Жогорку Кеңештин депутаты Карамат Орозова. Архив

"Аялдардын саясий билим деңгээли төмөн". Өкмөттүн сөзү депутатты нааразы кылды

(жаңыланган 11:43 07.03.2019)
Карамат Орозова мамлекеттин аткаруу бийлигине аялдар келбегендиктен өлкө кризиске батып, өнүкпөй жатканын белгиледи.

БИШКЕК, 7-мар. — Sputnik. Жогорку Кеңештин депутаты Карамат Орозова Кыргызстандагы мамлекеттик бийлик органдарына — аткаруу бийлигине аялдардын тартылбай жатканына капа экенин, ушундай туура эмес гендердик саясаттан улам мамлекет артка кетип, карызы көбөйүп жатканын парламенттин жалпы жыйынында билдирди.

Ал өз сөзүндө Кыргызстандагы калктын 60 пайыздан ашыгын аялдар түзөрүн, базарлардагы соодагерлердин 90 пайызы аялдар экенин, алар банктан насыя алып бир гана өзүнүн жанын бакпастан, мамлекеттин экономикасынын бир учун тартып жатканын айтты.

"Кризис болуп, тышкы карыз көп деп жатышат. Азыр өлкө аялдардын колдоосуна муктаждыр. Эмне үчүн экономика өспөстөн токтоп калды? Карыз көбөйүп кетти. Кыйынчылыкка чыдаган аялдар аткаруу бийлигинде жок калды. Ошондуктан биз ушундай абалга келип калдык. Сөзүм куру болбосу үчүн мисал келтирейин, Кыргызстандын жети облусу болсо, ошонун биринде да аял жетекчи жок. Кырк район болсо, бир да аял аким жок. 35 шаар болсо, бир да аял мэр жок, 453 айыл өкмөтү болсо, бир да аял жетекчи жок. Аялзаты кызматты сиздерден талашкан жок, бийликти силерге берип коюп өлкөнүн абалы кандай болуп жатат?" — деп суроо салды депутат.

Орозова ошондой эле гендердик тең салмактуулуктун сакталышы боюнча өкмөттүн маалыматын укканын, өкмөттүн аялзатына айткан сөзү аябай капа кылганын белгиледи. Себеби өкмөт "аялдарды саясий билим деңгээли төмөндүгүнөн кызматка албай жатканын" айткан.

"Ошол эле кезде Мамлекеттик кадр кызматы конкурска катышып өткөндөрдүн 80 пайызын аялдар түзөт деп жатат. Конкурс менен келгенде аялдар билимдүү, саясий кызматка келгенде алардын билими төмөн деген бул өтө орой мамиле", — деди депутат.

Орозова ошондой эле аялдарды мамлекеттик кызматка тартуу керектигин жана анын жол-жобосун да иштеп чыгуу зарылдыгын кошумчалады.

Белгилер:
Жогорку Кеңеш, аялдар, Карамат Орозова
Тема боюнча
Кыргызстандыктар аптасына канча саат иштей турганы белгилүү болду
Ишкер айым: адам бир кызматта 6-7 жыл отурса деградация болот
АКШнын президенти Жо Байден. Архив

Путинге Байден менен жолугуунун эмне зарылчылыгы бар

(жаңыланган 20:02 19.04.2021)
Ансыз да олку-солку болуп турган Россия-Америка мамилелери акыркы айда өзүнчө эле театрга, вашингтондук актёрлор койгон оюнга айланып кетти.

Алгач Байден Путинди "жан алгыч" деп атады, андан соң "Россиянын Украинаны басып алуу кооптуулугун" күчөткөн Байден Путинге чалып жакын арада жолугушууну сунуштады да эртеси жаңы санкциялар тууралуу жарлыкка кол койду. Андан кийин ЖМК алдына чыгып, "Россия менен чырдашууну каалабай турганын", АКШ чогуу иштешүүгө кызыкдар экенин, бул үчүн жай айларында Путин менен жолугушуу ниети бар экенин айтты. Көшөгө.

Кырдаалга РИА Новости абай салды.

Ушу тапта Байдендин жаңылганын да тамашалоо орунсуз болуп калды. Бирок Вашингтондогулар Россиянын айласын таппай, улам бир ыкманы пайдаланып жатат деп да айта албайсың. Жок, Ак үйдө максатын так түшүнгөн, Россия боюнча көрчү аракеттери айкын адамдар отурат. Буга мүмкүнчүлүгү жетиштүүбү, америкалык кызыкчылыктын көз карашынан алып караганда канчалык туура стратегия? Жок, дарамети жетпейт. Муну түшүнүү Кремль үчүн стратегиялык планда маанилүү, ал эми азыр тактикалык планда башка нерсе кызык болуп турат: Путин болуп жаткан окуяларга кандай мамиле жасашы керек? Же Байден менен жолугушууга барышы керекпи?

