Америкалык Абрамс танктары. Архив

"Абрамстарды" жеткиришти. АКШ Беларусь чек арасында эмне баштоодо?

145
(жаңыланган 15:03 16.09.2020)
Жердеги күчтөр, бомбалоочу, истребителдер жана флоттук сокку уруучу топтор — Пентагон жана НАТО союздаш мамлекеттердин чек арасында кайрадан активдеше баштады.

Жакынкы күндөрү Литвага АКШнын танк батальону келип түштү. Ал "Атлантикалык чечкиндүүлүк" (Atlantic Resolve) деген окууга катышмакчы. Россиянын Космостук-аба күчтөрү стратегиялык авиация жана аба чалгындоочуларынын учуштарын көп каттай турган болду. Бул эмнеге байланыштуу экенин кесиптешибиз Николай Протопоповдун макаласы РИА Новости агенттигине жарыяланган.

Прибалтикалык "достор"

Ондогон Abrams танкалары, Bradley пехотасынын аскердик машинасы, сооттолгон жолтандабастар... Пабраддагы полигондо бүтүндөй чакан армия пайда болду. Ал эми буга дейре америкалыктар Литвага авиациясын да – Apache жана Black Hawk тик учактарын алпарышкан. Беларусь Коргоо министрлигинин маалыматы боюнча, Союздук мамлекеттин чек арасынан болгону 15 чакырым аралыктагы литвалык полигонго беш жүз аскер кызматкери, 29 танк жана 43 пехота аскердик машинасы топтолгон.

Беларусь коргоо министри: чек арага жакын АКШнын танк батальону келип жайгашты

Прибалтикалык республиканын бийлиги америкалыктар литвалык аскер кызматкерлери менен биргелешкен окуу тапшырмаларын аткарышканын, пландалган машыгуулар үчүнчү өлкөлөргө каршы багытталбаганын түшүндүрүштү.

Белгилей кетсек, Вильнюс америкалыктардан литвалык полигондордо мүмкүн болушунча көбүрөөк окууларды өткөрүүнү өтүнүп, ал эми океан ар жагынан келген союздаштарынын жайлуулугун камсыздоо өкмөттүн артыкчылыктуу милдеттеринин бирине айланган.

"Атлантикалык чечкиндүүлүк" америкалык күчтөрдү ротациялоо программасы АКШнын мурдагы президентинин тушунда эле башталган, — деп белгилейт "Валдай" аналитикалык клубунун аскердик серепчиси Артем Куреев.

— Белорустагы окуяларга ал түздөн-түз байланыштуу эмес. Бирок аны менен бирге эле коронавирус пандемиясына да карабастан, америкалык аскерлер ротация графигин бекем сактап, пландуу машыгууларды жылдырышпайт".

Эске салсак, АКШнын "Атлантикалык чечкиндүүлүк" операциясын 2014-жылы Россия менен Крымдын биригишинен кийин дароо башташкан. "Россиялык агрессия" деген шылтоо менен америкалыктар Европанын ар кыл өлкөлөрүндө күчтөрүн жайгаштырып, акырындап алардын санын арттырып келет.

Чектен чыккан активдүүлүк

Эксперттердин баамында, 2014-жылдан тарта НАТО россиялык чек аралардагы аскердик активдүүлүктү эки эсе күчтөндүргөн. Россиянын коргоо министри Сергей Шойгу түндүк атлантикалык альянс кансыз согуш маалынан берки каршы турууга умтулат.

НАТО Чыгыш Европадагы ракетага каршы коргонуу тутумун түзүүнү улантып, аскердик инфраструктураны өнүктүрүүдө.

"Прибалтикадагы НАТО тобу кичирейбей турганы так, — дейт Куреев. — Бул мамлекеттердин элиталарына АКШ менен кызматташуу зарыл. Бул менен алар электоратка "орус коркунучунан" коргоону көрсөткүсү бар. Алар буга экономикадагы жоготууларын, порттордун жүгү толбогонун, орус тилдүү азчылыктын нааразычылыгын да дал ушуга шылтай алышат".

