Атамбаевдин тергөө абагындагы мөөнөтү узартылды

© Sputnik / Табылды КадырбековМурдагы президент Алмазбек Атамбаев. Архив
Мурдагы президент Алмазбек Атамбаев. Архив - Sputnik Кыргызстан
Жазылуу
Соттун көчмө жыйыны Улуттук коопсуздук мамлекеттик комитетинде өтүп, мурдагы президенттин баш коргоо чарасы тандалды.

БИШКЕК, 14-янв. — Sputnik. Мурдагы президент Алмазбек Атамбаевдин тергөө абагындагы мөөнөтү 15-мартка чейин узартылды. Бул тууралуу анын адвокаты Замир Жоошев билдирди.

Жактоочунун айтымында, бүгүн, 14-январда, УКМКнын тергөө абагында кримтөбөл Азиз Батукаевдин мыйзамсыз бошотулушу боюнча Биринчи май райондук соттун көчмө жыйыны болду.

“Биз сотко Жазык-процессуалдык кодексинин беренелерине ылайык, ишмердүүлүгүн токтоткон президенттин кармалышы мүмкүн эместигин белгиледик. Мындан сырткары, Атамбаевдин ден соолугу жайында эмес экенин эскертип, баш коргоо чарасын өзгөртүүнү сурандык”, — деди Жоошев.

Натыйжада сот мурдагы президенттин абактагы мөөнөтүн эки айга узартуу чечимин чыгарган.

Алмазбек Атамбаев өткөн жылдын 8-августунда күч түзүмдөрү тарабынан кармалып, УКМКга алып келинген.

Батукаевдин иши

Заседание Высшего Евразийского экономического совета на уровне глав государств (ВЕЭС) - Sputnik Кыргызстан
Президент Жээнбеков: Атамбаевдин тагдырына жүрөгүм ооруйт
Азиз Батукаев 2006-жылы баңгизатты мыйзамсыз сактоо, жарылуучу заттарды жана курал-жаракты мыйзамсыз алып жүрүү, массалык башаламандык уюштуруу боюнча айыпталып, 16 жылга эркинен ажыратылган. 2008-жылы абак тартибин бузганы үчүн жаза мөөнөтүнө дагы эки жыл кошулуп, Нарындын №24 абагына которулган. Бирок 2013-жылдын 9-апрелинде оор дартка кабылганына байланыштуу бошотулуп, Грозныйга учуп кеткен.

2014-жылдын 20-майында КР Жаза аткаруу мамлекеттик кызматы Батукаевге эл аралык издөө жарыялаган. ИИМдин маалыматы боюнча, учурда Батукаев курал-жарак сактаганы үчүн үч жылга эркинен ажыратылып, Чечен Республикасында жаза мөөнөтүн өтөп жатат.

2019-жылы апрелде Азиз Батукаевдин иши кайра жанданды. Анын бошотулушу боюнча бир катар мурдагы аткаминерлер менен дарыгерлер да суракка чакырылып, кээси камалган. Ал эми мурунку башкы прокурор Аида Салянова, ошол кездеги вице-премьер Шамил Атаханов жана саламаттык сактоо министри Динара Сагынбаева, мурунку башкы прокурор Индира Жолдубаева тергөө менен кызматташууга макул болуп үй камагына чыгарылган.

Жаңылыктар түрмөгү
0