Премьер-министрлик кызматтагы Садыр Жапаров

Жогорку Кеңеш Садыр Жапаровду өкмөт башчылыкка бекитти

(жаңыланган 13:37 14.10.2020)
Эске салсак, буга чейин дагы парламент Садыр Жапаровду премьер-министр кылып бекитип берген. Бирок жыйынга эл өкүлдөрүнүн баары катышпай, кворум болбой калган.

БИШКЕК,14-окт. — Sputnik. Жогорку Кеңештин депутаттары Садыр Жапаровду Кыргызстандын премьер-министри кылып бекитип беришти. Бул тууралуу Sputnik Кыргызстандын кабарчысы жеринен билдирди.

Белгилей кетсек, ушул тапта "Ала-Арча" мамлекеттик резиденциясында Жогорку Кеңештин депутаттарынын кезексиз жыйыны өтүп жатат. Бул жыйындын күн тартибине өкмөттүн курамын дайындоо маселеси коюлган.

Эске салсак, буга чейин дагы парламент Садыр Жапаровду премьер-министр кылып бекитип берген. Бирок жыйынга эл өкүлдөрүнүн баары катышпай, кворум болбой калган. Кийинчерээк өлкө башчы Сооронбай Жээнбеков Садыр Жапаровду премьер-министрликке бекитүү боюнча токтомду артка кайтарган.

Канат Исаев Жогорку Кеңештин төрагасы болуп шайланды

Бишкек шаарында 5-октябрда Жогорку Кеңешке болгон парламенттик шайлоонун жыйынтыгына нааразы болгон жарандардын толкундоосу жаралып, кечке "Ала-Тоо" аянтында турган. Ал эми кечинде аларды күч органдары кууп таратууга аракет кылган. Көп өтпөй эл кайрадан "Ала-Тоо" аянтына келип, андан соң Ак үйдү басып алган. Кийин мурдагы президент Алмазбек Атамбаевди, Садыр Жапаровду жана бир катар саясатчыларды абактан бошотуп алган.

6-октябрда БШК шайлоонун жыйынтыгын жокко чыгарган. Кечинде парламент премьер-министрликке Садыр Жапаровдун талапкерлигин жактырган. Бирок эртеси айрым депутаттар анын бекитилиши мыйзамсыз болгонун айтып, Жогорку Кеңеш кайрадан кезексиз жыйынга чогулган.

Белгилер:
кызмат, өкмөт башчы, Жогорку Кеңеш, Садыр Жапаров
Тема:
Парламенттик шайлоодон кийинки окуялар (470)
Тема боюнча
Баары мыйзам менен чечилет. Жээнбеков элге кайрылуу жасады
Газ сактоочу станция. Архив

Россия менен АКШ Европа рыногун бөлүшүүдө: газ сактоочу жайларды ким толтурат

(жаңыланган 18:31 12.04.2021)
Евробиримдиктин өзүндө деле россиялык долбоорго каршы чыкчулар бар. Мисалы, Чехия, Польша, Венгрия, Словакия, Румыния, Хорватия транзит менен жан багат.

Узакка созулган каардуу кыш Европанын газ сактоочу жайларын аңгыратып бош калтырды. Жалпы запастын үчтөн бир бөлүгү калганы айтылууда. Америкалыктар абалдан пайдаланып, ири көлөмдө суюлтулган газ сунуштап жатышат. Бирок коронавирус каатчылыгы океандын ары жагынан келчү энергетикалык ресурска Европанын чамасын чак кылып турат. Демек, россиялык сырье алууга аргасыз. Алыскы чет өлкөгө газ экспорттоодон "Газпром" менен мамлекеттик бюджет канча пайда көрөрүнө РИА Новости сереп салып көрдү.

Европанын айласын кетирген суук

Күз менен кышта европалыктар он жылга жете турган 65 миллиард куб метр газды пайдаланып коюшту. Бул тууралуу GasInfrastructureEurope басылмасына таянып "Газпром" кабарлады. Буга чейинки мындай жогорку чек 2018-жылы катталган, дал ошол жылдын февраль-март айларында Европада катуу суук болуп, кар калың түшкөн.