Анан калса, Германиядан айырмаланып Латвия, Эстония жана Литва өз армиясын өзү багууга, инфраструктура жана жай америкалык күчтөрдү жайгаштырууга кеткен чыгымдарды көтөрүүгө даяр.

Европада АКШ күчтөрүнүн дайым орун алышы кадыресе көрүнүшкө айланып барат. Чыгыш Европадагы Пентагондун эң ири плацдармы азыр Польшада жайгашкан. Анда азыр төрт жарым миң аскер кызматкери бар. Жакында дагы миң жоокер келет.

АКШ эмнеге РФ жээктерине суу түбүндө жүрүүчү кайыктарын жеткирүүдө? Саресеп

Вашингтон менен Варшава аскердик кызматташуу жөнүндөгү келишимге кол коюшту. Документке ылайык, Польшада АКШнын Куралдуу күчтөрүнүн командалык-штабдык структурасы жакшыртылат, аскердик даярдык борборлору түзүлөт. Армиялык жана транспорттук авиациясынын бөлүктөрү, ошондой эле атайын операциялардын күчтөрү уюшулат.

Ошону менен бирге эле АКШ 1997-жылы түзүлгөн Россия – НАТО Негиз салуучу актысынын жоболорун эптүүлүк менен буйтап өтөт. Ага ылайык, альянс чыгыштагы чек араларда туруктуу негизде күчтөрүн жайгаштырууга милдеттендирилген.

"Россияга" сес көрсөтүү үчүн Европага ондогон учак жана тик учактарды кайра жайгаштырышкан. Ошентип, Польшага F-16 истребителдерин жана C-17 Hercules транспорттук учактарын алпарышты. Балтика өлкөлөрүн жана Балтика деңизинин акваториясын абадан күзөтүү үчүн Литвага улам истребителдерин жөнөтүп турат.

НАТО боюнча союздаштарынын аэродромдорунун күчтөрүн көрсөтүү үчүн мезгил-мезгили менен өзүнүн бешинчи муундагы F-35 Lightning жана F-22 Raptor "көзгө чалдыкпастарын" да учуруп турат. Польшада MQ-9 Reaper чалгындоочу-сокку уруучу учкучсуздардын эскадрильясын түзүшкөн.

"Булчуң" сынашмай

Европада АКШнын стратегиялык авиациясы да кызуу иштейт. Августтун аягында үч В-52Н бомбалоочу учагы Калининград облусу боюнча канаттуу ракеталар менен сокку урууга машыккан.

"Стратегдер" британиялык Фэрфорд авиабазасынан учуп чыгып, Нидерланды, Германия, Польшанын үстүнөн өтүп, эстониялык Тапа полигонуна барган. Ал жактан Россиянын аймагындагы объектилерин шарттуу бутага алган.

Сентябрдын башында "учуучу чептер" Украинага абадан көз салышты. B-52 Незалежнаянын аба мейкиндигине алгач жолу кирди, үч учак украиналык истребителдеринин коштоосунда өлкөнүн батыш чек арасынан Азов деңизине чейин жана артка учуп өтүштү.

Россиянын Космостук-аба күчтөрүнүн башкы командачысы Сергей Суровикиндин айтымында, апта ичинде эле, тагыраак, 28-августтан 4-сентябрга дейре АКШ бомбалоочу авиациясынын учактары Батыш жана Чыгыш Европанынын аба мейкиндигинде он ирет жалгыздап жана жана топ-топ болуп учуп жүрүштү.

Андан тышкары, ондогон "чалгынчылар" күн сайын россиялык аймактын чегин бойлой күзөтүп жүрөт. РФтин Космостук-аба күчтөрүнүн истребителдери алардын алдын тороо үчүн бир күндө бир нече жолу абага көтөрүлүүгө аргасыз учурлары болот.

АКШны тынч уктатпаган Су-57 неге мынча бүйүр кызытат?

