Sputnik V вакцинасын чыгаруу. Архивдик сүрөт

Вакциналар согушу: Европа "Спутник V" менен күрөшүүдө

110
(жаңыланган 10:02 08.07.2021)
Франция бийлиги бир катар кесип ээлерине COVID-19га каршы милдеттүү эмделүүнү киргизүүгө ниеттенүүдө. Алардын катарында бардык деңгээлдеги медиктер, карылар үйлөрү жана башка социалдык мекемелердин кызматкерлери да бар.

Милдеттүүлүгү тийиштүү мыйзам актысын кабыл алууну туюндурат, эмдөөдөн баш тартуу мүмкүнчүлүгүн да жөнгө салат. Эгер ынандырарлык жүйөсү болбосо, вакцина албай турган адамга эл менен түз байланышпаган башка жумушка которулуу же акы төлөнбөгөн өргүүгө чыгуу сунушталат. Вакцинацияга РИА Новости баам салган.

Эгер маянанын өлчөмү кичирейсе, аны эч ким компенсациялап бербейт. Ушул сыяктуу эле эрежелер Италияда да бар. Демократиянын нормаларына так шайкеш келтирүүгө аракет кылышканы менен өзгөчө деле майнап жок. Соттор буга окшогон арыздарды анчалык ынтызарлык менен деле карашпайт, ал эми юстиция чечимдерин иштин материалдарын карабастан эле болжоого болот.

"Эгер социум жана коомдун жыргалчылыгы коркунучка тушукса, анда жеке жагдай жана каалоо экинчи орунга жылат". Европа биримдиги ондогон жылдар аралыгында жеке укук жана эркиндиктин маанилүүлүгүнөн шек саналган эмес, бирок пандемия баарын өзгөртүп, коронавирус баарын өз-өз ордуна койгондой. Ким эмне деген күндө да жамааттык абал жеке кызыкчылыктан өйдө турары айкындалды. Пандемияга бет келишкенде бардык деңгээлдеги менеджмент бузулду. Брюсселдик ареопаг жана биримдикке мүчө өлкөлөрдүн бийлиги илдеттин таралышын жапырт эмдөө менен бөгөт коюуну чечишти.

Анткен менен инфекциянын жайылуу ыргагы ушунчалык тез болгонуна, толкун бир жарым жылдан бери каптап турса да жалпы европалык күрөштүн негизги бутасын кымындай да өзгөртө албаптыр.

Вируска каршы күрөш Россия менен тирештин бир эпизодуна, россиялык вакцинанын жасалышы жана сыналышы, анын өндүрүшкө чыгарылышы жана эмдөө кампаниясынын башталышы бул мелдештин баскычтарына айланды. Көздөгөндөрү – коронавируска каршы эң таасирдүү "Спутник V" препаратын начар көрсөтүү жана РФтеги жапырт эмдөөгө жолтоо болуу.

Россияда эмдөө кампаниясы ушунчалык так уюштурулганын мындан билиңиз, Европада жашаган жарандар Sputnik V вакцинасынын эки ченемин алуу үчүн атайын РФке келип кетишти. Эгер Брюсселдин кыртышы сүйбөй турса да Венгрияга "Спутник V" сатып алууга уруксат эткени менен Словакияга макулдук беришпеди.

Ошол эле маалда Россия тарабынан берилген препараттардын документтеринин Дары каражаттар боюнча Европа агенттиги тарабынан жайбаракат каралышынын себептери белгилүү болду. Брюссель өзүнүн бюрократиялык тарабын жана кош стандарттуулукту көрсөттү.

Pfizer/BioNTech жана AstraZeneca вакциналары боюнча тапшырыктар бардык нормаларды бузуу менен тездетилген режимде каралып, "Спутник V" жагдайы бир топ аптага созулду.

Россия өз жарандарынан эмделүүнү өтүнсө, Европа муну "Кремлдин диктатордук адаты" катары сыпаттайт, ал эми Европа биримдигинин өлкөлөрүндө COVID-19га каршы милдеттүү эмдөөнүн киргизилиши жактырылып, кубатталат. Ошентсе да Россия эч нерсеге карабастан, ар бир адамдын өмүрү баа жеткис экенин күн сайын белгилеп келет.

