"Импульс" мамлекеттик жарнама сынагы эмгектерди 16-октябрга чейин кабыл алат

БИШКЕК, 18-сен. — Sputnik. "Россия сегодня" эл аралык маалымат агенттиги уюштурган "Импульс" мамлекеттик социалдык жарнама сынагы 2017-жылдагы эмгектерди кабыл алууну улантууда.

Сынакка КМШ өлкөлөрүнүн мамлекеттик бийлик жана жергиликтүү өзүн-өзү башкаруу органдары, коммерциялык эмес уюмдар катыша алат. Эреже боюнча катышуучулар 2016-жылдын 1-октябрынан 2017-жылдын 18-сентябрына чейин чыккан социалдык темадагы жарнактарды сайтына жүктөшү керек.

2017-жылы конкурсанттар сегиз номинация боюнча ат салышат. Алар: кампания, видео, аудио, интернет, плакат, буклет, активация жана сырткы жарнактар болуп эсептелет. Андан тышкары, "Гран-при — 2017", "Трендсеттер года", "Наш характер", "Признание интернета" деген атайын төрт номинация дагы каралган.

Сынактын жеңүүчүлөрүн калыстар тобу аныктайт. Мамлекеттик мыкты жарнакты ноябрь айында сынактын сайты аркылуу добуш берүү менен рунеттин колдонуучулары дагы тандай алат. Жыйынтыктары үстүбүздөгү жылдын декабрь айында "Россия сегодня" эл аралык маалымат агенттигинде чыгарылат. Жеңүүчүлөр "Импульс" статуэткалары менен сыйланмакчы.

Импульс — мамлекеттик социалдык жарнама сынагы. Ал коомдогу негизги көйгөйлөрдү чагылдырууга багытталган. Мамлекеттик жарнактардын сапатын жаңы деңгээлге көтөрүү конкурстун негизги максаттарынын бири болуп эсептелет.

"Россия сегодня" — дүйнөдө болуп жаткан жаңылыктарды ыкчам чагылдырган эл аралык медиа. Ага РИА Новости, Р-Спорт, РИА Недвижимость, РИА Рейтинг, Прайм, ИноСМИ агенттиктери карайт.