БШК талапкерлердин мандаттан баш тартуу боюнча арызын кайра карабайт

БИШКЕК, 19-окт. — Sputnik. Бишкектин Биринчи май райондук соту "Өнүгүү — Прогресс" жана "Республика — Ата-Журт" партияларынын тизмесинен чыгып калган жарандардын арызын канааттандырган жок. Экс-талапкерлер БШКнын аларды тизмеден чыгаруу боюнча токтомун кайрадан карап чыгуусун талап кылып сотко кайрылышкан. Бул тууралуу БШК мүчөсү Рашид Бекбасаров билдирди.

Борбордук шайлоо комиссиясы талапкерлердин арызынын негизинде 130дан ашуун адамды тизмеден чыгаруу чечимин кабыл алган. Жума күнү БШК имаратынын алдында "Республика — Ата-Журт" партиясынын бир нече талапкери митингге чыгышкан. Нааразы болгондор тизмеден чыгуу тууралуу арыз жазбагандарын билдиришкен. БШК төрагасынын орун басары Гүлнара Журабаева талапкерлердин маселесин карап чыгууну убада кылган. 

Бекбасаровдун айтымында, сот бардык арыздарды кароодон баш тартты. Бардыгы болуп сотко тогуз жаран кайрылган. Алар доо арыз менен Жогорку сотко кайрылууга укуктуу.

Кыргызстанда үстүбүздөгү жылдын 4-октябрында парламенттик шайлоо өтөп, анын жыйынтыгы менен Жогорку Кеңешке алты саясий партия келди. Учурда аталган партиялардын тизмесинде өзгөрүүлөр болуп жатат. Айрым талапкерлер депутаттыктан ыктыярдуу баш тартып, тизмеден чыгуу боюнча арыз жазууда.