АКШ аскерлери. Архивдик сүрөт

АКШ эмне себептен бардык согуштарда утулууда? Батыштагы басылмага сереп

214
(жаңыланган 18:48 25.04.2021)
АКШнын Эсеп палатасы өлкөнүн куралдуу күчтөрүнүн аскердик даярдыгы алсыраганын моюнга алды. Батыштагылар Афганистан, Иран жана башка өлкөлөрдөгү согуштарда Пентагондун жеңилгенине эмне себеп экенин аныктоого умтулушат.

Кошмо Штаттардын жылына 700 миллиард доллардан ашкан аскердик бюджети да ийгиликке кепилдик болбогону таң калычтуу. Адатта акчаны "армиянын булчуңу" деп коюшат, бирок аскердик жеңишти долларга сатып албасың анык. Аталган державанын ушул жагдайына аскерий серепчи Александр Хроленко баам салган.

АКШнын Эсеп палатасы соңку 20 жылдагы аймактык бир нече жаңжалдарга катышуудан улам америкалык куралдуу күчтөрдүн аскердик даярдыгы начарлап кеткенин айтып чыкты. Бирок акыркы 75 жылдагы (фашисттик Германияны 1945-жылдын май айындагы жалпы жеңиштен бери) үчүнчү өлкөлөрдөгү Пентагондун бардык согуштарын ийгиликсиз деп саноого болот.

Көзөмөлдөөчү мекеменин адистери потенциалдуу душмандардын күчтөнгөнүнөн улам АКШнын аскердик артыкчылыгынын жоголгонун белгилешет. Болгондо да аскердик ченемдин дээрлик ар биринде – деңизде да, аба мейкиндиги жана космосто да америкалык "үстөмдүк" басаңдап барат. Америкалык деңиз күчтөрүнүн жогорку даярдыгын калыптандырууда аналитиктер күчтөрдүн планетанын булуң-бурчуна жайгаштыруу мүмкүнчүлүгүнүн азайышын, техникалык тейлөөнүн кыйынчылыктары тоскоолдук жаратаарын айтышат.

Америкалык саясатчылар улуу державалар арасында Кошмо Штаттардын глобалдык лидерлигин сактап калуу үчүн куралдуу күчтөрдүн дараметин өстүрүүгө байма-бай үндөп келишет. Пентагондун бюджети жылына 700 млрд. доллардан ашканына көп болгон, бирок мындан деле майнап чыккан жок. Буга ашкере далил катары расмий түрдө согушка жарабайт деп табылган, анткен менен наркы асман чапчыган F-35 истребителин (1,5 трлн. доллар) мисал келтирсек болот. Россия менен Кытайды ооздуктоо үчүн кошумча 715 млрд. доллар абалды анчалык деле өзгөртүп жибербейт, себеби Москва жана Пекин коргоо тутумун акылга сыярлык жетиштүүлүк принцибинде куруп, куралдардын сапаттуу артыкчылыгына умтулушат. Маселен, SIPRI берген баа боюнча, Россия аскердик чыгымдары эң бийик өлкөлөрдүн төртүнчү сабында турат. Кандай болгон күндө да Москва Вашингтонго караганда бул багытка 10 эсе аз чыгымдайт. Кытайдын аскердик бюджети америкалык коргоо тутумуна бөлүнгөн каражаттан төрт эсеге аздык кылат.

Афган синдрому

АКШ жана НАТОнун аскердик контингенти Афганистандан чыгууга аргасыз. Анткени 2020-жылдын 29-февралында "Талибан"* террордук уюму менен түзүлгөн тынчтык келишиминин шарты ушундай. Анткен менен Афганистан ислам республикасынын планетадагы террорчулар жана жихадчылардын негизги эл аралык базасына айланып калуу кооптуулугу дале бар.

Пентагон дүрбөлөңгө түшүп кандайдыр бир компенсациялык чараларды ойлоп табууда, америкалык The New York Times басылмасы АКШ "өнөктөштөрү менен биргеликте Тажикстан, Казакстан жана Өзбекстанга күчтөрдү жеткирүүнү талкуулап жатканын" маалымдады.

