БИШКЕК, 9-авг. — Sputnik. Президент Сооронбай Жээнбеков Чолпон-Ата шаарында Россия өкмөт башчысы Дмитрий Медведев менен жолукканын өлкө башчынын маалымат кызматы билдирди.
Эске салсак, Медведев Кыргызстанга Евразиялык өкмөттөр аралык кеңештин жыйынына катышуу үчүн келген.
Жээнбеков өз сөзүндө премьер-министр кезинде Дмитрий Медведев менен сүйлөшүүлөр жана жолугушуулар жылуу маанайда эсте калганын белгиледи.
"Мен ар дайым сиздин колдооңузду сезчүмүн. Кыргызстанда сизди соода-экономикалык жана маданий-гуманитардык өнүгүүгө кыйла салым кошкон чыныгы дос катары билишет", — деди президент.
Ал Владимир Путиндин үстүбүздөгү жылдын март айында Кыргызстанга болгон мамлекеттик визити ийгиликтүү өткөнүн белгиледи.
Өз кезегинде Медведев Кыргызстанга, анын бермети болгон Ысык-Көлгө дагы бир жолу келүү мүмкүнчүлүгүнө ээ болгонуна кубанычта экенин билдирди.
Ал Россия президенти Владимир Путиндин саламын жолдоп, Кыргызстанга келер алдында эки мамлекеттин ортосундагы мамилелери боюнча маселелерди талкуулашканын кошумчалады.
"Бүгүнкү жолугушуу дагы өлкөлөрүбүздүн ортосундагы ар тараптуу өнөктөштүктүн өнүгүүсүнө өз салымын кошот деп ишенем. Ар дайым эки тараптуу дагы, көп тараптуу дагы форматтарда талкуулай турчу маселелер көп. Ысык-Көлдүн эң сонун маанайы да буга жардам берет деп ишенем", — деди премьер.
Жээнбеков Медведев экөө соода-экономикалык кызматташуунун келечегин, Путиндин Кыргызстанга мамлекеттик визитинин алкагындагы жетишилген макулдашууларды ишке ашырууну талкуулашты. Мындан тышкары, 2020-жылды Россияда Кыргызстандын, ал эми Кыргызстанда Россиянын кайчылаш жылы деп жарыялоонун алкагында иш-чараларды уюштуруу жана өткөрүү маселелери тууралуу сөз болду.
