Эксперт: ЖОЖдогу аскер кафедраларынан эч пайда жок

Эксперт: ЖОЖдогу аскер кафедраларынан эч пайда жок

48
(жаңыланган 17:04 01.06.2015)
Кыргызстандын Коргоо министрлиги коомдук талкууга ЖОЖдогу аскер кафедраларын жоюу боюнча мыйзам долбоорун алып чыкты. Мекеме өз сунушун аскердик кызмат өтөй турган жарандардын санынын кыскарышы, мобилизациялык ресурстардын туура эмес колдонулушу жана военкоматтарда коррупциялык көрүнүштөрдүн көбөйүшү менен түшүндүрүүдө.

БИШКЕК, 1-июнь — Sputnik. Жогорку окуу жайларындагы аскер кафедраларынын эч кандай пайдасы жок экенин Sputnik агенттигине коопсуздук боюнча эксперт Токтогул Какчекеев билдирди. 

Эксперт министрликтин демилгесин туура деп эсептейт. Анын айтымында, аскер кафедралары түптөлүшүнөн эле элиталык үй-бүлөлөрдүн балдары үчүн негизделген. 

"Министрлик аталган кафедралар Куралдуу күчтөргө эч кандай пайда алып келбесин түшүндү. Ал жакка аскердик кызмат өтөгүсү келбегендер да барат, мындан улам мамлекеттик каражат максатсыз короп жатат", — деп түшүндүрдү эксперт.

Какчекеев взвод жана роталык звенолорду толукточу кадрларды даярдаган аскер институту жана Россиянын аскердик окуу жайларын бүтүрүп келгендер бар экенин кошумчалады.

Эксперт финансылык көз караштан алганда министрлик аскер кафедраларынын жоюлушу менен көп каражат үнөмдөй турганын белгиледи.

"Даярдыктан өткөн жүздөгөн офицерлердин бирөө дагы аскердик кызмат өтөбөсө — алардан кандай пайда болушу мүмкүн? Кадрлар армия үчүн дардалат", — деди Какчекеев.

Министрлик өз сунушун аскердик кызмат өтөй турган жарандардын санынын кыскарышы, чакырылгандардын аскер учетунун төмөн деңгээли, мобилизациялык ресурстардын туура эмес колдонулушу жана военкоматтарда коррупциялык көрүнүштөрдүн көбөйүшү менен түшүндүрүүдө.

Аталган көйгөйлөрдү чечүү үчүн мекеме ЖОЖдогу аскер жана ошондой эле медициналык багыттагы жогорку билим берүү кафедраларын жоюуну сунуштап жатат. Мындан тышкары, "ден соолугуна байланыштуу" себебин жоюу менен альтернативалык кызмат өтөө үчүн негиздемелерди кыскартуу, кыска мөөнөттүү аскер кызматын киргизүү жана алгачкы аскердик жыйындарды алып таштоо демилгеленүүдө.

48
Белгилер:
аскер кафедрасы, Коргоо министрлиги, Токтогул Какчекеев, Кыргызстан
Тема боюнча
Чек ара кызматынын 240 аскери мекенге кызмат өтөө үчүн ант берди
Түптүн аскер комиссариаты альтернативалык кызмат үчүн төлөнгөн акчаны ээлеп алышкан
Жазгы аскердик чакыруу апрель айынан тарта башталат
Пикирлер