Премьер-министр КР Мухаммедкалый Абылгазиев на заседании Жогорку Кенеша о рассмотрении отчета деятельности Правительства за 2018 год

Өкмөт ишкерлердин жасаганын өзүнө ыйгарып алдыбы? Отчетуна саресеп

439
(жаңыланган 12:16 26.04.2019)
Премьер-министр Мухаммедкалый Абылгазиев өкмөттүн 2018-жылы жасаган иштери боюнча Жогорку Кеңеште эки күн — 24-25-апрелде отчет берди. Анын отчетун бир катар депутаттар колдосо, айрымдары сынга алды.

Абылгазиев өз отчетунда Кыргызстан былтыр бир нече жакшы көрсөткүчтөргө жетишип, айрым тармактарда артыкчылык көрсөтүп алдыга кеткенин айтып, эл өкүлдөрүн ишендирүүгө аракет кылды.

Атап айтсак, "Бизнести жүргүзүү" индекси боюнча Кыргызстан 190 мамлекеттин ичинен 70-орунга чыгып, жети позицияга жакшырган. Коррупцияны кабылдоо индексинде 180 өлкөнүн ичинен 132-орунга чыгып, үч позицияга көтөрүлгөн.

Маанилүү индекстердин бири болгон Экономикалык эркиндик индексинде 180 өлкөнүн ичинен 79-орунду камсыздаган. Глобалдуу атаандаштыкка жөндөмдүүлүк индексинде Кыргызстандын абалы өткөн жылга караганда беш позицияга жакшырды. Өкмөт башчы бул индекс Кыргызстандын экономикасынын макроэкономикалык туруктуулугун жана өкмөттүн 2018-жылдагы ишин баалоодогу негизги көрсөткүчтөрдүн бири болуп саналарын баса белгиледи.

Бирок депутат Мирлан Жээнчороев өкмөттүн бул берген отчету реалдуулуктан бир кыйла эле алыс экенин жана азыркы өкмөт ага чейин иштеп кеткендердин эмгегин "биз жасадык" деп өздөрүнө ыйгарып алганын айтты. Андан сырткары, депутат эл аралык рейтингдердин жыйынтыгы азыркылардын эмес, мурдагы өкмөттүн аракеттери болгонун белгиледи.

Өз кезегинде Мухаммедкалый Абылгазиев эл аралык рейтингдерди алар чыгарбай турганын, аны атайын эл аралык институттар чыгарарына токтолду.

Премьер-министр КР Мухаммедкалый Абылгазиев на заседании Жогорку Кенеша о рассмотрении отчета деятельности Правительства за 2018 год
© Фото / пресс-служба ЖК
Премьер-министр Мухаммедкалый Абылгазиев

"Бүткүл дүйнөлүк банк макроэкономикалык жана башка экономикалык көрсөткүчтөрдү алып, өздөрүнүн баалоо методикалары аркылуу чыгарат. Биз өзүбүз чыгарып, өзүбүзгө баа койгон жокпуз", — деди ал.

Өкмөт башчынын ишендиришинче, алар 2017-жылга салыштырмалуу былтыр бюджеттин көрсөткүчүн бир кыйла жакшыртышкан.

Сурамжылоо

Өкмөттүн 2018-жылы жасаган ишине кандай баа бересиз?
  • Жакшы. Жашоо оңоло түштү
    10.2% (9)
  • Эч нерсе сезген жокмун. Эл өзү менен өзү
    39.8% (35)
  • Начар. Бир да жылыш жок
    39.8% (35)
  • Оңолгон да жокпуз, начарлаган да жокпуз
    6.8% (6)
  • Өкмөт эмне кыла алмак эле?
    3.4% (3)
Добуш бергендер: 88
"2017-жыл менен 2018-жылдын бюджетин салыштырып көрүңүз, башка жактан жардам албай, мүлктү сатпай 13 миллиард сом өзүбүздүн экономиканын эсебинен толтурулду. Буга чейин мынчалык топтолгон эмес. 2017-жылдын бюджетинде 14 миллиард сом "разовый платеж" менен келген. Эгер аны 2017-жылдын бюджетинен алып салсак, 121 миллиард гана сом калат. Ал эми биздики 135 миллиард сом болду. Башкача айтканда, биз 13 миллиард сомду өзүбүздүн аракет менен топтоп ишке ашырдык", — деди Абылгазиев.

