Өкмөт имараты. Архивдик сүрөт

Агенттик менен ведомстволордун тагдыры чечилип, кимиси каякка кошулары анык болду

1352
(жаңыланган 11:49 14.02.2021)
Буга чейин талаш жараткан Финпол, Миграция кызматы менен Мамлекеттик каттоо кызматынын тагдыры чечилди. Ошондой эле Санариптик өнүктүрүү мамлекеттик кызматы негизделгени маалым болду.

БИШКЕК, 14-фев. — Sputnik. Премьер-министр Улукбек Марипов "Өмөттүн жаңы түзүмү бекитилгендигине жана аткаруу бийлигинин органдарын реформалоого байланыштуу уюштуруу чаралары жөнүндө" токтомго кол койду.

Документте камтылгандардын негизи пунктуларын жарыялайбыз.

Төмөнкүлөр түзүлсүн:

  • Экономика жана финансы министрлиги Экономика министрлигинин жана Финансы министрлигинин базасында;
  • Коргоо министрлиги Коргоо иштери боюнча мамлекеттик комитеттин жана Куралдуу күчтөрдүн Генералдык штабынын базасында;
  • Саламаттык сактоо жана социалдык өнүктүрүү министрлиги Саламаттык сактоо министрлигинин, Эмгек жана социалдык өнүктүрүү министрлигинин базасында;
  • Транспорт, архитектура, курулуш жана коммуникациялар министрлиги Транспорт жана жол министрлигинин жана Архитектура, курулуш жана турак жай-коммуналдык чарба мамлекеттик агенттигинин базасында.

Төмөнкүлөр өзгөртүп түзүлсүн же өткөрүп берилсин (бардык ведомстволор тиешелүү штаты, финансылык, материалдык-техникалык каражаттары менен кошо өтөт):

  • Маданият, маалымат жана туризм министрлиги Маданият, маалымат, спорт жана жаштар саясаты министрлигине, мында туризм чөйрөсүндөгү функциялар Экономика жана финансы министрлигине;
  • Айыл чарба, тамак-аш өнөр жайы жана мелиорация министрлиги Айыл, суу чарба жана аймактарды өнүктүрүү министрлигине, мында Экономика жана финансы министрлигинен региондук өнүктүрүү чөйрөсүндөгү функциялары өткөрүп берилсин;
  • Өнөр жай, энергетика жана жер казынасын пайдалануу мамлекеттик комитети Энергетика жана өнөр жай министрлигине;
  • Маалыматтык технологиялар жана байланыш мамлекеттик комитети өкмөткө караштуу Санариптик өнүктүрүү мамлекеттик кызматына;
  • Жаштар иши, дене тарбия жана спорт боюнча мамлекеттик агенттик Маданият, маалымат, спорт жана жаштар саясаты министрлигинин карамагына;
  • Суу ресурстары мамлекеттик агенттиги Айыл, суу чарба жана аймактарды өнүктүрүү министрлигинин карамагына. Ал эми агенттиктин алдындагы Ичүүчү суу менен камсыздоону жана саркынды сууларды чыгарууну өнүктүрүү департаменти Транспорт, архитектура, курулуш жана коммуникациялар министрлигине;
  • Жер ресурстары боюнча мамлекеттик агенттик Айыл, суу чарба жана аймактарды өнүктүрүү министрлигине;
  • Монополияга каршы жөнгө салуу мамлекеттик агенттиги Экономика жана финансы министрлигине;
  • Отун-энергетикалык комплексин жөнгө салуу боюнча мамлекеттик агенттик Энергетика жана өнөр жай министрлигинин карамагына;
  • Курчап турган чөйрөнү коргоо жана токой чарбасы мамлекеттик агенттиги Айыл, суу чарба жана аймактарды өнүктүрүү министрлигине. Ал эми экология жана курчап турган чөйрөнү коргоо чөйрөсүндөгү функциялар Өзгөчө кырдаалдар министрлигине өткөрүп берилсин;
  • Жергиликтүү өз алдынча башкаруу иштери жана этностор аралык мамилелер боюнча мамлекеттик агенттик Айыл, суу чарба жана аймактарды өнүктүрүү министрлигине. Ал эми этностор аралык мамилелер чөйрөсүндөгү функциялар Маданият, маалымат, спорт жана жаштар саясаты министрлигине;
  • Мамлекеттик салык кызматы Экономика жана финансы министрлигине;
  • Мамлекеттик бажы кызматы Экономика жана финансы министрлигине;
  • Финансы рыногун жөнгө салуу жана көзөмөлдөө мамлекеттик кызматы Экономика жана финансы министрлигине;
  • Мамлекеттик миграция кызматы Саламаттык сактоо жана социалдык өнүктүрүү министрлигине. Ал эми тышкы миграция чөйрөсүндөгү функциялар Тышкы иштер министрлигине;
  • Мамлекеттик каттоо кызматы, "Кыргыз почтасы" ишканасынан тышкары, Юстиция министрлигине;
  • Интеллектуалдык менчик жана инновациялар мамлекеттик кызматы Экономика жана финансы министрлигине;
  • Финансылык чалгындоо мамлекеттик кызматы Экономика жана финансы министрлигине;
  • Экономикалык кылмыштарга каршы күрөшүү кызматы (Финансы полициясы) Экономика жана финансы министрлигине;
  • Жаза аткаруу мамлекеттик кызматы жана Мамлекеттик соттук-эксперттик кызмат Юстиция министрлигине;
  • Жогорку аттестациялык комиссия Билим берүү жана илим министрлигине;
  • Ветеринардык жана фитосанитардык коопсуздук боюнча мамлекеттик инспекция Айыл, суу чарба жана аймактарды өнүктүрүү министрлигине;
  • Экологиялык жана техникалык коопсуздук боюнча мамлекеттик инспекция Өзгөчө кырдаалдар министрлигине (айрым функциялары башка министрликтерге өтөт);
  • Мамлекеттик материалдык резервдер фонду Өзгөчө кырдаалдар министрлигине;
  • Мамлекеттик мүлктү башкаруу боюнча фонду Экономика жана финансы министрлигине;
  • Милдеттүү медициналык камсыздандыруу фонду жана Социалдык фонд Саламаттык сактоо жана социалдык өнүктүрүү министрлигине;
  • Инвестицияларды илгерилетүү жана коргоо агенттиги Экономика жана финансы министрлигине;
  • Мамкаттоонун алдындагы "Кыргыз почтасы" ишканасын Санариптик өнүктүрүү мамлекеттик кызматына;