110
Белгилер:
документ, препарат, согуш, Спутник V, вакцина, Европа, Россия
Тема:
Коронавируска каршы эмдөө (202)
Тема боюнча
"Спутник V" вакцинасынын майнаптуулугу жөнүндө Nature жазды
АКШнын аскердик техникасы. Архив

Америкалык аскерлер Россияга жакындоо камылгасын көрүүдө

137
Кошмо Штаттар Жакынкы Чыгыштан улам оолактап барат. Афганистандан аскердик контингентин чыгарды. Ирактагы аскердик миссиясы аяктоодо.

Расмий өкүлдөр терроризм жеңилгенин айтышат. Бирок бул сөздөр болгону саясий көз жазгыруу гана болушу ыктымал. Америкалык жоокерлерди эми кайда жөнөтүшөт? Ирак тынч жашоо кечиреби? Ушул жана башка жагдайларды талдаган Софья Мельничук, Ксения Мельникованын макаласы РИА Новости сайтына жарыяланган.

"Ирак Жакынкы Чыгышта Кошмо Штаттар үчүн абдан маанилүү. Бүт иш чыйырым бою биз анын иштерине тереңден аралашып келдик", — дейт Жо Байден. Анан да Ак үйдө Ирак премьер-министри Мустафа аль-Каземини кабыл алды.

2003-жылы америкалыктар аталган өлкөгө басып киргенде азыркы президент сенатор болчу. Ирактагы согуш аракеттери аяктаганы боюнча Ак үй алгач жолу 2010-жылы жар салган. Байден ал кезде вице-президент эле. Бирок төрт жыл өткөн соң Ислам мамлекетине* каршы "Кебелбес чечкиндүүлүк" операциясы башталган. Эми Жо Байден Ирактагы аскердик миссия аяктаганын расмий түрдө маалымдоодо.

"Биздин Ирактагы ролубуз эми дайым жеткиликтүү болуп, Ирак коопсуздук күчтөрүн окутуп, көмөктөшүүдө", — деп түшүндүрдү АКШ президенти. Кененирээк айтылган жок. Ал тургай Байден декабрга дейре Иракта кайсы күчтөр калары боюнча журналисттердин суроолоруна жооп берген жок.

"Бул ошол убактагы окуяларга жараша болот", — деп тактоого аракет кылды Ак үйдүн спикери Жен Псаки.

Пентагондогулар Кошмо Штаттар "Жакынкы Чыгыштын көйгөйлөрүнө көз жумбастан аларды чечүүнүн башка жолун табууга тийиш" экенин белгилешти. Өлкөгө бир аз аскер калтырышат. Мындан ары көңүлдүн баары "Кытай жана Россиядан "соккон" коркунучтарга бурулат".

Соңку маалыматтар боюнча, Иракта 2,5 миң америкалык аскер бар. Былтыр жыл аягында президент Дональд Трамп контингентти кыскарткан. Багдаддан түндүккө карай 160 чакырым нары жайгашкан Айн аль-Асад жалгыз америкалык базасы бар.

Тобокелдиктер токтоп калган жок

2017-жылы Ислам мамлекетин* жеңгендиги боюнча жарыяланганына карабастан азыр да терактылар токтой элек. Өткөн аптада исламчылар Багдад базарларынын биринин жанындагы автобусту жардырууга жоопкерчиликти алышты. Кеминде эле анда 30 киши набыт болгон.

Америкалыктарга Иран колдоп келген согушкерлер отряддары чабуул коюп келишет. Быйыл март айында Айн аль-Асад базасын ракеталар менен аткылашкан. Бир киши көз жумган. Базага үч айга чукул убакыт мурун жардыргыч тагылган учкучсуз кол салса, июлда ракеталар чабуул коюп, үч киши жараланган.

Мустафа аль-Каземи – Вашингтон үчүн санаалаш премьер-министр. Ал Иранга байланышкан топторду уяткарууга тырышкан. Бирок ошол эле убакта Сирия менен чек аралар боюндагы иранчыл түзүмдөргө урулган америкалык авиациянын соккусун Ирактын суверенитетин бузуу деп сындаган.