Бирок Куреев белгилегендей, Россия Кытайдан айырмаланып "өз аймагындагы ар кандай сокку машыгууларын" алда канча салкын кандуу кабыл алып, аларга пландуу машыгуулары менен жооп кайтарат. "Пекин, маселен, мындайга кыжыры кайнайт, дароо өзүнүн аскердик күчүн болушунча көрсөтүүгө тырышат", — деп белгилейт эксперт.

Кошмо Штаттар суу мейкиндигин да көз жаздымда калтырбайт. Алардын кемелери Кара деңизге эле дайымкы мейман болуп келишпеди. Жай аяктаганда Норвегияга USS Seawolf суу түбүндөгү атомдук субмаринаны алпарышты. Андан мурун эле НАТОнун кемелери Исландиянын жээктеринде Түндүк Атлантикада кемелерге каршы коргонуу аракеттерине машыгышкан.

Май айында америкалык флот отуз жылдан бери биринчи ирет Баренцево деңизине кирип келди. "Портер", "Дональд Кук" жана "Франклин Рузвельт" ракеталык эсминецтердин, ошондой эле британиялык "Кент" фрегатынын экипаждары оор аба шарттарында аракет кылууга машыгышкан.

Мунун баары альянстын Түндүктө аскерий дараметин күчтөндүрүү аракеттерин гана тургай, Россиянын Аскердик-деңиз флотунун жана Түндүк флоттун улам өрчүп бараткан күчүн да айгинелейт. Себеби кансыз согуш аяктап, СССРдин ыдырашынан кийин АКШ россиялык флотту олуттуу кас катары караган да эмес. Эми аны менен эсептешүүгө аргасыз.

145
Белгилер:
танк, НАТО, чек ара, курал-жарак, Беларусь, АКШ, Россия
Тема боюнча
Россиянын Су-27 истребители чет өлкөлүк тыңчы учактардын жолун тороду. Видео
"Штабын жайылтууда": АКШ армиясы Европанын түштүгүндө эмне даярдап жатат?
Россиялык саясатчы Алексей Навальный. Архив

Германия Алексей Навальныйды үн катпоого мажбурлайт. Саресеп

95
(жаңыланган 15:05 17.09.2020)
Алексей Навальный социалдык медиага ооруканага жаткырылгандан кийин биринчи сүрөтүн жарыялады. Саламаттыгы жакшыра элек болсо да, жалпысынан жылыш бар экенин кошумчалаган.

Ал эми Германиянын тышкы иштер министри Хайко Маас дүйшөмбүдөгү басма сөз жыйынында блогердин "Новичок" менен ууланышы боюнча тыянактарды сындоону токтотууну талап кылды. Анткени, анын айтымында, Франция жана Швециядагы кайсы бир көз карандысыз лабораториялар бундесвердин адистери чыгарган корутундуну тастыктаган. Ушул маселенин тегерегиндеги Ирина Алкснистин макаласы РИА Новости сайтына жарыяланган.

Лабораториялар боюнча маалыматтар да жашыруун. Министр каалагандай болору арсар. Натыйжасы тескерисинче болушу да ыктымал. New York Times басылмасы ФРГнын коопсуздук органдарынын жогорку кызматтагы өкүлүнө шилтеме кылуу менен Алексей Навальный сакайган соң Россияга "өз ишмердигин улантуу үчүн" кайтууга ниеттенгенин жарыялаган.

"Түндүк агым – 2нин" тагдырын "Новичок" чечеби? Геосаясаттын кезектеги көшөгөсү

Эгер гезиттегилер чындыкка дал келсе, анда Навальный үчүн кубансак болот. Анткени, андай болсо, анын когнитивдик функциялары сакталгандыгын айгинелейт. Врачтар оор абалын эске алуу менен буга кепилдик беришкен эмес.

