Бишкек, 27-фев. Sputnik. Бишкекте 16-17-апрелде "Экстремизм жана такфиризмдин азыркы коомчулукка жараткан кооптуулугу" деп аталган Эл аралык I симпозиум өтөт. Бул туурасында Кыргызстан мусулмандар дин башкармалыгынан билдиришти.
Иш-чараны Кыргызстан мусулмандар дин башкармалыгы менен Дин иштери боюнча мамлекеттик комиссия биргелешип "Ала-Арча" резиденциясында өткөрмөкчү.
Симпозиумга окумуштуулар, расмий диний уюмдар, эксперттер жана аалымдар катышып, аталган тема боюнча пикир алышат. Конференциянын алкагында Исламдын салттуу негиздерин өнүктүрүү боюнча маселелер талкууга алынмакчы. Андан сырткары такфиризмге каршы туруу идеологиясынын принциптери менен ыкмалары адистер тарабынан каралат. Тагыраак айтканда, такфиризмдин пайда болушу жана таралышы, Ислам дининдеги кечиримдүүлүк, боорукерлик ыкмаларынын негиздери, Ханафи мазхабынын коомдогу биримдикти жана ыктымакты сактоодогу ролу, имам Сарахсинин мисалындагы Орто Азиядагы мусулмандардын тарыхы, экстремизм жана такфиризмдин пайда болушуна каршы чаралар деген темаларда дискуссиялар жүрөт.