Тийиштүү эл аралык макулдашуулар кабыл алынса (ишке ашары арсар), мындан ары окуялар кандай нук аларын болжош кыйын деле эмес. Эгер америкалыктар Борбор Азия өлкөлөрүнүн аймагынан Афганистандагы талибдердин жана "Аль-Каида"* отряддарына чабуул коё турган болсо, анда ал жактагы согушкерлер аталган чөлкөмдөгү АКШ жана НАТОнун авиабазалары жайгашкан жерлерге "жихад" уюштурары турулуу иш.

Афган тектүү австралиялык профессор Амин Сайкал 21-апрелде ASPI Strategist сайтында кызыктуу ойлорун жарыялады. "Экинчи дүйнөлүк согуштан кийин Кошмо Штаттар өнүгүп келе жаткан өлкөлөрдө жүргүзгөн дээрлик бардык согуштарда утулду. Бул көрүнүш дүйнөлүк державанын ассиметриялык жаңжалдарды чечүүгө жөндөмсүздүк трагедиясын айгинелейт. Алардын акыркысы – АКШ баштапкы максаттарына жетпей туруп баш тарткан 20 жылга созулган Афганистандагы согуш. Мындай кадамдын Афганистан, чөлкөм жана НАТОнун кадыр-баркына болуп көрбөгөндөй оор кесепетин тийгизерин белгилебей коюуга болбойт", – дейт ал. Чындап эле америкалыктар террорчу-талибдерди тизе бүктүрө алган жок, 2001-жылы убада кылышкандай Афганистанды туруктуу, коопсуз жана өнүккөн демократияга айландыра алышпады. Кудум кезегинде Түштүк Вьетнам менен Иракты калтырышкандай өздөрүнөн кийин талкаланган, ээн өлкөдөн аскердик күчтөрүн чыгарып кетишмекчи.

Профессор Сайкал Кошмо Штаттар жана алардын союздаштары 3502 аскер кызматкеринен ажырап (алардын ичинен 2300ү – америкалыктар), миңдеген жоокерлери жаракат алып, бул согушка 2 триллион доллар сарпталганын эскертти. Афган элинин жоготуулары да алда канча көп, жыйырма жыл аралыгында жай тургундар, аскер жана полиция кызматкерлеринин арасынан набыт болгондордун саны 100 миңден ашкан. Бирок тарыхтан сабак алышпайт өңдөнөт, бүгүн Вашингтон аскердик каражаттары менен Москва жана Пекинди "ооздуктоого" ниеткер.

"Акылга сыйбаган" саясат

РФтин коргоо министри Сергей Шойгунун айтымында, АКШ менен НАТО Россиянын европалык бөлүгүндөгү чек араларга жакын өз күчтөрүн жайгаштырууда. Негизги күчтөр Кара деңиз жана Балтия чөлкөмүнө топтоштурулган, жалпы 40 миң чакты чет элдик жоокер жана 15 миңдин тегерегиндеги курал жана стратегиялык бомбалоочулар менен кошо аскердик техника алып келинген. Мындай жагдайды РФ ТИМ башчысы Сергей Лавров "акылга сыйбаган" саясат деп баалаган.

Окумуштуу жана президент Рональд Рейгандын тышкы иштер маселелери боюнча жардамчысы Дуг Бэндоу 20-апрелде америкалык белдүү басылмалардын бири – The American Spectator журналына: "АКШ "баш-аягы жок" бир нече согушка катышты, бири да өлкөгө экзистенциялык коркунуч туудурган эмес. Касташкан тараптардын бири да жакшы даярдыктан өткөн конвенциялык куралдуу күчү жана кеңири өзөктүк дарамети бар Россиядай олуттуу аскердик держава боло алган эмес" - деп билдирди.

Москва өз чек араларында, постсоветтик мейкиндикте касташкан мамлекеттердин "экзистенциялык" орун алышына эч качан жол бербейт. Россия согуштук коркунучтарды жоюу үчүн майнаптуу инструменттерге ээ. Бүгүнкү күндө Украина менен чек арасында Россия тегин жерден машыгуулар үчүн Россиянын "конвенциялык аскердик бөлүктөрү, атап айтканда 100 000 аскер кызматкери, 1300 танк жана артиллериялык курал, 380 ракеталык орнотмо жана 3700 учкучсуз аппарат тегин жерден топтолбоду". Белгилей кетсек, The American Spectator басылмасындагы айтылгандар көбүртүп-жабыртылса да маңызы так. Россиялык күчтөрдүн жогорку технологиялык куралдары менен болжолдуу жаңжалда Пентагон менен НАТО Украинада катуу жеңилет. Анан калса мындай көрүнүш Афганистандагыдан кыйла тез болуп кетиши мүмкүн. Ал эми "өнөктөштөр" тактикалык өзөктүк куралды пайдалана турган болсо, РФ тараптан гипер үндүү ылдамдыктагы "жооп" алары ажеп эмес. Айтылуу Америка "артыкчылыктарын туура аныктап алганы" оң.

