БШК "Республика — Ата-Журт" партиясынын алты талапкерин тизмеге кайрадан киргизди

Жазылуу
Борбордук шайлоо комиссиясы РАЖ партиясынын айрым депутаттарынын мандаттан баш тартуу боюнча арызын негизсиз деп тапты.

БИШКЕК, 27-окт. — Sputnik. Жогорку сот "Республика — Ата-Журт" партиясынын алты талапкеринин арызы шайлоо күнүнө чейин жазылгандыктан эч кандай күчкө ээ эмес деген чечим чыгарганын БШК мүчөсү Рашид Бекбасаров билдирди.

Буга чейин комиссия аталган талапкерлердин арызынын негизинде аларды тизмеден чыгаруу боюнча чечимге келген. Талапкерлердин айрымдары арыздары жасалма экенин билдирип, сотко кайрылган. 

Жогорку сот: добуштар кайра саналбайт
22-23-октябрь күндөрү Жогорку сот БШКнын "Республика — Ата-Журт" жана "Өнүгүү — Прогресс" партияларынын жети талапкери боюнча чыгарган чечимин жокко чыгарган. 

Жогорку сот "Республика — Ата-Журт" партиясынан талапкер Аида Исмаилова (№20), Закир Шарапов (№67), Жыргалбек Саматов (№17), Курманкул Зулушев (№11), Алиярбек Абжалиев (№19) жана Аида Түмөнбаеваны (№16) тизмеден чыгаруу боюнча чечимди жокко чыгарган. Дагы талапкер Асхат Молдобаевдин (№58) арызы мөөнөтү кечиккенине байланыштуу канааттандырылган эмес. 

"Өнүгүү — Прогресс" партиясынан талапкер Нургазы Айдаровго карата да аны кайра тизмеге киргизүү жөнүндө чечим кабыл алган. 

Бекбасаровдун айтымында, буга чейинки жазылган арыздардын юридикалык күчү жок. Мыйзам боюнча шайлоодон кийин расмий жыйынтык чыккан убакыт аралыгында гана жазылган арыздар мыйзамдуу болуп саналат. Эскерте кетсек, шайлоонун расмий жыйынтыгы 15-октябрь күнү жарыяланган.

"Мындан улам БШК РАЖ партиясынын алты талапкерин кайра тизмеге киргизүүнүн чечти", — деди ал.

Ал эми партиянын юристи Атыр Абдрахматованын айтымында, комиссия талапкерлер боюнча кабыл алган чечимин кайра карап чыгышы керек. 

Ал эми Бекбасаров арыздардын юридикалык күчкө ээ эмес экенин белгилеп, Жогорку соттун чечими өзгөрбөй турганын кошумчалады.

БШК "Өнүгүү — Прогресс" партиясынын талапкерин да тизмеге кайтарды.

Жаңылыктар түрмөгү
0