Өз кезегинде АКШда өлкөнүн калыптанышында премьердин ийгиликтерин белгилешкен. Июнь айында Багдадга иорданиялык Абдулла II жана Египеттин президенти Абдель Фаттах аль-Сиси келип кетти. Бул киши – 1990-жылдан бери аталган өлкөгө келген биринчи египеттик лидер.

Кошмо Штаттар эл аралык COVAX программасынын алкагында Иракка Pfizer вакцинасынан 500 миң ченем берүүгө да милдеттенме алган. Байден препарат жакынкы жумаларда жеткирилерин билдирген.

Чөлкөмдө илдет илештиргендердин саны артып, ооруканаларды жалын чалмаган учурлар да көбөйдү. Булардан сырткары, Вашингтон парламенттик шайлоого байкоо салуу боюнча БУУнун миссиясына 5,2 миллион доллар бөлмөкчү. Мындай саясий иш-чара улам жылып отуруп, эми быйыл октябрга белгиленген. Эксперттердин пикиринде, шайлоодо азыркы премьер-министр аль-Каземинин мүмкүнчүлүгү дурус эле.

"Саясий көз жазгыруу"

Анткен менен АКШнын Ирактан толук чыгарылышы туурасында кеп жок экенин белгилешет серепчилер. Вашингтон бул маанилүү стратегиялык аянтча үчүн көпкө күрөшүп келгенин айтат саясат таануучу, Эл аралык иштер боюнча россиялык кеңештин эксперти Елена Супонина. Анын оюнда, күчтөрдүн чыгарылышы тууралуу билдирүү "саясий көз жазгыруу". Себеби америкалык шайлоочуларга берилген убадаларды аткаруу абзел.

Ирак коомчулугунун пикири да маанилүү. "Жергиликтүү саясатчылар Мустафа аль-Каземини кысмакка алып келишет. Өлкөдөгү саясий кырдаал жөнөкөй эмес, премьердин орду анчалык бекем эмес", — дейт ал.

"Жети жыл мурун Кошмо Штаттар Иракка кайткан убакта терроризмге жарыяланган согуш реалдуулук болчу. Америкалыктар ИМди* жеңүүдө негизги ролду ойногон. Албетте, алар колдонгон ыкмалар боюнча суроо көп. Маселен, Мосул шаары дээрлик толук талкаланып калды" – деп эске салат чыгыш таануучу жана публицист Андрей Онтиков.

Азыр Ирак бийлиги өзү америкалыктарды чыгып кетүүнү өтүндү. "Дональд Трамп Ирактагы базага учуп келгенде АКШ элчиси аз жерден ирактык премьерге ал жакка барып, президентке кезигүүнү буюргандай эле болгон. Ал баш тартат. Ошол окуя маалымат каражаттарына чыгып, чоң жаңжал болгон, — дейт А.Онтиков. — Ошондон кийин америкалыктар Багдад аэропортуна сокку уруп, Сулейманини өлтүрүшкөн. Америкалык күчтөрдү чыгаруунун зарылдыгы жөнүндө кайрадан айтыла баштаган".

Ошентсе да АКШнын аскер кызматкерлери дароо үйгө кайтары арсар экенин боолголойт Чыгыш таануу боюнча изилдөө борборунун илимий кызматкери Данила Крылов.

"Болду-болбоду адаттагыдай эле бир араб өлкөсүнөн экинчисине, бул учурда Сирияга басым жасалат. Россиянын коргоо министри америкалык аскер кызматкерлери Ирактан Сирияга келип турушканын бир нече ирет кабарлашкан", — деп болжойт эксперт.

Ирактагы штабдарды, топтолгон чалгын маалыматтарын аскердик блоктон дипломатиялык блокко которулары толук ыктымал.

"Америкалыктар дипломатиялык иммунитетти чалгындоо жана башка атайын кызматтар үчүн пайдаланары эбак эле белгилүү", — деп кошумчалайт Крылов.

Кытайга бурулган көңүл

Америкалыктардын көпчүлүгү бөлөк чөлкөмдөргө көңүл бөлбөстөн терроризм менен күрөшкөнчө Ыраакы Чыгышта Кытай күчтөнүп алды деген ойдо. Эми бул – АКШ үчүн негизги кооптуулук, күчтөрдүн баарын ага бурууга туура келет. Бир топ убакыттан тарта Борбордук эмес, Тынч океандык аскердик командачылыкка артыкчылык берилет.