The American Spectator белгилегендей, Түндүк атлантикалык альянстын негизги максаты – кайрымдуулук эмес, коопсуздук. Анда өзөктүк держава менен тиреше турган өлкөлөр болбоого тийиш: "Украинанын айынан өзөктүк держава менен толук чечкиндүүлүк менен кармашууга арзыбайт".

* – бир катар өлкөлөрдө ишмердигине тыюу салынган террордук уюмдар.

214
Белгилер:
тактика, басылма, Россия, Ирак, Афганистан, согуш, НАТО, АКШ
Тема боюнча
"Азиянын жүрөгүн дарылоо". Кыргызстан Афганистанга эмнеге жардам бериши керек
Талибан кыймылынын согушкери. Архив

Афганистан Борбор Азия өлкөлөрүнө "атайын багыттагы күчтөрдүн достугун" сунуштады

185
(жаңыланган 18:17 15.05.2021)
Афганистанда "постамерикалык" тынчтыкты жөнгө салуу процесси атайын инструмент жана опцияларды, анын ичинде күчтү да талап кылары турулуу иш.

Эгерде пикир келишпестиктерди жоюп, бир катар өлкөлөрдүн атайын багыттагы бөлүктөрүнүн каражаттары жана мүмкүнчүлүктөрү ийгиликтүү жуурулушса, Кабулдагы атайын операциялар күчтөрүнүн эл аралык аймактык борборунун долбоору көптү үмүттөндүрөт. Аскерий баяндамачы Александр Хроленко бул жолу аталган долбоордун келечеги тууралуу ой калчаган.

Афганистандан АКШ күчтөрү чыгып жатканда аталган Ислам республикасында талибдер менен куралдуу кагылыш күчөдү. Өкмөттүк армиянын Атайын операциялар корпусунун (ANASOC) командачысы генерал-лейтенант Мохаммад Фарид Ахмади географиялык коңшуларына атайын багыттагы жалпы (эл аралык) базада терроризм менен күрөшүүдөгү ыңгайлуу аракеттерди бириктирүүнү сунуштады.

Мындай инструмент Афганистандын аймагында согушкер-моджахеддердин мизин кайтаруунун майнаптуулугун арттырмак. Ошондой эле Борбордук жана Түштүк Азиянын чектешкен өлкөлөрүнө террордук топтордун жер которушун ооздуктай алмак. Андан тышкары, Атайын операциялар күчтөрүнүн улуттук борборлору кыйла чоң аскердик тажрыйбага ээ болмок.

Генерал Ахмадинин демилгесин жүзөгө ашыруу далай тоскоолго кабылары шексиз, ошентсе да Өзбекстан, Тажикстан, Казакстан жана Кыргызстан куралдуу күчтөрүнүн атайын багыттагы бөлүктөрүн өнүктүрүүгө чоң көңүл бөлүп келгени, анан да олуттуу потенциалга ээ экени белгилүү. Афганистандагы эл аралык долбоорго атайын багыттагы күчтөрү Сирия Араб Республикасында ири тажрыйбай топтогон Россия да кошулуп калышы ыктымал.

Ал ортодо 2020-жылдын 29-февралындагы АКШ менен "Талибандын"* макулдашууларындагы шарттарга ылайык бошотулган 5000 талибдин көпчүлүгү кайрадан согуш талаасына кайтты. Алар америкалыктарды жана анын НАТОдогу союздаштарын өлкөдөн бачымыраак сүрүп чыгарууга белсенишкен.

Талибдер жазгы чабуулдарын улантып, өкмөттүк коопсуздук күчтөргө жана жарандык инфраструктурасынын объектилерине улам кол салууда. Кабулда 8-майда өтө оор террордук акты жасалып, мектептин жанындагы жардыруу өспүрүм курактагы 75 окуучу кыздын өмүрүн алып, 190 киши жараат алды. Андан мурун эле, тагыраак, 1-майда Логар провинциясынын Пули-Алам шаарындагы жардырууда 30 киши каза таап, 90дон ашуун киши (көбүнесе жергиликтүү университеттин абитуриенттери) жарадар болгон.

