлүм себебин болжолдоду

212
(жаңыланган 17:37 28.04.2015)
Байзаков криминалдык топтордун өз ара чатакташуусу мүмкүндүгүн жокко чыгарып, Сапарбековдун өлтүрүлүшү апрель айынын ортосунда боштондукка чыккан "Карышкыр" лакап аты менен белгилүү Мурсалым Умырзаковго байланыштуу эместигин белгиледи.

БИШКЕК, 28-апр. — Sputnik. Уюшкан кылмыштуу топтун мүчөсү Дамир Сапарбековду №1 убактылуу кармоо жайында жасаган "чеги жок" өзүм билемдигинен улам өлтүрүп кетишкенин Жазаларды аткаруу мамлекеттик кызматынын мурдагы жетекчиси Шейшенбек Байзаков Sputnik маалымат сайтына билдирди. 

27-апрелде болжол менен 23:30дар чамасында шаардык ички иштер башкармалыгынын 102 кызматына "Жал" кичи районунда атышуу болгону боюнча маалымат келип түшкөн. Милициянын маалыматына ылайык, окуя болгон жерден ок атылганы аныкталган. Сапарбеков оор жаракат алып, аймактык ооруканага жеткирилип, ал жактан каза болгон. Кол салгандардын бирөө кармалган. Кылмыш жаза кодексинин 97-беренеси "Адам өлтүрүү" боюнча кылмыш иши козголду.

Байзаков криминалдык топтордун өз ара чатакташуусу мүмкүн деген версияны жокко чыгарып, Сапарбековдун өлтүрлүшү апрель айынын ортосунда боштондукка чыккан "Карышкыр" лакап аты менен белгилүү Мурсалым Умырзаковго байланыштуу эместигин белгиледи. 

"Аны убактылуу кармоо жайында отурганда жасаган чектен ашкан иштери үчүн өлтүрүштү", — дейт Байзаков. 

Экс-жетекчисинин айтымында, №1 убактылуу кармоо жайынын "смотрящийи" болгон Сапарбеков камактагылардын жумасына 1000 сомдон чогултуп, криминалдык дүйнөнү "тойгузуп" турган.

"Сегизден киши отурган камералар бар. Бир айда канча сумма чогуларын элестетип көргүлө. Кезегинде мен бул аракеттерге бөгөт койгом", — деди ал.

Байзаков №1 убактылуу кармоо жайына камакка алынган Айдарбек Шамурзаевдин өлтүрүлүшү боюнча айтып, ал 2011-жылдары өлкөнүн түштүгүндө криминалдык авторитет болгон белгиледи.

Анын айтымында, Сапарбеков анын өлтүрүлүшүн уюштурган. 

"Шамурзаев спортчу болчу, баңгизатын колдончу эмес, бирок анын денесинен ачканда героинден ууланганы аныкталган. Буга Сапарбековдун тиешеси бар экенин далилденип, анын жаза өтөө мөөнөтү узартылган. Бирок, кийин бул иш кайтадан каралып, ал акталган", — деди ал. 

Шамурзаевди өлтүргөн Сапарбековду №50 убактылуу кармоо жайына которбуз дегенде 2012-жылдын 16-январында №1 убактылуу кармоо жайында камакка алынгандар нааразычылык уюштурган. Нааразычылыгын билдирип, ооздорун тигип, күрөө тамырларын кескен камактагыларды атайын даярдыктагы аскерлердин жардамы менен тынчытышкан. Кийин баары бир Сапарбековду түрмө режими менен убактылуу кармоо жайына которушкан.

212
Белгилер:
Жаза аткаруу мамлекеттик комитети, криминал, адам өлтүрүү, Айдарбек Шамурзаев, Шейшенбек Байзаков, Дамир Сапарбеков
Тема боюнча
"Карышкыр" эркиндикке чыкты