БИШКЕК, 30-май — Sputnik. Жогорку Кеңеш башкы прокурор Өткүрбек Жамшитовдун мурдагы жетекчи Индира Жолдубаева иштеп турган — 2017-жылда жасалган иштер боюнча берген отчетун канааттандырарлык эмес деп тапты.
93 депутат башкы прокурордун 2017-жылда жасаган иштерин канааттандырарлык эмес деп добуш берген.
Депутаттар Мыктыбек Юсупов менен Талант Мамытов мурдагы башкы прокурор Индира Жолдубаеванын 2017-жылдагы ишин канааттандырарлык эмес, ал эми жаңы башкы прокурордун ишин эске алуу керектигин сунуштап, бул сунуш колдоо тапты.
Буга чейин президент Сооронбай Жээнбеков күч түзүмдөрүнүн жана сот органдарынын коррупцияга каршы күрөшүүдөгү аракеттери боюнча коомчулукта нааразычылыктар бар экенин белгилеген.
Көп өтпөй Башкы прокурор Индира Жолдубаева өзүнө жүктөлгөн милдеттерди тийиштүү түрдө аткарбай жаткандыгына байланыштуу иштен алынган.
Азыркы башкы прокурор Өткүрбек Жамшитов ушул жылдын апрель айынын аягында бул кызматка дайындалган.