Бир караганда сүйлөшүү россиялыктарга караганда америкалыктар үчүн зарыл сыяктуу эле. Мындан улам Байден оң-тескери кадамдары менен Путинди жолугушууга мажбурлап жатат деген да сөз болгон. Демек, ою менен болуп сүйлөшүүлөргө барбай, тыным алып туруу керек деген кептер айтылган болчу.

Америкалыктар чындап эле моюн толгогондорду жаман көрөт, өздөрү да сүйлөшүүгө көп бара беришпейт. Кээде мындай аракет акталып калат, Иран менен Түндүк Кореянын мисалы буга далил. Пхеньян АКШнын кезектеги жосунсуз аракетинен соң бир жылдан бери америкалыктар менен байланышка чыкпай келет. Коронавирус боюнча чектөөлөрдөн улам деп айтууга болбойт. Ирандыктар да түз байланыштан бир нече ирет баш тартты, керек болсо жогорку деңгээлдеги сүйлөшүүлөргө макул болбой жүрөт. Бул ошол өлкөлөрдүн, алардын АКШ менен болгон алакасынан алып караганда туура, татыктуу кадам. Россиянын масштабы да, контексти да такыр бөлөк.

Кеп Путиндин биринчи болуп жолугушууну сунуштаганында деле эмес. Эскерте кетсек, РФ лидери АКШ президентинин чуулуу сөзүнөн кийин түз эфирде дебат форматында жолугууну демилгелеген. Путин өлкөнүн кызыкчылыгы үчүн ким менен болсо да сүйлөшүүгө даяр. Россиянын кызыкчылыгы эмнеде? Санкцияларды жумшартуу боюнча Америка менен келишүүбү? Же Жакынкы Чыгыш, Афганистандагы көйгөйлөр, Ирандын өзөктүк келишими, Түндүк Кореянын ракеталык-өзөктүк программасы сыяктуу аймактык маселелер боюнча тил табышуубу? Украинабы?

Жок, мунун баары локалдык көйгөй. Канчалык маанилүү болсо да бул маселелер Байден менен жолугушууга себеп болуп бере албайт. Мында адамдык кызыкчылык баарынан жогору турат: кантсе да Путин үчүн Байден бешинчи президент, экөө мындан он жыл мурун жолуккан жайы бар. РФ лидери ал кезде Байдендин инсандыгын анализдөөгө жакшы мүмкүнчүлүк алган, ошентсе да дүйнөлүк аренада иштөө үчүн адамдын кандай экенин көбүрөөк билүү эч качан ашыктык кылбайт эмеспи.

Россиянын геосаясий стратегиясы, тышкы саясий оюну — мына ушул нерсе жолугушуунун кызыгын арттырууда. Россия XXI кылымдын дүйнөлүк системасын калыптандырууга катышуу ниетин билдирип тим болбостон бул жаатта жигердүү иш алып барууда. Америкалыктардай болбой, дүйнө үчүн таптакыр жаңы каркас түзүү менен алек. Ооба, Кытай менен иштешип жатат, анткени кызыкчылыктар дал келүүдө. Ооба, АКШга тыкыр баам салып, убагында жооп берип жатат, анткени америкалыктардын дүйнөнү деконструкциялоо аракети бардык ревизионисттик күчтөрдүн маанилүү маселесине айланып кетти.

Байден Россия АКШнын ишине кийлигишип жатат деп туура айтты. Кийлигишип жатат, бирок шайлоосуна эмес. Муну айтып, талашып-тартышуу бекер, "вашингтондун сазын" байырлагандар үчүн бул ички да, тышкы да саясатынын элементине айланып кеткен. Керек болсо "шайлоого кийлигиштирип" АКШ Россияны таасири күч держава катары сыпаттап койду.

Ооба, Россия кийлигишип, "АКШнын кызыкчылыктарын кыйратууда", болгону бул жерде алардын глобалдуу кызыкчылыгы, өзүн "эге" сезип алган текеберлиги тууралуу сөз болууда. Кошмо Штаттардын лидер аталууга күчү, дарамети жетпей калды. Материалдык жактан Америкадан алда канча алсыз болуп турган Россиянын орчундуу артыкчылыгы бар.

Өлкө тарыхтын туура багыты менен баратат, башкача айтканда, стратегиялык жактан аныкталып-такталган глобалдуу архитектура менен өнүгүүнүн тенденцияларына таянып өз тактикасын курууда. Россия учурда өзгөрүүлөрдүн лидери. Бул жагынан алып караганда Байден болобу, Камала Харрис болобу, кайсы лидер менен болсо да жолугушуунун зарылдыгы бар.