Кытай менен улуу державалык тирештин жаңы доорунун логикасы АКШнын максаттарын кайра баштан карап, кайда кандай басым жасарына акыл калчоого мажбур кыларын белгилейт Москва мамлекеттик эл аралык мамилелер институтунун алдындагы Перспективдүү америкалык изилдөөлөр борборунун директору Максим Сучков.

"Тиреш узакка созулушу мүмкүн, андыктан ресурстарды пайдаланууда ылгоого аргасыз кылат. Жакынкы Чыгыш Вашингтонду көптөн бери опкоолжутуп келген, бирок Обама менен Трамптын ал жакта аскердик жайгашууну оптималдаштыруу аракеттерине Пентагон каршы чыккан", — дейт ал.

Жыйынтыгы анчалык ийгиликтүү экени күмөн. Америкалыктар Иракта өз алдынча коргонууга жөндөмдүү тутумду түзө алышкан жок. Алардын өлкөдөн жыйналып чыгышы менен эле террордук кооптуулук жок болуп кетпейт. Жаңы шарттарда америкалык инструкторлор жана кеңешчилер кантип иштей турганын убакыт көрсөтөт.

*Бир катар өлкөлөрдө тыюу салынган террордук жана экстремисттик уюмдар.

137
Белгилер:
Россия, Америка, Пентагон, Ирак, терроризм
Тема боюнча
Жаңы мунай дүрбөлөңү: Россия кандай пайда көрөт?
Афганистандагы курал менен кишилер. Архив

Талибдер чек арада. ШКУ мамлекеттеринин коргоо министрлери кандай арга табышат?

85
“Талибандын”* отряддары азырынча Кабулду басып алып, Афганистандын мыйзамдуу өкмөтүн жок кыла алышпайт. Бирок чек араларды өз көзөмөлүнө алышы талибдерге өлкөдө экономикалык жана энергетикалык блокада уюштурууга мүмкүндүк берет.

Ислам республикасын мындай жагдай кан төгүлгөн согуштук аракеттерден да катуу кыйратып коё алат.

Шаршембиде Душанбеге Шанхай кызматташтык уюмунун министрлери чогулуп, афган каатчылыгына карата макулдашылган аскердик-саясий жоопту издешти. Бирок чектешкен өлкөлөрдүн ар кандай вектордуу кызыкчылыктары тез жана жөнөкөй чечимдердин кабыл алынышын өбөлгөлөй албайт. Аскерий баяндамачы Александр Хроленко Афганистандагы абалга баам салып, апта ортосунда өткөн Шанхай кызматташтыгы уюмунун тышкы иштер министрлеринин жыйыны тууралуу да токтолгон.

Эгер Афган ислам республикасынын президенти Ашраф Гани отставкага кетсе, талибдер чабуул коюуну токтотууну убада кылып жатышат. Согушкерлердин билип туруп койгон дагы бир шарты – мурдагыдай эле камактагы 7000 тарапташын бошотуу. Афган аралык тынчтык сүйлөшүүлөрүнүн (АКШ жана НАТОнун күчтөрүн чыгаруу үчүн негизги талап) үзгүлтүккө учураганына баам салуу менен “Талибандын”* убадаларына ынангандар аз.

Талибдердин саясий кеңсесинин билдирүүсү “жер бетиндеги” аракеттерден таптакыр бөлөк. Саясий жетекчилик кыймылдын аскердик комиссиясын (башкы штабдын аналогу) көзөмөлдөбөйт. Өткөн эки айда согушкерлер 20 жыл ичиндегиге караганда көп территорияны басып алып, эми Кандагар, Герат, Кундуз өңдүү ири калааларды багындырууга белсенип турат.

Айыгышкыс салгылаш Кабулдан 15 чакырым нары аралыкта жүрүүдө. Эң башкысы, Афганистандын дээрлик бардык чек аралар периметри “Талибандын”* көзөмөлүнө өттү. Бул азыркы өкмөт үчүн абдан оор кабар. Согушкерлер тарабынан электр чубалгылар устундары жардырылгандыктан борбор калаада жарык да өчүрүлө баштады. Чек аралардагы бажы пункттарын да талибдер колго алгандыктан эми азык-түлүк жеткирүүдө да көйгөйлөр чыгышы ыктымал.