Соңку он жылдыктарда Россиянын "каалгасын тарс жаап" бир топ адам чыгып кеткен. Өз мекенинде аттуу-баштуу адамдар эмигранттардын жалпы массасына аралашып, коомдогу салмагын да тез жоготушкан. Кремль менен айыгышкыс күрөшчү абалы менен бирге каржылык мүмкүнчүлүктөрүнөн да ажырашкан. Михаил Ходорковский сымал чындап бардар адамдар россиялык оппозиционерлердин арасында аз.

Прага, Рига жана Лондондогу жупуну батирлеринде отуруп алып, социалдык медиада жаалдангандан башка аргалары жок. Алардын тагдырынан сабак алышкандай. "Биротоло Россиядан кеттим" деген билдирүүлөр аз жана акырын жаңырчу болду. Алексей Навальный алардын кейпин кийсе, бир топ эле ичи ачышмак. Акыркы убакта ал Россиянын эң белгилүү оппозиционерине гана айланбастан, өз тарапташтарынан каражат да топтой турган система түзүп алган. Үй-бүлөсү менен чет элдик кымбат курорттордо эс алуулардан тышкары кызын Стэнфорд университетине студент кылууга чейинки жагымдуу бонустарды камсыз кылып алган.

"Оңой тапкан олжосун" колдон чыгарууга, экинчи Скрипалга айланууга блогердин ниети да жоктугу таң каларлык эмес. Бирок Алексей Навальныйдын жеке кызыкчылыктары менен Батышта анын дартынын сүрөттөлүшү таптакыр дал келбейт.

Россия ТИМи Берлиндин Навальный тууралуу билдирүүсүнө үн катты

Немистер тарабынан ага коюлган диагноз менен мекенине кайтышы коопсуздук жагынан мүмкүн болбогондой. Бирок блогердин кайра кайтууга ашыгып турганы айдан ачык. Ал эми бул каалоосу "Новичок" менен ууланбаганын жана өмүрүнө россиялык бийлик тарабынан эч кандай кооптуулук жок экенин айгинелейт.

Анткен менен немис тарап Москвага анын диагнозун тастыктаган маалымат берүүдөн дале баш тартып келет. Россиянын Башкы прокуратурасы германиялык кесиптештерине блогердин дартынын таржымалы тууралуу текшерүү үчүн кезектеги өтүнмөсүн жолдоду. Бирок Берлиндин иликтөөгө кол кабыш кылары күмөн. Блогер "Шаритэ" клиникасынан чыгарылганда алып келчү кагазы россиялык тийиштүү органдарга кыйла кызык маалыматты берер.

Айтор, Алексей Навальныйдын Россияга сөзсүз кайтуу ниети немецтерди бир топ жагымсыз жана оор абалга тушуктурат. Себеби бир нече аптадан берки Россияны каралоо аракети текке кетет.

Баса, мындай учур британиялыктар тарабынан кылдат иштелбеди беле. Скрипалдын ууланышы боюнча шоу масштабдуулугу жана чоо-жайына чейин этияттык менен иштелип чыгышы эле эмес, "курмандык" да абдан сабаттуулук менен тандалган. Эч кимге белгисиз жана керексиз тыңчы кураторлорунун кебинен чыкпайт. Лондон Скрипалдын аракеттерине кымындай да эркиндик бербей, журналист же дипломаттар менен бир да жолу сүйлөштүргөн эмес.

Алексей Навальныйды үй-бүлөсү менен кошо россиялык башкы оппозиционердин таттуу жашоосун өз ыктыяры менен таштоого көндүрүү өтө кыйын болор.

Блогердин Россияга кайтуусу менен Берлин бул окуянын тегерегинде өзү салган ызы-чуунун жагымсыз кесепеттерине кабылат. Бул көйгөйдү чечүү үчүн алар "көндүрүү" же "ыктыярдуу түрдө" деген тейдеги ыкмаларга барары турулуу иш.