Табият быйыл да "тамашасын" тартуулады. "Газпром" январда суук түшкөн Европага жөнөтүлчү газдын көлөмүн көбөйтүүгө аргасыз болду. Германияга адаттагыдан 32,4 пайызга көбүрөөк кетсе, Францияга — 77,3, Нидерланддарга 21,2, ал эми Италияга 100 пайызга көп жеткирилген.

Мындан тышкары, Азияга да экспорт өстү. Натыйжада рынокто дефицит жаралып, споттук баа кескин жогорулап кетти. Токтоосуз жеткирилчү товарлар, баалуу кагаздар же валюта дал ушул баа менен сатылат.

Мисалы, Азияда нарк миң куб үчүн миң долларлык чектен ашып кеткен учурлар болду. Айрым келишимдер 1400 доллардан түзүлүп жатты. Европада 300 долларлык да баа кездешти. "Газпромдун" бюджетинде 2021-жылга баа 170 доллардан каралганын белгилей кетели.

Натыйжада алыскы чет өлкөгө россиялык экспорт 19,5 миллиард куб метрге чейин өстү. Бул бир жыл мурункуга караганда 46 пайызга көп көрсөткүч.

Февраль да анча жылуу болгон жок. Үч күн удаасы менен Европанын газ сактоочу жайлары суткасына миллиард куб метрден ашуун газ берип турушту.

Сууктун мизи кайтып калган 25-мартта аталган жайлардагы газдын көлөмү болгону 29 пайызга чамалап барды. Германия менен Австрияда — 26, Нидерланддарда — 23, Францияда — 17 пайызга жетти.

Кийинки кышта тоңуп өлбөш үчүн европалыктар былтыркы жылга караганда 57,3 пайызга көбүрөөк (24 миллиард куб метр) газ камдап алышы кажет. Бул "Газпромдун" эсеби. Мындай көлөм 2020-жылы Франция менен Нидерланддарга жөнөтүлгөн көрсөткүчкө тете. Быйылкы газ сактоочу жайларды толтуруу өнөктүгү 2011-жылдан берки масштабдуу иш-чарага айланат деп болжолдогондор арбын.

Россия газына альтернатива

Россиялык сырьёнун Европа рыногундагы үлүшү 2020-жылы 33 пайызды түзгөнүн "Газпром экспорт" компаниясынын башкы директору Елена Бурмистрова билдирди. Анын айтымында, "экспорттун көлөмү үчүнчү кварталдан баштап эле кризиске чейинки көрсөткүчкө жеткен, кээде андан да ашып кетип жатты". Импортерлордун алдындагы милдеттердин баары толугу менен аткарылган. Ал эми жыл аягында келишим баалары Европа хабдарындагы спорттук баадан кыйла төмөн болуп чыкты. Бул кошумча жеткирүүлөрдү шарттаган.

Европага Россиядан тышкары көгүлтүр от Норвегия, Катар, Алжир, АКШ жана Нигериядан келет. Башкы пайдалануучулар — Германия, Улуу Британия жана Италия. Немецтер менен британиялыктар россиялык газды "Түндүк агым" аркылуу алат. Башка вариант жок. Албетте, суюлтулган газга өтүп кетсе болот, бирок ал кымбат турат. Мындан тышкары, атайын терминалдар керек, андай терминал Германияда жок. Суюлтулган газ ал жакка Бельгия жана Нидерланддар аркылуу жеткирилет.

Италия менен Улуу Британияда терминал бар, бирок алар деле түтүк менен келчү газдан азырынча баш тарткысы жок. Мындан улам россиялык газды сатып алып жаткан мамлекеттер АКШнын "Түндүк агым-2ге" каршы күрөшүн колдобойт. Атургай Германия америкалыктардын суюлтулган газын алчу терминалдын курулушун каржылап берүүгө да даяр экенин билдирген. Эптеп эле АКШ "Түндүк агым-2ни" жайына коюп койсо, бирок Вашингтон айтканынан кайтпай турат.