Афган аскердик-гуманитардык кырсыгы “Дамоклдин кылычындай” Борбор Азияга кооптуулук туудурууда. Түркмөнстан менен Өзбекстан качкындардын киришин чектеди. Тажикстан менен Кыргызстан азырынча баш паанек издегендерди кабыл алууда. Бириккен Улуттар Уюмунун маалыматына таянсак, Тажикстандагы афган качкындарынын саны дээрлик эки эсеге өсүп, июлдун башында 3000ге жетти. Бул башталышы гана болушу мүмкүн.

Афганистандагы жарандык согуш шартында Борбор Азияга 1996-2001-жылдардагыдай жүз миңдеген качкын агылып, эл аралык терроризмдин экспансиясы (анын ичинде ИМ* жана “Аль-Каида”*) болушу ыктымал.

Шанхай кызматташтык уюмунун Афганистандын түндүгүндөгү кырдаалдын курчушуна тынчсызданууда. 28-июлда Тажикстанда аталган уюмга мүчө Индия, Казакстан, Кытай, Кыргызстан, Пакистан, Россия, Тажикстан, Өзбекстан жана Белоруссия (байкоочу катары) тышкы иштер министрлеринин жолугушуусунан байкалгандай, Афганистан боюнча пикирлер бир кылка эмес.

Өнөктөштөргө кол сунуу

Россия эгер “жихад” Афганистандын чегинен да кеңейип кете турган болсо, Жамааттык коопсуздук келишими уюмуна мүчө өлкөлөрдү коргоого даяр экенин талибдерге эскертип, борбор азиялык мамлекеттердин чек араларынын кол тийбестиги тууралуу убадасын алган.

Эгер кан күйгөн өлкөгө чектеш Тажикстандын коопсуздугуна коркунуч жаралса ага россиялык 201-база көмөк көрсөтөт. Бул туурасында шаршемби күнү Душанбеде РФ коргоо министри Сергей Шойгу билдирди. Анын сөзүндөгү урунттуу учурларга токтололу:

  • Афганистандагы кырдаал бийликтин көзөмөлүнөн чыгып кетти, АКШ менен талибдер ортосунда түзүлгөн келишимдин шарттары аткарылбай жатат;
  • Афганистандагы америкалык миссия максатына жеткен жок, Кошмо Штаттар Борбор Азияда жаңы базаларды ачуу далалатында;
  • Шанхай кызматташтык уюмунун чек араларында абал оор, курчуп кетиши да мүмкүн, чөлкөмдөгү коопсуздукту камсыздоодо ШКУ жана ЖККУнун байланышынын мааниси артууда. Афганистандагы жагдай айрыкча Тажик Республикасынын коопсуздугуна кооптуулук туудурат.

1344 чакырымга созулган тажик-афган чек арасы коргонуунун техникалык каражаттары менен толук камсыздалган эмес. Пянж дайрасынын агымынын өзгөрүшүнөн улам мезгил-мезгили менен редемаркация талап кылынат, географиялык шарттарга жараша түштүктөн террорчулардын кирип кетишине оңой жылчык табылышы ыктымал. Анткен менен бул тилке террорчулардын таасиринин Борбор Азияга жайылышына кеңири эшик ачат дешке болбойт.

Душанбе түштүк чек арасын бекемдөөгө көп аракет кылууда. Мында Тажикстандын ЖККУга мүчө болушу, коңшулардын аскердик жана аскердик-техникалык жардамы маанилүү ролду ойнойт.

Россиялык чек арачылар тажик-афган чек араларын кайтарууга тартылбайт, Тажик Республикасынын аймагында РФтин Федералдык коопсуздук кызматынын чек ара боюнча кеңешчилер тобу гана иштөөдө.