Кабул провинциясында 12-майдагы Өзбекстандан Афганистанга электр импорттоодо кызмат кылчу электр түркүгүн жардырышты. Ушундай көрүнүш апта ичинде үчүнчү ирет кайталанып отурат.

Афганистандан америкалык күчтөрдү чыгарып кетүү үчүн 100дөн ашуун аскердик-транспорттук учак каттоодо. Бул багытта иш 1-майда башталып, ушул тапта 12 пайызга аткарылды.

Интеграция мүмкүндүгү

Афганистандын улуттук армиясы терроризм менен күрөшүү үчүн маанилүү ресурс болуп саналат. Чөлкөмдөгү туруктуулукту камсыз кылуу үчүн аны АКШ жана НАТО күчтөрү чыгарылгандан кийин да сактап калуу маанилүү.

ANASOC командачысы генерал Ахмади (баса, Россиядагы Рязанск аба-десанттык командалык жогорку окуу жайынын бүтүрүүчүсү) Афганистандын улуттук куралдуу күчтөрүндөгү атайын багыттагы бөлүгүнүн потенциалын өзгөчө белгилейт. Атайын операциялар күчтөрүн негизги мамлекеттик энчиси деп эсептейт. Анткен менен атайын багыттагы бөлүктүн ондогон аскер кызматкерлери согушкерлер тарабынан өлтүрүлгөнү маалым. Болжол менен Борбор Азиядагы чектешкен өлкөлөр Кабулга жарандык согуштун жаңы эпкининде атайын багыттагы өз бөлүктөрү менен олуттуу көмөктөшө алат. Мисалы, Улуу Британияда өткөн бул багыттагы бөлүктөрдүн эл аралык Cambrian patrol-2019 таймашында Өзбекстан Республикасынын Коргоо министрлигинин Атайын операциялар күчтөрүнүн өкүлдөрү жеңип чыккан. Бул тегин жерден эмес. Аталган республика СССРден атайын багыттагы 15-бригаданы мурастап калган. Кезегинде ал СССР убагындагы афган жаңжалында бир топ курчуган. Кийин өзбекстандык атайын багыттагы бөлүк россиялык, америкалык, британиялык, түркиялык, немец, италиялык жана башка кесиптештери менен тажрыйба алмашкан. Өзбекстан менен Россиянын Атайын операциялар күчтөрү биргелешкен окууларды байма-бай өткөрүп келет. РФтин Коргоо министрлигинин курамына 17-десанттык-штурмдук бригадасы, ыкчам чара көрүү бригадасы, Чыгыш аскердик округунун атайын операциялар батальону кирет. Өзбекстандын да Мамлекеттик коопсуздук кызматынын атайын багыттагы бөлүгүнүн да потенциалы кыйла жогору.

Тажикстандын атайын багыттагы күчтөрүнүн негизин мобилдик күчтөрдүн 7-десанттык-штурмдук бригадасы түзөт. Улуттук коопсуздук мамлекеттик комитетинин курамындагы "Альфа" да жана ИИМдин ичиндеги атайын багыттагы өзүнчө бригада да белгилүү. Мындан сырткары, Тажикстанда 201-россиялык аскердик база жайгашкан.

Кыргызстан менен Казакстандын Куралдуу күчтөрүнүн атайын операциялар күчтөрү да өз ара аракеттешип келишет. Тоолуу аймактарда болжолдуу душманды атайын чалгындоо, бөгөттөө жана жок кылуу боюнча машыгышат.

Борбор Азия өлкөлөрүнүн Атайын операциялар күчтөрүн колдонуу чечими эң жогорку деңгээлде кабыл алынат. Афганистанда бир нече мамлекеттин атайын багыттагы бөлүктөрүн жана максаттарын интеграциялоого мүмкүн, бирок ишке ашырылышы коомчулуктун колдоосу менен да арсар.

Аткарылгыс вазийпа

"Атайын багыттагы күчтөрдүн достугунун" идеологу АКШ президентинин атайын өкүлү Залмай Халилзад өңдөнөт. Ал өткөн жумада Кабулдагы республикалык өкмөттү эл аралык колдоону мобилизациялоо максатында Ташкент, Доха (Катардын борбору), Душанбеге барган. Бул шаарлар капыстан тандалганы жок. Доха – талибдер менен сүйлөшүүдө негизги аянтча. Душанбе жана Ташкент – Афганистан менен чектешкен республикалардын баш калаалары.

