БИШКЕК, 20-мар. — Sputnik. Президент Сооронбай Жээнбеков Казакстандын жаңы өлкө башчысы Касым-Жомарт Токаевди президенттик кызматка киришүүсү менен куттуктады. Бул тууралуу мамлекет жетекчисинин маалымат кызматы билдирди.
Ал эми бүгүн, 20-март күнү, Токаев парламентте ант берип, президенттик кызматына киришти.
Жээнбеков Кыргызстан менен Казакстандын ортосундагы стратегиялык өнөктөштүк, достук мамиле улана берерине ишеним артты.
"Союздаштык жана ынак коңшулук мамиле биздин биргелешкен күч-аракетибиз менен элдерибиздин байгерчилиги жана өнүгүүсү үчүн мындан ары да бекемделе берет деп терең ишенем. Учурдан пайдаланып, урматтуу Касым-Жомарт Кемелевич, Сизге бекем ден соолук, бакубатчылык жана мамлекеттик ишмердүүлүгүңүзгө ийгиликтерди, ал эми боордош Казакстан элине тынчтыкты жана гүлдөп-өсүүнү каалайм", — деп айтылат куттуктоодо.
Касым-Жомарт Токаев тууралуу кененирээк маалыматты Sputnik Кыргызстан даярдаган материалдан алсаңыз болот.