Депутат Жээнчороев премьердин бул берген жообуна канааттанбай, 2018-жылдагы экономикалык жылыштар 2017-жылы кабыл алынган мыйзамдардын аркасы менен жетишилгенине токтолду.

Эл өкүлүнүн: "Сиздердин курам 2018-жылы 20-апрелде дайындалган. Андыктан силердин рейтингдерди жакшыртууга салымыңар барбы?" - деген суроосуна өкмөт башчы: "Өкмөттүн ишине жалпысынан баа берилип, жыйынтык чыгарылып жатат",- деп жооп берди.

Азыркы өкмөттү мажирөө деп баалагандардын арасында "Ата Мекен" фракциясынын депутаттары да бар. Фракция лидери Алмамбет Шыкмаматов өкмөттүн очетуна эмне үчүн баа бербегенин мындайча түшүндүрдү.

Депутат ЖК 6 созыва Алмамбет Шыкмаматов от фракции Ата-Мекен. Архивное фото
© Sputnik / Табылды Кадырбеков
"Ата Мекен" фракциясынын лидери Алмамбет Шыкмаматов

"Садык Шер-Нияз, Каныбек Иманалиев жана Наталья Никитенко фракциянын пикирин айтты. Тагыраагы, биздин фракция терс баа берди. Ток этер жерин айта турган болсок, отчетте Казакстан, Кытай менен мамилебиз жакшырды деп жазылып турат. Эми ушул өкмөттүн айта турган сөзүбү? Биз казактар менен миңдеген жылдардан бери эле эки бир туугандай мамиледебиз. Бул өкмөттүн эрдиги эмес да, ошону "биз жасадык" деп жазып алышыптыр. Жыйынтыктап айтканда, биз бул өкмөттү мажирөө деп эсептейбиз", — деди Шыкмаматов.

"Ата Мекен" фракциясынын дагы бир депутаты Садык Шер-Нияз өкмөт өлкөнүн маданият тармагына такыр көңүл бурбай калганын айтып, сынга алды. Анткени премьер өз отчетунда маданият тармагына жасалган иштерди алты сап менен гана жазганы белгиленди.

Эл өкүлү ошондой эле акыркы 25 жылда Кыргызстанда үч гана нерсе абдан жакшы жакка коюлганына токтолуп, алар президенттик шайлоо, премьер-министрди шайлоо жана парламентти шайлоо экенин белгиледи.

Шер-Нияз өкмөт руханий нерсеге көңүл бурбай жатканын да айтты.

Депутат Садык Шер-Нияз на заседании Жогорку Кенеша о рассмотрении отчета деятельности Правительства за 2018 год
© Фото / пресс-служба ЖК
ЖК депутаты Садык Шер-Нияз

"Чыңгыз Айтматов менен Алыкул Осмоновдун мекенинде оозго ала турчу бир жазуучу же акын жок. Муратбек Рыскуловдун мекенинде бир театр жылдызы жок. Карап көрүңүз акыбалын! Маданият өкүлдөрүн өстүрүш үчүн 15-20 миллион карап коюш керек эле го...", — деди Садык Шер-Нияз.

Өкмөттүн отчетуна ичи чыкпагандардын бири жана ага жалгыз каршы добуш берген депутат Исхак Масалиев өкмөт жеке ишкерлер жасаган иштерди өздөрүнө ыйгарып алганын айтты.

Депутат ЖК VI созыва Исхак Масалиев от партии Кыргызстан на заседании
© Фото / пресс-служба Жогорку Кенеша
Депутат Исхак Масалиев

"Бул туура эмес да... Жеке ишкерлердин жасагандарын өздөрүнө жазып жатат. Бирөө завод куруп берсе, анын өкмөттүн ишмердүүлүгүнө кандай тиешеси бар? Ал жеке ишкердин иши да. Өкмөттүн ишмердүүлүгүн карап жатканда анын курамы, түзүмү кандай болду, кандай чечимдерди кабыл алды, ал чечимдер канчалык деңгээлде ишке ашты, кандай ийгиликке алып келди деген маселелерди карап, өкмөт ошол боюнча маалымат бериши керек болчу", — деди ал.