Анан калса талибдер бир топ жылдардан бери түндүктөгү чек арага жакын провинцияларды көзөмөлгө алууга умтулуп келет. АКШ жана НАТОнун күчтөрү чыгарылган соң бул зоналарды көзөмөлдөө касташкан тараптар үчүн кыйла орчундуу маселеге айланат. Тажикстан менен Өзбекстандын аймагына террордук активдүүлүктүн чагылышы да мүмкүн, "Талибандын"* жана "Ислам мамлекетинин"* катарында бул өлкөлөрдүн жарандары да аз эмес. Халилзаддын вазийпасы аткарылчудайбы?

Тажикстан Афганистан менен 1300 чакырымдан ашуун аралыкта чектешет, бул – КМШнын түштүк чек арасы. Эске салсак, совет мезгилинде тажик-афган чек арасын "жашыл фуражкачан" 25 миң жоокер кайтарган. СССР ыдырагандан тарта 2005-жылга дейре Тажикстан Республикасынын түштүк чек аралары Россиянын 19 миң кишиден турган Чек ара күчтөрүнүн ыкчам тобунун жоопкерчилигинде эле. Кийин алардын ордун 16 миң тажик чек арачы баскан. Маңызы жоокерлердин санында деле эмес. Чек аранын ар бир чакырымын заманбап стандарттарга ылайык жабдуу үчүн 1 млн доллардын тегерегиндеги каражат талап кылынат. Андай суммадагы акча жок, анткен менен чек араны кайтарууга күч менен каражат жетишерлик.

ЖККУнун тутумунда интеграцияланган Тажикстан Коргоо министрлигинин атайын бөлүктөрүн Афганистандын кай бир жеринде Кытай, Пакистан, Иран жана бөлөк өлкөлөрдүн бул багыттагы күчтөрү менен өз ара аракеттешип пайдалануу бүгүнкү күндө мүмкүн эместей туюлат. Маанилүү саясий чечимдер жана алдын ала ири даярдык талап кылынат.

Ташкенттин ЖККУнун чийини боюнча милдеттенмелерге байланышы жок, ошентсе да баары бир жакынкы коңшулары менен аскердик жана аскерий-техникалык кызматташтыкты жамааттык коопсуздук реалдуулуктарын эске алуу менен ийгиликтүү өнүктүрүүдө.

Коргоо жаатында Өзбекстандын саясаты өлкөнүн куралдуу күчтөрүнүн чет жердеги тынчтык орнотуучу операцияларына жана аскердик жаңжалдарга катышпоо принцибине негизделген. Ошону менен бирге эле Өзбекстан – Афганистандагы улуттук кызыкчылыктарды өнүктүрүү стратегиясын кабыл алган Борбор Азиядагы жападан жалгыз өлкө. Ташкент билдиргендей, Афганистан менен Өзбекстандын коопсуздугу – бир бүтүн. Өзбекстан президентинин Афганистан боюнча атайын өкүлүнүн институту да түзүлгөн. Ал чөлкөмдөгү негизги оюнчулар, анын ичинде Россия, Кытай, Иран, АКШ менен өз ара аракеттешет.

Ташкентте быйыл жайда афгандык жөнгө салуу аракети боюнча эл аралык конференция өтөт. Анда Борбор Азия мамлекеттеринин жогорку даражадагы өкүлдөрү чөлкөмдөгү коопсуздук чараларын талкуулашат.

Өзбекстан "постамерикалык" Афганистандын транспорттук жана экономикалык потенциалын кызуу пайдаланууга ниеттенет. Ал үчүн Кабул менен да, талибдер менен да коопсуздук кепилдиктери жөнүндө сүйлөшүүгө даяр. Ташкентте алар афган коомунун бөлүгү деп каралып, юридикалык жактан террорчулар деп эсептелбейт.

Ар бир мамлекет өзүнүн улуттук чектөө жана өзгөчөлүктөрүнө ээ. Азыркы аскердик-саясий реалдуулукта Борбордук жана Түштүк Азиядагы чектеш өлкөлөрдүн өкмөттөрү Афганистандын аймагында жайнаган партизандык түзүмдө менен узакка салгылашууга караганда жеңүүчү (ким болбосун) менен тынч макулдашууга ыктайт.