Мурдараак Москва тажик-афган чек арасында жаңы көзөмөл-өткөрүү пунктун жана чек ара заставасын курууга каражат бөлгөн. Ал эми РФ тышкы иштер министри Сергей Лавров: “Жамааттык коопсуздук жөнүндө келишимдин бекемдигин сынап көрүү жана анын мүчөлөрүнүн бирине каршы агрессивдүү аракеттерди баштоо эч кимдин оюна да келбейт деп үмүттөнөбүз”, — деп билдирген.

Ошону менен бирге эле Душанбе афган окуяларынын курчуп кетишине да даяр туруу аракетинде. “Чек ара – 2021” окуулары форматында жалпы мобилизацияга машыгууда, атап айтканда мындай иш-чара 22-июлда запастагы 230 миң аскер кызматкеринин катышуусунда өттү.

1023 зооттолгон техника бирдиги, атайын техниканын 3167 бирдиги, 447 артиллериялык орнотмо, Аскердик-аба күчтөрүнүн 45 учагы жана тик учагы, абадан коргонуунун 234 комплекси кыймылга кирди. Душманды тоготпогондон көрө, күчүн ашыра баалап камылга көргөн оң эмеспи.

Россия, Өзбекстан жана Тажикстандын күчтөрү 5-10-августта Хатлон облусунда болжолдуу душманды жок кылуу боюнча биргелешкен операция өткөрүштү.

Тажикстандын чек арадагы Харб-Майдон полигонундагы окууга 1500 адис жана аскердик техниканын 300 бирдиги тартылып, аталган үч мамлекеттин күчтөрүнүн бириккен тобунун аскердик атайын тактикалык даярдыгын текшерүүдөн башталат. Экинчи баскычында союздаш мамлекеттин аймагына кирген шарттуу бандиттик топторду жок кылуу милдеттери аткарылмакчы.

Ошондон соң күчтөр мамлекеттик чек араны кесип өтүүгө аракет кылган террордук топторду талкалоого машыгышат. Окуунун бардык баскычтарында чалгындоо-ок атуу жана чалгындоо-сокку уруучу комплекстерин колдонуу менен тактикалык аракеттер каралган. Россиялык аскердик контингенттин негизин Тажикстанда жайгашкан россиялык 201-аскердик базанын бөлүктөрү, анын ичинде тоо-таштагы мотоаткычтар, танк, артиллериялык бөлүктөр, ошондой эле Борбордук аскердик округдун атайын багыттагы топтору түзөт. Буга катар ушундай эле окуулар Өзбекстандын территориясында да өтөрү белгиленген.

Айрым эксперттер афган жихадисттери тышкы экспансия үчүн 6 миллиондун тегерегиндеги калкы бар, газ кендерине бай жана Каспий деңизине чыгууга мүмкүнчүлүгү бар Түркмөнстанга багытталышы мүмкүн экенин болжоодо.

Кабулга чет элдик жардам

Афганистанды коңшулары жана өнөктөштөрү тагдырдын оор сыноосунда жалгыз таштап койду дешке болбойт, бирок ар кандай багыттагы таасирлер Афган ислам республикасына талиб жана башка террордук топтор менен күрөшүүдө олуттуу жыйынтыктарга жетүүгө мүмкүндүк бербей жатат.

Афганистандын улуттук аба корпусу талибдер менен күрөштө россиялык өндүрүштөгү Ми-35 аскердик тик учактарын активдүү жана ийгиликтүү пайдаланууда.

РФ куралы афган армиясына оңой менен берилген эмес, буга аскердик багыттагы өз өндүрүмдөрүн сунуштаган АКШ жана НАТОнун бөлөк өлкөлөрү болушунча бут тосушкан.

Альянстын башкы катчысы Йенс Столтенберг 27-июлда Афган ислам республикасынын президенти Ашраф Ганиге каржылоо, жарандык багытта жайгашуу жана афган коопсуздук күчтөрүн өлкө тышында окутуу жолу менен колдоо уланарына убада берди. Бул жакшы, бирок АКШ менен НАТОнун күчтөрүнүн шашылыш түрдө чыгып кетишинен кийин абдан аз жардам. Афгандыктардын Батыштын күчүнө ишеничи биротоло өчтү.