Ошондой эле төмөнкүдөй тапшырма берилди:

  • Экономика жана финансы министрлиги бир айлык мөөнөттө штаттык бирдиктердин, аткаруу бийлигинин мамлекеттик органдарынын, анын ичинде техникалык жана тейлөө персоналынын штаттык санынын чеги жөнүндө долбоорлорду өкмөткө киргизсин;
  • Аткаруу бийлигинин тиешелүү жетекчилери бир айлык мөөнөттө түзүмдөрүн жана штаттык ырааттамаларын ушул токтомго ылайык келтиришсин.

Токтом кол коюлган күндөн тартып күчүнө кирет. Ушул токтомдун аткарылышын көзөмөлдөө өкмөт аппаратынын аткаруу бийлигинин тиешелүү мамлекеттик органдарын тейлеген түзүмдүк бөлүмдөрүнө жүктөлдү.

1352
Белгилер:
токтом, кызмат, министрлик, түзүм, өзгөрүү, өкмөт
Тема боюнча
Генштабды Коргоо министрлигине айлантуунун эмне зарылдыгы бар эле. Адистердин пикири
Жээнбековдун "кишилери", сурак жана кызмат. Алтынай Өмүрбекованын маеги. II бөлүк
Улуусу 61, кичүүсү 34 жашта. Жаңы өкмөт мүчөлөрүнүн жаш курагы, билими
Вашингтондогу Америка желектеринин фонунда Капитолий имаратынын сыртындагы адамдар. Архив

Демократияны үйрөтөт. АКШ бирөөнүн жашоосуна кийлигишүүнүн жаңы ыкмасын тапты

41
Америкалыктар мындан ары демократия үчүн күрөшпөйт. Башка өлкөлөргө кийлигишүү жана авторитардык лидерлерди кулатуунун майнапсыз экенин мезгил көрсөттү.

Вашингтон мындан сабак алып, дүйнөнү өзүнөн баштап өзгөртүүгө чамынды. Мындан ары Кошмо Штаттар кандай аракет этерине Софья Мельничук сереп салган.