Бирок Евробиримдиктин өзүндө деле россиялык долбоорго каршы чыкчулар бар. Мисалы, Чехия, Польша, Венгрия, Словакия, Румыния, Хорватия транзит менен жан багат. Варшава 2022-жылдан тарта россиялык газы жок эле оокат кыла турганын жар салган. Польшалыктар Түндүк деңизиндеги норвегиялык шельфке жакын курулуп жаткан Baltic Pipe түтүгүнө үмүт артууда. Калганы океандан ары жагынан келчү суюлтулган газга ишенип турат.

Америкалыктар өзгөчө Азияда суроо-талап азайган маалда Европанын газ сактоочу жайларын толтуруп берүүгө куштар эле болмок. Мартта ЕС алардан 11 миллиард куб метр газ сатып алган, бул январь менен февралдагы көрсөткүчө караганда эки эсеге көп көлөм. АКШ Батыш Европаны 30 пайызга газ менен камсыздады. Ушу тапта деңиз менен океандарда америкалык суюлтулган газ жүктөлгөн 70 танкер жүрөт.

Европанын кампасын ким толтурат

Кандай болгон күндө да азырынча кризис күчүндө, ал эми суюлтулган газ түтүк менен келчү көгүлтүр оттон кымбат. Мындан тышкары, "Газпромдун" атаандаштарынан айырмаланып өндүрүштү да, бир суткада жеткирилчү көлөмдү да жогорулатууга дарамети жетет. Компаниянын Европада өзүнө таандык кампалары бар.

Ал эми Батыш Европа дагы деле приоритеттүү багыт, анткени "Түндүк агымдын" өзүн өзү актоосу азырынча суроо жаратып келет. Мындай пикирин Плеханов атындагы Россия экономикалык университетинин доценти Александр Тимофеев билдирди. "Узакка созулган кыш жакшы суроо-талапты шарттады. Суроо-талап кампалардын толтурулушуна караганда тезирээк өсүшү мүмкүн, бул өз кезегинде күзгө жуук баанын өсүшүнө алып келет", — деди маектеш.

Кыскасы, газдын баасы жылуулуктун келиши менен төмөндөп кеткен жок. Азыр нидерланддык TTF хабында спотто газдын миң куб метри 252 доллардан бааланууда, бул 2018-жылдан берки эң жогорку чек.

Жыйынтыгында "Газпромдун" алыскы чет өлкөлөргө газ сатуудан көргөн пайдасы быйыл 1,7 эсеге, башкача айктанда, 42 миллиард долларга чейин жогорулайт деди VYGON Consulting. Мамлекеттик бюджеттин бир бучкагын чоюп кеткенге жарайт.

Белгилер:
Түндүк агым - 2, экспорт, АКШ, Европа, альтернатива, Россия, газ
Тема боюнча
Эки тоонун чөбүн эңсеп... АКШ россиялык мунайды рекорддук көлөмдө сатып алды
 Жогорку Кеңештин депутаты Кубанычбек Жумалиев. Архив

Депутат Кубанычбек Жумалиев бюджетке 1 млрд. сом төлөдү

(жаңыланган 18:14 12.04.2021)
Депутат мүлкүн мамлекетке өз ыктыяры менен өткөрүп берген. Эми тергөө Жумалиевдин баш коргоо чарасын өзгөртүүнү өтүнүп сотко кайрылды.

БИШКЕК, 12-апр. — Sputnik. Жогорку Кеңештин депутаты Кубанычбек Жумалиев бюджетке бир миллиард сом которду. Бул тууралуу УКМКдан билдиришти.

Маалыматка караганда, Жумалиев жалпы суммасы бир миллиард сомдон ашык акчага бааланган коммерциялык активдерди жана кыймылсыз мүлктү мамлекетке өткөрүп берди.

"Тергөө Жумалиевдин жаш курагын жана ден соолугун эске алуу менен сыртка чыкпоо жөнүндөгү тил каттын негизинде баш коргоо чарасын өзгөртүү өтүнүчү менен Биринчи май райондук сотуна кайрылды", — дешти УКМКдан.