Афган коопсуздук күчтөрүн колдоого Ак үй Конгресстен келерки жылга 3,3 млрд. доллар сураган, анын 2 млрд. доллары афган күчтөрүн техникалык тейлөөгө жана жабдууга, 700 млн. доллары аскер кызматкерлеринин маянасына жумшалууга тийиш. Ал ортодо Кошмо Штаттар Борбор Азия чөлкөмүнөн орун алууга тырышууда. Чектешкен мамлекеттер менен Пентагондун базаларын жана логистикалык борборлорун ачуу жөнүндө сүйлөшүүлөрдү жүргүзүүдө.

Түркия эми талибдерди потенциалдуу душман катары көрөт (себеби алар стамбулдук тынчтык конференциясын үзгүлтүккө учуратып, Анкаранын Кабул аэропортундагы аскердик жайгашуусун сактоо аракетине катуу кабыл алышты).

Ошол эле учурда Түркия Тышкы иштер министрлиги шаршембиде Афганистандан качкын кабыл албай турганын мындайча билдирген: «Түркия Европа биримдигинин чек арачысы же качкындарды жайгаштыруу лагери болбойт».

Кытай “барабардыкты” сактоого умтулат. «Аль-Каида»* жана башка террордук топтордон кол үзүүгө чакырып келет. Пекин чет элдик согушкерлер көп жайгашкан Бадахшандагы кырдаалга олуттуу түрдө тынчсызданууда. Анын алдында эле башында Абдул Гани Барадар молдо турган «Талибандын»* делегациясы Кытай жергесинде КЭР тышкы иштер министри Ван И менен сүйлөшүүлөрдү өткөргөн. Пекин өлкөнүн ички ишине кийлигишпөөнү жана тынч жөнгө салууну убада кылды.

Көптөгөн чет элдик өнөктөштөрү тарабынан «Талибанды»* жана Афганистандагы кырдаалга кыйратуучу таасири бар деп шектелген Исламабад үчүн талибдер менен “оюндардын” аягы жаман бүтүшү да мүмкүн.

The News International басылмасы афган талибдер Пакистандын аймагын транс чек аралык кол салуулар, каражат топтоо, пехотачылар катары жаштарды тартуу жана жарадар болгон согушкерлерди дарылоо үчүн пайдаланышкан.

* – бир катар өлкөлөрдө тыюу салынган террордук топтор.

Аскерий баяндамачы Александр Хроленконун Telegram каналына жазылыңыздар.

85
Белгилер:
Афганистан, 'Талибан' кыймылы, ШКУ, коргоо
Тема:
Афган бийлиги менен талибдердин тиреши
Тема боюнча
Афганистандын дээрлик бардык аймагына коменданттык саат киргизилди
Путин Өзбекстан, Казакстан президенттери менен афган кооптуулугун талкуулады
Жол кырсыгынан талкаланган унаа. Архив

Унаанын таш-талканы чыккан. Боомдогу үрөй учурган жол кырсыктын видеосу

0
(жаңыланган 00:40 31.07.2021)
Жол кырсыгы кечке жуук катталган. Окуяда жапа чеккендер тууралуу маалыматтар айтыла элек. Милициянын Кайгуул кызматы толук маалыматты кийинчерээк берүүнү убадалады.

БИШКЕК, 31-июл. — Sputnik. Боом капчыгайында үрөй учурган жол кырсыгы катталды. Жеринен тартылган видеону “Короче” телеграмм-каналы чыгарды. 

Окуя кечке жуук болгон. Кызыл-кочкул түстөгү Daewoo Nexia үлгүсүндөгү унаа каршы тилкени бөлүп турган бетон тосмого урунган. Жапа чеккендер тууралуу маалыматтар айтыла элек.

Видеодо көрүнүп тургандай, жеңил унаанын таш-талканы чыгып, жараксыз болуп калган.

Кырсык Боом капчыгайынын Ысык-Көл облусунун аймагында болгонун ИИМдин Жол кыймылы коопсуздугун камсыздоо башкы башкармалыгы тастыктап, толугураак маалымат кийинчерээк берилерин билдирди.

0
Белгилер:
жол кырсык, Боом капчыгайы, милиция
Тема:
2021-жылдын башынан бери Кыргызстанда болгон жол кырсыктар
Тема боюнча
Ысык-Көлдө минивен аласалып кетти. Жеринен тартылган видео