Жаңы доор — жаңы ыкмалар

АКШ мамлекеттик катчысы Энтони Блинкендин мамлекеттик департаменттеги алгачкы расмий сөзү бош залда жаңырса да чоң чуу жаратты. Жарым саат ичинде америкалык дипломатиянын башчысы тышкы саясаттын негизги багыттарын санады. Алар жакында улуттук коопсуздук стратегиясында бекитилет. Блинкендин айткандарынын дээрлик көбү жаңылык эмес, өзү да, президент Жо Байден да акыркы айларда бир нече жолу кайталап келген эле сөздөр. Ошентсе да бир нерсе көңүл бурдурду.

"Биздин ыкма өзгөрөт, — деп жарыялады мамлекеттик катчы. — Биз демократияны кымбат баалуу аскердик кийлигишүүлөр же авторитардык режимдерди күч менен кулатуу аракеттери аркылуу жайылтпайбыз". Жакшы ниет менен жүргүзүлсө да, мындай ыкмалардын аягы жакшы бүтпөгөнүн моюнга алды жаңы администрациянын өкүлү. Ал тургай, "демократияны жайылтуу" деген терс маанай жаратып, ага америкалыктардын өздөрү деле ишенбей калышкан.

Дүйнө алмашты, эми жаңы шарттарда Вашингтон көңүлдү террордук коркунучтардан атаандаш державаларга бурат. Демократияны жайылтуу — бул мурдагыдай эле АКШнын тышкы саясатынын императиви бойдон, өз үлгүсүндө көрсөтөт.

"Болбосо бизди баалуулуктарыбыздан адаштыруу үчүн бардык мүмкүнчүлүктү колдон чыгарбаган Кытай жана Россия сымал атаандаштарга уттурабыз. Аларга шарт түзүп бербейли", — деп аяктады сөзүн америкалык дипломат.

Өзү өрнөк боло алабы?

Аталган державаны былтыркы жыл катуу сынады. Биринчи, Экинчи дүйнөлүк жана Вьетнам согушунан да көп америкалыктын өмүрүн алып кеткен коронавирус пандемиясы саламаттык сактоо тутумундагы теңсиздикти көрсөттү. Полициянын ырайымсыздыгы жана кара терилүү кишинин өлтүрүлүшүнөн улам өлкөнү расалык толкундоолор каптаган. Дагы бир ирет коомдо системалуу расизм көйгөйү ачык байкалып калды.

Президенттик шайлоо да ондогон жылдар ичиндеги эң чуулгандуулугу менен эсте калды. Дональд Трамп али күнчө шайлоонун жыйынтыгы бурмаланган деген ойдо. Ушундай маанай айрымдарды алтынчы январда Капитолийдин имаратын басып кирүүгө түрттү.

Жаңы президент Жо Байдендин алдында өлкөнүн ички биримдигин калыптандыруу зарылдыгы курч турат, ошондой эле ал эң оболу америкалыктардын өздөрүнө АКШ дале демократиянын үлгүсү экенин көрсөтүүгө тийиш.

"Кошмо Штаттарда башкаларга өрнөк болуу жаатында азыр көйгөй чоң, — дейт АКШ жана Канада институтунун улук илимий кызматкери Павел Кошкин. — Аларга азыр электоратты мобилизациялоо үчүн риторикалык инструмент абзел. Өлкөдөгү кырдаалды жөнгө салууга кудурети жетерин көрсөтүү маанилүү".

Блинкендин билдирүүсүн кандайдыр бир деңгээлде ички жагдайга да багытталган деп болжоого болорун айтат Кошкин. "Бөлөк өлкөлөрдү тартипке келтирүү өзүңдөн баштоого кандайдыр өбөлгө сымал", — деп түшүндүрөт ал.

Демократияга каршы өнүгүү

Байдендин администрациясы дайым башкы стратегиялык атаандаш Кытай жана анын өнүгүү үлгүсү экенине басым жасап келет. Вашингтон дал ошону өзгөртүүгө ниеткер. Пекин өзү саясий тутумду эч жакка көчүрүүнү пландаган жок. КЭРдин төрагасы Си Цзиньпиндин айткандарын эстейличи. "Биз дүйнөнүн мүмкүнчүлүктөрүн өнүгүү аркылуу жайылтабыз", — деп түшүндүргөн ал.

Айрым мамлекеттерде чындап эле мамлекетти башкаруунун кытайлык элементтерин импорттоого талап бар экенин белгилейт Москвадагы Карнеги борборунун консультанты Кытайды изилдөөчү Темур Умаров. Айталы, Борбор Азиядагы мамлекеттер. Чөлкөмдөгү өлкөлөрдө АКШнын таасири жылдан-жылга азайып барат.