Пакистан армиясынын башкы командачысы генерал Камар Жавед Бажва 11-майда афган жаңжалын аскердик жол менен чечүү планда жок экенин тастыктады. Кытай 12-майда Борбор Азия өлкөлөрүн Афган Ислам Республикасында тынчтык процессин жайылтууга көмөк көрсөтүүгө үндөдү.

Ошентсе да Кабулда Түштүк жана Борбор Азия өлкөлөрүнүн Атайын операциялар күчтөрүнүн алдыңкы тажрыйбасы жана терроризм менен күрөшүүчү чөлкөмдүк борборун түзүү демилгеси террордук экспансиянын, башкача айтканда, Афганистандын чегинен тыш да "Ислам мамлекетин" кеңейтүү коркунучунан улам жүзөгө ашырылып калышы ыктымал.

* – бир катар өлкөлөрдө тыюу салынган террордук уюмдар.

185
Белгилер:
Пакистан, террорчулук, операция, коопсуздук, саясат, Борбордук Азия, Афганистан
Тема боюнча
ЖМК: АКШ Афганистандан чыгарылган аскер күчүн Борбор Азияга жайгаштырабы?
Адис Түндүк агым - 2 газ түтүгүнүн аймагында иштеп жатат. Архив

Миллиарддаган доллардан кол жууп... "Түндүк агым 2" октябрга чейин бүтөбү

179
Түндүк агым — 2нин" айланасында чуу басылчудай эмес, АКШ Европаны санкция менен коркутууну улантып жатат.

Европа россиялык газга муктаждык бар экенин билип турса да Германияда боло турган шайлоо долбоорго кедергисин тийгизип коюшу мүмкүн болуп турат. Демек, курулушту эртерээк бүтүрүү зарыл. Качан даяр болорун РИА Новости боолголоду.

Шайлоого чейин жетишүү керек

Россиянын Германиядагы элчиси Сергей Нечаев газ түтүгү 26-сентябрга чейин курулуп бүтөрүн айтты. "Күн жылыса ишибиз илгерилейт", — деди ал. Ушу тапта түтүктүн 100 чакырымы калды.

Шайлоодон кийин Бундестагдагы күчтүү позицияны жашылдар ээлеши мүмкүн, булар долбоорду колдобойт. 3-майда NABU (жаратылышты коргоо боюнча бейөкмөт уюм) Гамбургдун административдик сотуна кайрылып, "Түндүк агым — 2" Балтика деңизине зыян келтирерин айтып чыкты.

Анын үстүнө россиялык түтүккө көз карашы түз болгон Ангела Меркель кызматынан кетет. Бийликке ким келери азырынча белгисиз. Долбоор миллиарддаган долларды чапчыганын да унутпайлы.

"Азыр он миллиард долларды суу түбүндө калтырууга даярбызбы деген маселе көтөрүлүп жатат. Чечимди Европа кабыл алат", — деди Нечаев.

Евробиримдикте пикирлер эбак эле бөлүнүп кеткен. Түтүк Германия, Финляндия, Швеция жана Даниянын нейтралдуу сууларынан өтөт. Алгачкы үч өлкө курулушка дароо эле макул болгон. Копенгаген гана каршылык көрсөтүп, бирок акыры уруксат берген. Анткен менен Чехия, Польша, Венгрия, Словакия, Румыния, Хорватия караманча каршы. Украина тууралуу сөз кылып да кереги жок. Эч кимдин транзит өлкө деген макамдан ажырагысы жок.

Санкцияларга карабай

"Түндүк агым — 2нин" эки түтүгүнүн жалпы кубаттуулугу жылына 55 миллиард куб метрди түзөт. Узундугу 1 234 чакырым.

Курулуш 2019-жылдын декабрында токтотулган. Анда америкалык санкциялардан улам түтүктөрдү жаткырган Швейцариянын Allseas компаниясы долбоордон чыгып кеткен. Бир жылдан соң иш жанданганы менен АКШ тоскоолдук жаратуусун токтотпой келет.

Американын 2021-жылга карата бекитилген коргонуу бюджети чектөөлөрдү кеңейтти. Мамдепартамент европалык компанияларды коркутуп-үркүтүүдө. Быйыл февралда долбоордон ЕБдин 18 компаниясы чыгып кетти.