Масалиев ички карыз боюнча да толук маалымат жазылбаганын белгиледи.

"Жөнөкөй мисал менен айтсак, ички карызыбыз жылына 120 миллион долларга көбөйүп жатат. Бул деген өкмөт коммерциялык банктардан карызга акча алып башка карыздарды жаап жатат дегенди түшүндүрөт. Карыз көбөйүп жатат. Карызга акча алып маселе чечкен бул өкмөттүн ишмердүүлүгүнө кирбейт. Эгерде өкмөт киреше булактарын таап, ишканалардын иштөөсүнө шарт түзүп берип, анан алардан акча түшсө гана бюджет көбөйөт. Качан гана бизде өндүрүлгөн товар чет жакка сатылып киреше түшсө, ошондо экономика өнүктү деп айтсак болот", — деди эл өкүлү.

Айтылган мындай сын-пикирлерге карабай, өкмөттүн эки күнгө созулган отчетун Жогорку Кеңеш дээрлик бир добуштан колдоп берди (101 депутат "макул" деп добуш берди). Жалгыз гана Исхак Масалиев "каршы" деген добушун берди.

Андан сырткары, "Ата Мекен" фракциясынын эки депутаты — Эмил Токтошев менен Искандер Гаипкулов отчетту колдосо, калган 9 депутат эч кандай баасын берген жок.

439
Белгилер:
Мухаммедкалый Абылгазиев, Алмамбет Шыкмаматов, Исхак Масалиев, Жогорку Кеңеш, отчет
Тема боюнча
Өкмөттүн ишине бир депутаттын ичи чыкпай калды. Ал ким?
Өкмөт башчынын Кыргызстанга келген туристтердин саны боюнча күмөнү бар
Сиэтлдагы Жордж Флойддун өлүмүнө каршы чыккан протестке катышкан кыз. Архивдик сүрөт

АКШнын алдан тайышы: балдар полициядан коркуп жана жек көрүүнү үйрөнүп жатышат

78
(жаңыланган 17:39 05.06.2020)
Америка өзүн өзү жек көрүүнүн, өзүн өзү жок кылуунун жолуна түшкөндөй. Эмки маселе аны токтото алаар-албасында. Эгер жаш муунду полициядан коркууга, аны жек көрүүгө тарбиялоону уланта турган болсо токтой алары, албетте, күмөн дейт россиялык журналист Ирина Алкснис.

Жорж Флойддун өлүмүнөн улам чыккан башаламандыктын жайылып жаткан маалында, расизмге каршы чыккандар Лондондо британия премьеринин резиденциясын басып алууга аракет кылып жаткан учурда коом карманган дагы бир эреже кыйрап түштү. Ал жаш муунду саясий тирешке аралыштырууга жол бербөө эле.

Мындан чечкиндүү кадамды бизнес таштады.

Балдардын популярдуу Nickelodeon берүүсүн токтотуп, 8 мүнөт 46 секунд бою (дал ушунча убакыт полиция кызматкери Флойдду басып турган) кара экрандан "Дем ала албай жатам" деген фразаны жаңыртып турду. Роликтин аягында жарандык укукту коргоо боюнча уюмдардын бирине кошулууга чакырык ташталган.

Каршылык кыймылына калктын кара түстүү катмары менен тилектештигин билдирип Lego корпорациясы да кошулду. Компания полиция участоктору, өрт өчүрүү бөлүмдөрү, патрулдук автоунаалар, полиция кызматкерлеринин фигуралары жана башка укук коргоо тематикасына үндөш элементтер бар конструкторлорун жарнамалоодон баш тартты.

