Вид на жилые дома в приграничном с Таджикистаном селе Максат Лейлекского района Баткенской области с высоты птичьего полета. Архивное фото

Оңой болгон жок. Кыргыз-тажик өкмөттөрүнүн сүйлөшүүсүнүн жыйынтыгы

6524
(жаңыланган 12:40 20.09.2019)
Маалыматта тараптардын кырдаалдын курчушуна жол бербөө үчүн болгон күч-аракетин жумшагандыгы айтылган.

БИШКЕК, 20-сен. — Sputnik. Кыргызстан менен Тажикстан чек ара боюнча сүйлөшүүлөрдүн жыйынтыгында бир катар макулдашууларга келгенин вице-премьер Жеңиш Разаков билдирди. Бул туурасында өкмөттүн маалымат кызматы кабарлады.

Ал эки өлкөнүн премьер-министрлери Мухаммедкалый Абылгазиев менен Кохир Расулзоданын макулдашуусунун негизинде эки өлкөнүн вице-премьерлери башында турган өкмөттүк делегациялар узакка созулган сүйлөшүүлөрдү жүргүзгөнүн айткан.

Анда чек аранын кыргыз-тажик тилкесиндеги чыр-чатактарды басаңдатуу үчүн бирдиктүү чараларды кабыл алуудагы маселелерди чечүү талкууланган.

"Оңой эмес, бирок конструктивдүү диалог болду. Тараптар кырдаалдын курчушуна жол бербөө үчүн болгон күч-аракетин жумшады. Тажик тарап менен бир катар макулдашууларга жетиштик. Эки мамлекеттин тең чек ара аймактарынан аскердик техника менен аскерлерди чыгарып кетүү боюнча чечим кабыл алынды. Тараптар чек арадагы такталбаган тилкелерде курулуш иштерин жүргүзүүнү токтотууну макулдашты", — деген Разаков.

Кыргызстан менен Тажикстандын премьер-министрлеринин тапшырмасы менен чек араны делимитациялоо жана демаркациялоо боюнча өкмөттүк делегациялар чек ара маселелерин чечүү боюнча ишти күчөтөрү маалымдалган.

Учурда мамлекеттик чек аранын кыргыз-тажик тилкесинде бардык беш көзөмөл-өткөрүү бекеттери, анын ичинде "Кулунду" жайы кадимки калыбында иштеп жатканы айтылган.

"Чек арада кырдаал туруктуу, Максат айылынын эвакуацияланган тургундары өз үйлөрүнө кайтты, эки өлкөнүн укук коргоо органдарынын өкүлдөрү чек арага жакын жайгашкан аймактарды биргелешип күзөтүүдө", — деген вице-премьер.

Кыргыз-тажик чек арасындагы кырдаал өкмөттүн өзгөчө көзөмөлүндө болуп, эки өлкөнүн жергиликтүү бийлик органдары чек ара аймактарындагы чыңалууну жоюу максатында элге түшүндүрүү иштерин жүргүзүп жатканы айтылды.

Белгилей кетсек, 16-сентябрь күнү кечке жуук кыргыз-тажик чек арасында чыр чыгып, коңшу өлкөнүн чек арачылары Лейлек районундагы Максат жана Сай бекеттерине ок аткан. Анын кесепетинен атайын даярдыктагы бир аскер курман болуп, 13 киши жарадар болгон. Алардын ону Бишкектеги Травматология жана ортопедия борборуна алып келинсе, үчөө Лейлектеги ооруканада калган.

Ал эми Тажикстан тараптан чек ара чырында үч киши каза болгондугу туурасында маалыматтар берилген.

КРдин Мамлекеттик чек ара кызматы чыр Тажикстан тараптын такталбаган чек ара тилкесине, тагыраагы, Баткен районунун Жака-Өрүк аймагына курулуш баштагандыгынан келип чыккандыгы тастыктаган.

Ал эми 18-сентябрдын кечинде тажикстандыктар чырга себепкер болгон курулушту токтоткону белгилүү болду.

6524
Белгилер:
Максат, Лейлек району, Баткен облусу, Тажикстан, Кыргызстан
Тема:
Максат жана Сай чек ара бекеттерине атылган ок (40)
Тема боюнча
Кыргыз-тажик чек арасында жарадар болгон 8 кишиге операция жасалды
Чек ара кызматынын жетекчиси Шаршеев чыр курулуштан чыкканын тастыктады
Парламентте Чек ара кызматын Баткенге көчүрүү сунушталды