"Аймактын бардык автократиялары Кытайдын ийгилигин кайталагысы, демократиялык реформаларсыз эле экономикасы өнүккөн өлкөгө айлангысы келет", — дейт Умаров. Ошол эле убакта заманбап дүйнөдө кандай автократия болбосун, демократиялуу көрүнгүсү келет. Антпесе глобалдык дүйнөдө кадыресе жашоо мүмкүн эмес.

Ошол себептен Борбор Азиядагылардын баары сөз жүзүндө реформа жана адам укуктары жөнүндө айтышат, бирок иш жүзүндө Батышты үлгү катары эсептебейт. Эгер мурда бул чөлкөмдө жалгыз Кыргызстан демократия аралчасы аталып, Америка тарапка ыктап келсе, азыр ал оюнан кайтып башка жолго бет алды.

Эгер Кытай өңдүү Борбор Азияга экономикалык жактан активдүү басым жасаган болсо, Кошмо Штаттар аймакта позициясын күчөтө алмак. Ансыз идеологиялык планда чоң таасирге ээ боло албастыгын айтат Умаров.

Унутулгус эски адат

Жаңы администрациянын ыкмасы — Барак Обама баштап кеткен жолдун уландысы. Обаманыкы деп аталган доктрина чет жактагы америкалык аскерлердин кыскартылышына багытталган. Ошондой эле демократтар аскердик ыкмалар анчалык майнапсыз экенин, демократияны кийлигишүү, басып алуу жана мамлекеттик түзүлүш эсебинен эмес, жумшак күч менен жайылтуу керек деген бүтүмгө келишкен. Бирок Кошмо Штаттардын 44-президенти ишке ашыра алган эмес. 2011-жылы АКШ ливиялык өкмөттүк күчтөргө аба соккусун урган.

Кийинчерээк чечим туура, албетте, туура болгонун, бирок Вашингтон анын кесепеттерине даярданбаганын ал моюнга алган. Ливия башаламандыкка сүңгүп, муну Обама президенттик мөөнөтүндөгү эң чоң катачылык деп атаган.

Кошмо Штаттардын азыркы администрациясы экс-президенттин аракеттерин улантып, аскердик кийлигишүүдөн тышкары бардык ыкмаларды пайдаланарын боолголойт.

РФ Жогорку экономикалык мектеби улуттук изилдөө университетинин европалык жана эл аралык комплекстик изилдөөлөр борборунун директорунун орун басары Дмитрий Суслов.

"Чет элдик жардам саясатына жана коммерциялык эмес уюмдарга басым жасашат, "кызгылт сары революцияларды" алда канча активдүү колдошот, — дейт ал.  Сирияда Башар Асаддын режими менен АКШ түз күрөшкөн эмес, оппозициялык күчтөргө көмөктөшкөн. — Бул жөндүү инструмент бойдон калат".

Ушул тапта Вашингтон Россия, Беларусь, Венесуэлада оппозициянын өкүлдөрүн колдойт. Мурда Кошмо Штаттар Алексей Навальныйдын ишинен улам айрым россиялык аткаминерлерге каршы санкцияларды киргизген.

Беларусь президенти Александр Лукашенконун дарегине карата чектөө чараларын америкалык элчи Светлана Тихановская менен талкуулаган.

Жакында эле Блинкен Венесуэланын оппозициялык лидери Хуан Гайдо менен телефон аркылуу сүйлөшкөн. Кытай жана Иранда АКШ батышчыл коммерциялык эмес уюмдарга жана бул мамлекетти кескин сындагандарга жардам берип келет. Конкреттүү аракеттер өлкөдөн көз каранды экенин белгилейт Суслов. Кай бир жакта жарандык согушта тараптардын бирин колдоп, кээ бир өлкөдө саясий каатчылыкка чагымчылдык кылат. Маалыматтык саясат, үгүт, коомдук дипломатия.

Санкциялар — демократияны жайылтуунун маанилүү инструменти, алар арылгысы келген элиталарга сокку урат. Ирак, Ливиядагыдай жаңы операциялар эми кайталанбайт. Тарых көрсөткөндөй, чет элдик долбоорлорго каражат бөлүп коюуга караганда өзүндөгү демократия менен үлгү көрсөтүү алда канча татаал. Ошондуктан достук күчтөрдүн каржылык колдоосу АКШ Мамлекеттик департаменттин негизги инструментине айланат.

