ИИМде ротация жүрүп, облус, район ИИБдеринин жетекчилери алмашты. Тизме
(жаңыланган 11:39 15.02.2021)
Бишкек шаардык милиция бөлүмүнүн башчысы Ысык-Көл облусуна которулду. Ошондой эле Баткен облустук жана Ош шаардык милиция бөлүмдөрүнүн жетекчилери орун алмашкан.БИШКЕК, 15-фев. — Sputnik. Ички иштер министрлигинин 2020-жылдын жыйынтыгына арналган коллегиянын чечимдерине ылайык, жетекчилик курамга ротация жүргүзүлдү. Бул туурасында ИИМдин маалымат кызматы билдирди.
Ротация төмөндөгүдөй жүргүзүлдү:
- Нарын ОИИБдин начальниги Улан Аалиев ээлеген ордунан төмөндөтүү менен бошотулуп, Бишкек шаарынын Октябрь РИИБдин жетекчиси кызматына;
- Бишкек ШИИББдин начальниги, милициянын полковниги Канат Жумагазиев Ысык-Көл ОИИБдин жетекчиси болуп дайындалды;
- Ысык-Көл ОИИБдин начальниги, милициянын полковниги Улан Асанбаев ээлеген ордунан төмөндөтүү менен бошотулду;
- Талас ОИИБдин начальниги, милициянын полковниги Алмазбек Жумабеков Нарын ОИИБдин башчылыгына дайындалды;
- Баткен ОИИБдин начальниги, милициянын полковниги Акылбек Мамасеитов Ош ШИИБдин жетекчиси болуп дайындалды;
- Ош ШИИБдин начальниги, милициянын полковниги Мурат Боронов Баткен ОИИБдин жетекчилигине барды;
- Талас ОИИБдин башчысынын милдетин убактылуу аткаруучу болуп ИИМдин Криминалдык милиция кызматынын улук ыйгарым укуктуу кызматкери Марлис Асанов дайындалды;
- ИИМдин баңгизаттарды мыйзамсыз жүгүртүүгө каршы күрөшүү кызматынын начальниги, милициянын полковниги Бакыт Матмусаев Бишкек ШИИББдин жетекчиси кызматына дайындалды;
- Бишкек шаарынын Октябрь РИИБдин башчысы милициянын полковниги Уланбек Султанов ИИМдин бангизаттарды мыйзамсыз жүгүртүүгө каршы күрөшүү кызматынын начальниги болуп дайындалды;
- Жалал-Абад обласунун Ала-Бука РИИБдин начальниги, милициянын полковниги Замирбек Ормонов Токтогул РИИБдин башчылыгына которулду;
- Токтогул РИИБдин начальниги, милициянын полковниги Райымбек Сулайманов Ала-Бука РИИБдин жетекчиси болуп барды;
Андан сырткары, ИИМдин жетекчилик курамына дайындоолор боюнча өткөрүлгөн конкурстун жыйынтыгы менен да жетекчилер дайындалган. Алар:
- Милициянын полковниги Жеңишбек Абитов Ош ОИИБдин начальниги;
- Милициянын полковниги Конокбай Өскөнбаев ИИМдин ички иликтөөлөр кызматынын жетекчиси;
- Милициянын подполковниги Нурланбек Бурканов Баткен шаардык милиция бөлүмүнүн башчысы;
- Милициянын подполковниги Айылчы Мырзамамытов Аксы РИИБдин начальниги болду.
Өз дүйнөсү менен жашап калган. Жапаров Жээнбековдун эмнеден жазганын айтты
(жаңыланган 12:52 26.02.2021)
Мамлекет башчы Кыргызстанга тышкы күчтөрдүн канчалык күчтүү таасири болбосун, бийлик биринчи кезекте өзүнүн каталарынан улам кыйрай турганын айтты.БИШКЕК, 26-фев. — Sputnik. Экс-президент Сооронбай Жээнбеков коомчулуктун талаптарынан алыс болуп, өз дүйнөсү менен жашап калган. Бул туурасында президент Садыр Жапаров "Российская газета" гезитине берген маегинде билдирди.
Журналист Жапаровдун элдик толкундоолор менен бийликке келгенин эске салып, акыркы жылдары бийликти алмаштыруунун "юридикалык эмес" механизми Кыргызстанда кадимки көнүмүшкө айланганын айтты. Ал эмне үчүн мындай болуп жатканына кызыккан.
Мамлекет башчы бардык өлкөлөр ушул сыяктуу тарыхый сыноолордон өтүшөрүн, андан башка өзгөчө учурлар дээрлик жокко эсе экенин билдирген.
"Мен Кыргызстандын эли өтө жигердүү жана мобилдүү эл экенин кошумчалай кетейин. Жаратылышынан эле ар дайым көчүп-конуп жүргөн, көптөгөн уруулардан куралган, эркиндикти сүйгөн элбиз. Андыктан, биздин мамлекетте бийликти узурпациялоо аракеттеринин баары ийгиликсиз аяктайт. Ошондой эле геосаясий жактан өтө ыңгайлуу жайгашкан өлкөбүзгө көзөмөл кылууга кызыкдар тышкы күчтөр дагы маанилүү роль ойной тургандыгын белгилеп кетейин", — деди Жапаров.
Бирок ал тышкы күчтөрдүн канчалык күчтүү таасири болбосун, тигил же бул бийлик биринчи кезекте өзүнүн каталарынан улам кыйрай турганын белгилеп, Жээнбековдун эмнеден жазганын айткан.
"Президент Сооронбай Жээнбеков чыныгы турмуштан, коомчулуктун коюп жаткан талаптарынан алыс болуп, өз дүйнөсү менен эле жашап калган, ошондон улам башынан эле элдин кыжырын келтирген, туура эмес чечимдерди кабыл алган. Кыскасы, революциялардын себептери көп. Эгерде андай себептер болуп жатса, анда бул коомдо демократиялык өзгөрүүлөр болушу, коомдук-саясий системанын өзгөрүшү зарыл экендигинин жана социалдык-экономикалык жактан жетишкендиктерге муктаж экендигинин белгиси", — деди президент.
Ошондой эле ал учурдагы кырдаалдан мамлекетти татыктуу алып чыгып кетүү милдети турганын кошумчалаган.
Жапаров Путинге эмне тартуу кылганы белгилүү болду
(жаңыланган 12:39 26.02.2021)
Мамлекет жетекчиси башында турган КР делегациясы 24-25-февраль күндөрү Россияга барып келген. БИШКЕК, 26-фев. — Sputnik. Президент Садыр Жапаров Россиянын лидери Владимир Путинге кылыч белек кылды. Бул туурасында ал "Российская газета" гезитине берген маегинде билдиргенин өлкө башчынын маалымат кызматы жазды.
Анда журналист Жапаровдон коноктор ар дайым кур кол келбестигин эске салып, бул ирет кандай белек тартуулаганын сураган.
"Мен Россиянын президенти Владимир Путинге кооз кылыч белек кылдым. Ал кылыч Кыргызстандагы чебер усталардын колунан жасалган", — деп жооп берди Жапаров.
Эске салсак, Жапаров башында турган кыргыз делегациясы 24-25-февраль күндөрү Россияга жумушчу сапары менен барып келген. Анын жыйынтыгы туурасында бул жактан билип алыңыз.