Батыштын жаш муунга жасаган мындай мыкаачы эксперименттери азыр эч кимди деле таң калтырбайт. Мунун баары батыш коомчулугунун бөлүп-жарылуусунун белгиси. Ошентсе да буга чейин саясий жүрүштөргө балдар тартыла элек эле.

Либералдар менен консерваторлор жаш муунга таасир тийгизүүчү күчкө ээ болуу максатында катуу тирешип келишкен, бирок алар үчүн балдардын мыйзам сыйлаган жаран болуп өсүп чыгуусу биринчи кезектеги нерсе болчу.

Дал ушундай нукта ой жүгүртүү АКШга жарандарын ымыркай кезинен тарта тарбиялоонун натыйжалуу системасын түзүүгө негиз болуп берген. Канча деген жылдардан бери Американын жетишкендиктерине басым жасалып, жаманы жашырылып, улуттук биримдик жашап келген.

Полициянын мыкаачылыгына башка мамлекеттерде деле күбө болуп жүрөбүз. Бирок укук коргоо институттары мамлекеттин таянычы жана анын маанилүү элементи болуп саналат, андыктан жай турмушта бир дагы америкалык саясатчы же коомдук-саясий күч полицияны уяткарып, абийирин төгө алмак эмес. Адатта бир же бир нече окуянын мисалында бүтүндөй системага көө жабуу туура эмес экени баса белгиленип келет. Ал эми ачыкталып калган кемчилик башкы нерсени, башкача айтканда, кызматкерлеринин көбү чын ниети менен аткарган полициянын милдетин, ишин жокко чыгарбашы кажет эле.

Мындай тартип бир эле АКШда эмес, дүйнө жүзүнүн баарында бар.

Ал эми балдарды реалдуулуктун көңүл чөктүргөн көрүнүштөрүнөн эки эселеп саксактоо зарыл, алардын күч түзүмдөрү тууралуу ою, ишеними, мейли ал биздин "менин милициям мени коргойт" дегенби, же америкалык "кызмат кылып жана коргоп" деген ураанынын алдында болобу, позитивдүү болушу шарт. Чоңойгон сайын ал турмуштун ак-карасын өзү ылгап алат.

Nickelodeon менен Lego компанияларынын кылган-эткени бул маселеде да кескин өзгөрүүлөр болуп жатканын көрсөттү.

Дээрлик тогуз мүнөткө жеткен ролик балдардын көңүлүн расизмге деле бурбайт. Мындай жүрөк үшүн алган видео тек гана "америка полициясы адам өлтүрүүдө" деген нерсени сиңирип жатат. Мындан улам баланын мээсине укук коргоо органдарынан коркуш керек деген ой калыптанат. Ал эми бала кездеги коркуу чоңойгондо жек көрүүгө, кыйратуучулукка айланат эмеспи.

Бирок мамлекет аны коргоп, коопсуздукту камсыздаган структураларсыз дээрлик жашай албайт. Мамлекеттик механизмдин маанилүү делген бөлүгүн олуттуу кабыл албоого тарбиялоо келечекте жагымсыз көрүнүштөрдү шарттай турганы айкын.

АКШда азыркы болуп жаткан саясий тиреш Американын жалпы системасына кооптуулук жарата турганын жалкоо киши эле сөз кылган жок. Анткени анын катышуучулары өлкө таянган, оор учурлардан кабагым-кашым дебей чыгып кетүүгө негиз болгон жөнөкөй эрежелерди сактоодон баш тартып жатышат. Трамп менен каршылашкан атаандаштары ага бир катар институттарды, башкаруу сфераларын  байлап, бул аракети менен мамлекеттин өзүнө сокку урууда. Ал эми ири медиаресурс ээлери жаңы муунду ошол эле нукта тарбиялап жатышы тармактагы абалдын өтө эле курч экенин айгинелейт.

Америка өзүн өзү жек көрүүнүн, өзүн өзү жок кылуунун жолуна түшкөндөй. Эмки маселе анын токтой алаар-албасында. Эгер жаш муунду полициядан коркууга, аны жек көрүүгө тарбиялоону уланта турган болсо токтой алары, албетте, күмөн.