Белгилер:
сүйлөшүүлөр, жолугушуу, санкциялар, Владимир Путин, Жо Байден, АКШ, Россия
Тема боюнча
Байден Путиндин фамилиясын туура эмес айтып алды
Саламаттык сактоо жана социалдык өнүктүрүү министри Алымкадыр Бейшеналиев. Архив

ЖКнын тармактык комитети министр Бейшеналиевди иштен алуу чечимин кабыл алды

(жаңыланган 16:50 19.04.2021)
Комитеттин отурумунда Акаев министр уу коргошунду алып чыгып өлкөнү бүт дүйнөгө уят кылганын белгиледи.

БИШКЕК, 19-апр. — Sputnik. Жогорку Кеңештин социалдык маселелер, билим берүү жана саламаттык сактоо боюнча комитети саламаттык сактоо жана социалдык өнүктүрүү министри Алымкадыр Бейшеналиевге ишеним көрсөтпөө чечимин кабыл алды.

Отурумда депутат Жанар Акаев министр уу коргошунду алып чыгып өлкөнү бүт дүйнөгө уят кылганын айтты.

"Бул министрдин эң чоң катасы, азыр табыпчылык күчөп баштайт. Муну далилдей албайт. Адам жакшы болуп кетсе уу коргошундан айыкты, өлсө коронавирустан деп коюшат. Элдин саламаттыгын коркунучка кептөөдө. Анын үстүнө эки жумадан бери комитеттин жыйындарына келбей жатат. Биз бүгүн премьер-министрге мындай министрди кызматтан алып, анын ордуна сабаттуу адисти дайындоого сунуш беришибиз керек", — деди Акаев.

Кыргызстандын президенти Садыр Жапаров
© Пресс-служба президента КР / Султан Досалиев
Натыйжада сунушту комитеттин мүчөлөрү бир добуштан колдоп, ишеним көрсөтпөө чечими өкмөт башчыга жиберилмей болду.

Белгилей кетсек, саламаттык сактоо министри Алымкадыр Бейшеналиев коронавирусту уу коргошун менен дарылоону сунуштады. Бул дары чөптү президент Садыр Жапаров өзү кайнатып жасап жатканы белгилүү болду. Президент менен министрдин дарылоо ыкмасы коомчулукту таң калтырып, түрдүү пикирлерди жаратууда.

Белгилер:
министр, комитет, чечим, ишеним, Алымкадыр Бейшеналиев
Тема:
Уу коргошун чуусу
Тема боюнча
Уу коргошун ичкендерден кагаз жүзүндө уруксат алган эмеспиз. Министрдин маеги
Дозасын президент гана билет. Министрдин уу коргошун боюнча маалыматы видеодо
Акониттин кайнатмасы мамлекеттик резиденцияда жасалат. Видео
Россиянын 11 аскер адамы Кыргызстандын президенти Садыр Жапаровдун энчилүү кол сааты менен сыйланды

Россиянын 11 аскер адамы КР президентинин энчилүү кол сааты менен сыйланды

(жаңыланган 23:29 19.04.2021)
Россия Федерациясынын Коргоо министрлигинин № 20022 аскер бөлүмүнүн кызматкерлери "Коопсуздук — 2021" аскердик машыгууларына катышкан.

БИШКЕК, 19-апр.— Sputnik. Россиянын 11 аскер адамы Кыргызстандын президенти Садыр Жапаровдун энчилүү кол сааты менен сыйланды. Бул тууралуу өлкө башчынын маалымат кызматы кабарлады.

Церемония вручения именных часов президента Кыргызстана Садыра Жапарова 11 российским военнослужащим на авиабазе Кант
© Пресс-служба президента КР
Россиянын 11 аскер адамы Кыргызстандын президенти Садыр Жапаровдун энчилүү кол сааты менен сыйланды

Россия Федерациясынын Коргоо министрлигинин № 20022 аскер бөлүмүнүн кызматкерлери "Коопсуздук — 2021" аскердик машыгууларына катышкан.

Саат тапшыруу аземи "Кант" авиабазасында болуп, анда Кыргызстандын Коргоо министрлигинин жетекчилиги жана Коопсуздук кеңешинин катчылыгынын кызматкерлери болгон.

Машыгууга эки миңге жакын адам катышып, 100гө жакын автомобиль, сооттолгон жана атайын техника, 20га чейинки артиллериялык система, ошондой эле 10дой авиациялык техника тартылган. 

Белгилер:
сыйлык, Садыр Жапаров, президент, Аскер, саат, Россия, Кыргызстан
Тема боюнча
Элди эвакуациялап, Төрткүлдү кайтарышат. Кыргызстандагы машыгуунун видеосу