Эске салсак, Жумалиев коррупцияга шектелип кармалып, Биринчи май райондук сотуна алып келинген. Сот анын баш коргоо чарасын тандап, эки айга камакка алган. Ал эми УКМК депутат эмнеге кармалганын түшүндүрүп берген.

Буга чейин УКМКнын төрагасы Камчыбек Ташиев журналисттерге берген маалымат жыйын учурунда кайсы бир аткаминер мамлекетке бир миллиард сом которуп жатканын айткан, бирок ким экенин ачыктаган эмес.

Белгилер:
коррупция, депутат, УКМК, Кыргызстан
Тема боюнча
Прокуратура Жумалиевдин балдарын кайра камоо боюнча сотко сунуш берди
Ташиев депутат Жумалиевди УКМК кармаганда эмне дегенин айтып берди
Биринчи вице-премьер-министр Артем Новиков

Новиков адам уурдоодо ыкчам реакция кылуу алгоритмин иштеп чыгууну сунуштады

(жаңыланган 23:46 12.04.2021)
Новиковдун айтымында, бул кадам милициянын ыкчам иш алып баруусуна шарт түзүп, бюрократияны жоюуга жардам берет.

БИШКЕК, 12-апр. — Sputnik. Биринчи вице-премьер Артём Новиков адам уурдоо фактысы катталган учурда “Коопсуз шаардын” камералары менен издөө боюнча алгоритм иштеп чыгууну сунуштады. Бул тууралуу өкмөттүн маалымат кызматынан билдиришти.

  • Первый вице-премьер-министр КР Артем Новиков на совещании по вопросу насилия в отношении женщин и детей. 12 апреля 2021 года
    Биринчи вице-премьер Артём Новиков адам уурдоо фактысы катталган учурда “Коопсуз шаардын” камералары менен издөө боюнча алгоритм иштеп чыгууну сунуштады
    © Пресс-служба правительства / Алишер Алиев
  • Первый вице-премьер-министр КР Артем Новиков на совещании по вопросу насилия в отношении женщин и детей. 12 апреля 2021 года
    Новиковдун айтымында, бул кадам милициянын ыкчам иш алып баруусуна шарт түзүп, бюрократияны жоюуга жардам берет
    © Пресс-служба правительства / Алишер Алиев
1 / 2
© Пресс-служба правительства / Алишер Алиев
Биринчи вице-премьер Артём Новиков адам уурдоо фактысы катталган учурда “Коопсуз шаардын” камералары менен издөө боюнча алгоритм иштеп чыгууну сунуштады

Новиковдун айтымында, бул кадам милициянын ыкчам иш алып баруусуна шарт түзүп, бюрократияны жоюуга жардам берет.

Ал аялдар менен балдарга карата зордук-зомбулукту алдын алуу маселелери боюнча кеңешме өткөрдү.

"Айзаданын (Канатбекова — ред.) трагедиялуу окуясы баарыбыздын жүрөгүбүздү оорутту. Тилекке каршы, бул жалгыз гана мисал эмес. Акыркы кезде жаңылыктардан мектеп окуучуларынын урушу, аялдардын кордолушу, жашы жете электердин зордукталышы тууралуу гана окуп калдык. Бүгүн биз бул нерселерди алдын алуу үчүн аракеттерди кылышыбыз керек”, — деди Новиков.

Новиков ала качуу боюнча жазаны күчөтүп, адам уурдоо беренесине теңөөнү сунуштады. Ал кагаз жүзүндө көптөгөн концепциялар, стратегиялар иштелип чыкканы менен турмушта колдонулбай келгенин кошумчалады.

Белгилер:
алгоритм, аял, бала, зомбулук, өкмөт, Артем Новиков
Тема боюнча
"Апаңды да өлтүрүп кетем" деп коркутуп жүрүптүр. Айзаданын жакындарынын видеомаеги
Айзада Канатбекованы уурдады делген шектүүлөр камакка алынды