95
Белгилер:
кызыкчылык, уулануу, оорукана, Россия, Германия, Алексей Навальный
Тема боюнча
Чоң ката. Германия "Түндүк агым — 2" курулушун токтотуу талабын сындады
АКШ президенти Дональд Трамп. Архивдик сүрөт

Кыйын кырдаал: АКШ Россиядан нефть сатып алууга тыюу салмакчы

192
Нефть иштетүүчү компаниялары Россияга нефть боюнча көз каранды болуп турган чакта "Түндүк агым — 2" долбооруна каршы чыгуунун өзү акылга сыйгыс нерсе катары кабылданат.

БИШКЕК, 14-сен. — Sputnik. Америкалыктар "Түндүк агым — 2" долбооруна жаңы санкция даядап жатат, ошол эле маалда өлкө Россия нефтисин импорттогондордун сап башына чыкты. Алдыңкы аналитикалык басылмалардын бири мындай көрүнүштү эки жүздүү позиция деп атап, Россиядан мунай алууга тыюу салуу керектигин билдирди. Бирок бөгөт коюунун кесепети да чоң болот, нефть иштетүүчү заводдордун баарынын иши токтоп калышы толук мүмкүн. Бул тууралуу РИА Новости жарыялаган макалада айтылат.

Ири керектөөчү

Конгресс "Түндүк агым — 2" долбоору менен байланышкан европалык компаниялардын ишине чектөө киргизүүгө даярданып жатат. Бул Германиянын кескин сынын жаратып, Берлин керек болсо каршы санкцияларды киргизе турганын айтып коркутууга чейин барды.

Чоң ката. Германия "Түндүк агым — 2" курулушун токтотуу талабын сындады

Американын The National Interest (NI) аналитикалык басылмасы жазгандай, Германиянын реакциясы мыйзам ченемдүү нерсе, анткени Вашингтондун эки жүздүүлүгү айкын болуп турат. Быйыл АКШ Россиядан чийки мунай сатып алгандардын алдыңкы катарына чыкты, америкалыктар жалпы экспорттун 12 пайызын сатып алышкан.

АКШнын энергетикалык маалымат башкармалыгынын билдиргени боюнча биринчи жарым жылдыкта Россиядан АКШга тогуз миллион тонна мунай ташып келинген. Бул 16 жылдан берки рекорддук көрсөткүч.

Эки жүздүү саясат

Ведомство формалдуу түрдө АКШ экинчи орунда экенин, анткени Нидерланддар 12,19 миллион тонна сатып алганын тактады. Бирок аталган мамлекет транзиттик хаб экенин унутпайлы, ал жактан нефть өндүрүмү башка мамлекеттерге жөнөтүлөт. Ал эми Америка Россиянын мунайын өзү үчүн алууда, бул жерде Вашингтон эч кимди алдына салбайт.

Басылманын баамында, россиялык импортко мыйзам чегинде тыюу салуу керек. Мисалы, конгресс Россиядан нефть ташыган компанияларга финансылык санкцияларды киргизип кое алары айтылат.

Бирок мунун иш жүзүнө кантип ашары түшүнүксүз, анткени америкалыктар үчүнчү өлкөлөргө санкция жарыялай берип, аягында россиялык сырьёдон толук көз каранды болуп калган. Муну былтыр АКШ расмий мойнуна алганы маалым.

Альтернатива жок

Негизи Россия АКШга нефть жеткирүү боюнча алтынчы орунда болчу. Ал эми 2020-жылдын февралында Канададан гана артта калып экинчи орунга чыккан. Венесуэладан кайра иштетүүгө ылайыкташкан нефть алууга жолу буулуп, Ирандын импортунун көлөмү төмөндөп, америкалыктар альтернативалык жол издөөгө аргасыз болгон.

"Түндүк агым – 2нин" тагдырын "Новичок" чечеби? Геосаясаттын кезектеги көшөгөсү

Нефтинин кайра иштетүүчү бир катар ишканалардын технологиясы Пермь бассейни менен Батыш Техаста өндүрүлгөн жеңил нефтини пайдаланууга жарабаганы кырдаалды курчутуп жиберген. Өзгөчө Мексика куймасы менен Чыгыш жээктеги заводдор оор абалда калышкан.