Ошентсе да Европа энергетикалык коопсуздук үчүн долбоордун зарылдыгын түшүнүп турат. Германия муну бир нече ирет далилдеген. 4-майда ГФРдин тышкы иштер министри Хайко Маас Лондондо өткөн "Жетиликтин" ТИМ башчыларынын жыйынында өлкө көмүр жана атомдук энергетикадан баш тарта турганын билдирген. Анын айтымында, мындай аракет энергиянын түгөнбөс түрлөрүнө өтүү үчүн газга болгон муктаждыктын өсүп жатканы менен түшүндүрүлөт.

Бир нече күндөн кийин, 11-майда, "Германия үчүн альтернатива" партиясынын теңтөрагасы Тино Крупалла: "Көз карандысыз мамлекет катары биз башка өлкөлөр менен байланышты бекемдешибиз керек" деп эскертип, газ түтүгүнүн курулушу Германияга да, Россияга да пайдалуу экенин белгилеген.

"Экономика жаатындагы узак мөөнөттүү натыйжалуу кызматташууну АКШ каалагандай көз ирмемде саясий доомат менен бузуп салуу мүмкүн эмес. Бул жөн гана бизнес", — деп эсептейт Россиянын Эл достугу университетинин экономика факультетинин доценти Максим Черняев.

Эми кызыл лента сентябрдын соңу менен кесилери арсар болуп турат.

"Тоскоолдук саясий жана юридикалык жактан эле жаралып жаткан жок. Негизи эле курулуштун темпи өтө жай. 19-апрелден 10-майга чейин 3,1 чакырым төшөлдү. 1-19-апрель аралыгында 6,6 чакырым жаткырылды. Демек, 40 күндө 11,7 чакырым же орточо эсеп менен күнүнө 0,3 чакырым түтүк жаткырылып жатат. Мындай ыргак менен дагы 11 ай керектелет", — деди TeleTrade маалыматтык-аналитикалык борбордун экономисти Марк Гойхман.

Кандай болгон күндө да долбоор токтобой турганына катуу каршы чыгып жаткандар да түшүнүштү окшойт. Жаңы санкциялардан кыйгап өтүү үчүн туунду компанияларды пайдаланууга болот. Албетте, бул көбүрөөк убакытты алат, бирок иш кынтыксыз бүтөрүнөн кабар берет.

179
Белгилер:
курулуш, долбоор, кызматташуу, Германия, Европа, Россия, АКШ, Түндүк агым - 2, түтүк, газ
Тема боюнча
Россия менен АКШ Европа рыногун бөлүшүүдө: газ сактоочу жайларды ким толтурат
Аткаминер. Архив

Эсен Шерботоев "Кыргыз почтасынын" башкы директору болуп дайындалды

0
(жаңыланган 22:54 18.05.2021)
Шерботоев буга чейин өкмөттүн аппаратынын транспорт, курулуш жана байланыш бөлүмүндө эксперт болчу.

БИШКЕК, 18-май — Sputnik. Эсен Шерботоев "Кыргыз почтасы" ишканасынын башкы директору болуп дайындалганын аталган мекемеден билдиришти.

Тиешелүү буйрукка өкмөт башчы Улукбек Марипов кол койгон.

Бүгүн, 18-майда, министрлер кабинетинин төрагасынын орун басары жана санариптик өнүгүү министри Азамат Дыйканбаев Шерботоевди ишкананын жамаатына тааныштырды.

Министр жаңы директорго ийгилик каалап, почтанын ишине олуттуу колдоо көрсөтөрүнө ишене турганын айтты. Ал эми Шерботоев артылган ишеним үчүн ыраазычылык билдирди.

"Учурда байланыш жана коммуникация тармагынын санариптик трансформациялоо багытында динамикалык өзгөрүүлөр болуп жатат. Биргелешкен аракеттер менен почта ишин өркүндөтөбүз", — деди ал.

Шерботоев буга чейин өкмөттүн аппаратынын транспорт, курулуш жана байланыш бөлүмүндө эксперт болчу.

0
Белгилер:
Эсен Шерботоев, жетекчи, "Кыргыз почтасы" мамлекеттик ишканасы
Тема боюнча
"Кумтөрдүн" убактылуу тышкы башкаруучусу жамаатка тааныштырылды. Сүрөт
"Кыргыз почтасы" элди алдамчылардан сак болууга чакырды