78
Белгилер:
бийлик, бала, коркуу, полиция, башаламандык, АКШ
Тема:
АКШда афроамерикалыктын өлүмүнөн кийинки башаламандык
Тема боюнча
Нью-Йоркто акцияга чыккандар камалууда. Видео
Кайрадан орустар. АКШдагы козголоңго Москваны айыптоо кимге зарыл?
Россия ТИМинин расмий өкүлү Мария Захарова. Архивдик сүрөт

Захарова РФтин Жакынкы Чыгыштагы ролу боюнча АКШнын билдирүүсүнө жооп берди

46
(жаңыланган 15:26 05.06.2020)
Расмий өкүл бул маселе боюнча комментарий берип жатып, Вашингтондун аталган аймактагы саясатынын жыйынтыктарын эстеп коюуну айтты.

БИШКЕК, 5-июн. — Sputnik. Россия ТИМинин расмий өкүлү Мария Захарова АКШнын мамлекеттик катчысынын жардамчысы Дэвид Шенкердин Россияга карата айткан "Жакынкы Чыгыштан чыгып кетсин" деген сөзүнө жооп берди. Бул тууралуу РИА Новости жазды.

Расмий өкүл бул маселе боюнча комментарий берип жатып, Вашингтондун аталган аймактагы саясатынын жыйынтыктарын эстеп коюуну айтты.

"Акыркы 20 жылда Жакынкы Чыгыштагы америкалык кайсы долбоорлор ийгиликтүү болгондугун тактап коюу ашыктык кылбайт. Шенкер кайсыларын жогорудагыдай деп эсептейт болду экен? Эмнегедир эстей албай жатабыз. Кыйылган өмүрлөр менен талкаланган учурлар гана эске түшөт экен", — деп айтып берген ал РИА Новостиге.

Россия 2015-жылдан тарта Сирия бийлигине террорчулук менен күрөшүүдө, өлкөнүн калыбына келишине аскердик жана бир топ башка жардамдарды берип келет. Ал эми АКШнын күчтөрү аталган өлкөдө расмий бийликтин уруксатысыз жайгашкан.

46
Белгилер:
Мария Захарова, ТИМ, Жакынкы Чыгыш, Сирия, АКШ, Россия
Тема боюнча
Россияга Сирияда аскердик базаларын кеңейтүүнүн зарылдыгы кандай?
COVID-19 вируска каршы дары таблеткалары. Архив

Россияда коронавируска каршы вакцина кийинки жумада чыгып, акысыз берилет

0
(жаңыланган 23:52 05.06.2020)
Бул —  коронавируска каршы чыгарылган Россиядагы алгачкы, ал эми дүйнөдө экинчи болуп катталган дары экени айтылат.

БИШКЕК, 5-июн. — Sputnik. Коронавируска каршы "Авифавир" препараты Россияда Милдеттүү медициналык камсыздандыруунун алкагында бекер берилет. Бул тууралуу Россиянын түз инвестициялар фондунун башчысы Кирилл Дмитриев президент Владимир Путин менен жолукканда айтканын Кремлдин сайты маалымдады.

Дмитриев "Авифавир" коронавируска каршы чыгарылган Россиядагы алгачкы, ал эми дүйнөдө экинчи болуп катталган дары экенин билдирген.

"Ал 11-июндан тарта Россиянын клиникаларына келип түшөт. Ал россиялыктарга Милдеттүү медициналык камсыздандыруу программасы боюнча бекер берилет", — деп айткан Дмитриев.

Маалыматта мындай вакцинадан жылына 700 миң даана чыгаруу пландалганын, бирок суроо-талап көп болуп, башка 10 өлкөдөн да сурам келип жатканын белгилеген. Мындан улам санын эки миллионго чейин жеткирүү пландалган.

0
Белгилер:
Россия, дарылоо, вакцина, коронавирус
Тема:
Кытайдагы жаңы типтеги коронавирус
Тема боюнча
Россия: коронавируска каршы чыгарылган бир вакцина баарына жарай бербейт
Коронавируска каршы Япония чыгарган вакцина июлда сынактан өтөт