Бул заводдор күкүрттүү сортко ылайыкташып курулган, мындан улам жеңил нефтини мурда Венесуэладан сатып алынчу оор нефть менен аралаштыруу керек эле. Бирок былтыр январда Дональд Трамп Каракаска каршы санкция киргизген. Натыйжада Венесуэланын экспорту 32 пайызга төмөндөп, казуу суткасына 1,001 миллион баррелге чейин түшүп кеткен.

АКШнын заводдору сырьёнун жоктугунан токтоп калуу коркунучуна кептелген. Мындай апаатты болтурбаш үчүн америкалыктар Urals сортуна өтүп, россиялык мазутту сатып ала башташкан. Былтыр Кошмо Штаттар Россиядан 11 миллион тонна мазут импорттошкону маалым, бул 2018-жылга караганда эки эсе көп көрсөткүч.

"Бул Венесуэладан келбей калган мунайдын ордун толтурду", — дешкен АКШнын Vortexa компаниясынын аналитиктери.

Америка үчүн химиялык курамы боюнча жакыныраак келген Сауд Аравиясы да альтернатива болмок, бирок саудиттер казуунун көлөмүн көбөйтүүгө макул болбой коюшту. Натыйжада экономика саясатты сүрүп чыгып, америкалыктар орустарга кайрылууга мажбур болушту.

Россиянын сырьёсу баасы менен да айырмалана алды. Финансы министрлигинин маалыматы боюнча, Urals сортунун наркы январь-июль айларында баррелине орточо 40,34 доллардан бааланып жатты. Былтыркы жылга салыштырмалуу бул 15 долларга аз.

Соодада кастык жок. АКШ Россиядан рекорддук көлөмдөгү мунай сатып алды

Анын үстүнө деңиз аркылуу ташуунун баасы (фрахт) арзандады. Карантин бүткөндөн кийин күйүүчү майга болгон суроо-талап күчөдү, эл кайрадан автоунаа айдап, учактар уча баштады.

Жалпылап айтканда, америкалык компаниялардын Россиядан оор нефть сатып алуудан башка айла-амалы жок эле. Буга эки өлкөнүн ортосундагы анча жакшы эмес мамиле да, Вашингтондун Москвага каршы киргизген санкциялары да тоскоол боло алган жок. Ушунун баарынын фонунда "Түндүк агым — 2" долбооруна болгон күчү менен каршы туруу акылга сыйбас нерседей көрүнөт.

192
Белгилер:
санкциялар, Экспорт, импорт, Мунай, компания, Россия, АКШ, нефть
Тема боюнча
Батыш өзүн-өзү кыйратууга чамындыбы? Ой толгоо
Бир рубль монетасы жана долларлык монета жана купюрасы. Архив

Россияда доллардын баасы кескин кымбаттап кетти

0
(жаңыланган 00:14 24.09.2020)
Доллардын сомго карата баасы сезилерлик өзгөргөн жок. Анткен менен Россия акчасынын наркы түшүп кетиши, доллардын Кыргызстандагы баасына таасир этип койгон учурлар көп.

БИШКЕК, 23-сен. — Sputnik. Россияда апрель айынан бери биринчи жолу доллар 77 рублге чыгып, кескин кымбаттады. Бул тууралуу РИА Новости жазды.

Москва биржасынын маалыматына караганда, бир доллар Бишкек убактысы боюнча саат 20:24тө 77,07 рублди түздү (96 тыйынга кымбаттады). Ал эми евро 80 тыйынга кымбаттап, 89,93 рубль болду.

Белгилей кетсек, доллардын сомго карата баасы сезилерлик өзгөргөн жок. Анткен менен Россия акчасынын наркы түшүп кетиши, доллардын Кыргызстандагы баасына таасир этип койгон учурлар көп.

0
Белгилер:
баа, доллар, Россия
Тема боюнча
Россияда евронун баасы рекорддук көрсөткүчкө жетти. Кыргызстанда абал кандай?