41
Белгилер:
демократия, тарых, Алексей Навальный, мамлекет, АКШ
Тема боюнча
Россияны ооздуктоо боюнча милдеттенмелерден арыла албаган Европа
Европа — Россия мамилеси: Боррелдин сапары алдын ала чалгындоо беле?
Премьер-министр Улукбек Марипов

Марипов: быйыл салык менен бажы процедураларын толук санариптештирүү керек

141
(жаңыланган 15:42 07.03.2021)
Өкмөт башчы салык жана бажы процедураларын санариптештирүү бир нече жыл мурда башталганын, бирок дагы деле кемчиликтер бар экенин айткан.

БИШКЕК, 7-мар. — Sputnik. Премьер-министр Улукбек Марипов быйыл санариптештирүүнүн бардык компоненттери толук кандуу ишке берилүүгө тийиш экенин айтты. Бул тууралуу өкмөттүн маалымат кызматынан кабарлашты.

Марипов салык жана бажы процедураларын санариптештирүү маселелерин талкуулоо боюнча жыйын өткөргөн.

Ал бажы тармагын санариптештирүү боюнча иштер жакшы жүрбөй жатканын, бул жаатка басым жасаларын айткан.

Премьер-министр КР Улукбек Марипов выступает на заседании по обсуждению вопросов цифровизации налоговых и таможенных процедур. 07 марта 2021 года
© Пресс-служба правительства / Алишер Алиев
Премьер-министр Улукбек Марипов быйыл санариптештирүүнүн бардык компоненттери толук кандуу ишке берилүүгө тийиш экенин айтты
"Салык жана бажы процедураларын санариптештирүү бир нече жыл мурда башталып, белгилүү бир натыйжага жетиштик. Ошону менен бирге кетирилген каталыктар жана кемчиликтер бар. Бул жол-жоболорду санариптештирүүдө коррупциялык тобокелдиктерди жоюу, бюджетке каражат түшүүлөрдү көбөйтүү, салык төлөөчүлөрдү жана калкты контрафактылык продукциядан коргоо, көмүскө экономиканын үлүшүн жана мамлекеттик кызмат көрсөтүүлөрдү электрондук түрдө берүү деген маанилүү нерселерди эске алуу керек", — деген Марипов.

Марипов системалык негизде салык жана бажы процедураларын санариптештирүү боюнча координациялык кеңештин ишин жандандыруунун маанилүүлүгүн белгилеп өткөн.

141
Белгилер:
санариптешүү, салык, бажы, Улукбек Марипов
Тема боюнча
Өкмөт суу май жана кумшекер өндүргөндөр менен түз келишим түзүүнү карап жатат
Жапыкеев башында турган Финпол жоюлду
Жеңил атлетчилер марафон учурунда. Архив

Кыргызстандык жеңил атлетчилер Беларуста бир нече медаль алышты

0
(жаңыланган 00:16 08.03.2021)
Аталган спорттук иш-чарада кыргызстандык спортчулар баш-аягы эки алтын, бир күмүш жана үч коло медаль алышты.

БИШКЕК, 8-мар. — Sputnik. Кыргызстандык жөө күлүктөр Беларустагы эл аралык турнирде эки алтын, бир күмүш, үч коло медаль тагынды. Бул тууралуу КРдин Жеңил атлетика федерациясынан билдиришти.

Кыргызстанские легкоатлеты во время соревнований в Беларуси
© Фото / пресс-служба федерации легкая атлетика КР
Кыргызстандык жөө күлүктөр Беларустагы эл аралык турнирде эки алтын, бир күмүш, үч коло медаль тагынды

Маалыматка ылайык, Минск шаарындагы мелдеште узундукка секирүү боюнча Светлана Майер биринчи орунга жетип алтын медалга татыган. Анастасия Бондаренко 200 жана 60 метрге чуркап коло менен күмүш медаль алса, ал эми Артем Слесаренко 60 метрге чуркап коло медалга ээ болгон.

Дагы бир жөө күлүк Калыс Таштанов 1500 метр аралыкта марага биринчи жетип алтын, 800 метр аралыкта үчүнчү келип коло медалды байге куржунуна салган.

Аталган спорттук иш-чарада кыргызстандык спортчулар жалпы эки алтын, бир күмүш жана үч коло медаль алышты. 

0
Белгилер:
медаль, мелдеш, жеңил атлетика, Беларусь
Тема боюнча
Надыров: Ысык-Көл марафонунун байге фонду 1 млн. 44 миң сомду түзөт
ШКУнун эл аралык марафону 15-майда Чолпон-Ата шаарында старт алат