Младенец. Архивное фото

Төрөлгөн төрт эм Зарнаевдерди эми жети уулдуу кылды

136
(жаңыланган 14:27 15.04.2015)
Кыргызстандын борборундагы төрөт үйлөрдүн биринде төрт эм эрекек балдар жарыкка келип, Нурлан менен Гүлайымды жети уулдуу кылышты.

БИШКЕК, 15-апр. — Sputnik. Төбөсү көккө жетип сүйүнгөн төрт эмдин атасы Нурлан Зарнаев келинчеги кош бойлуу учурунда дарыгерлер эгиз деп айтканын, кийин кайта үч эм экенин билдиришкенин жана көз жарарына аз калганда дарыгерлер төрт эм төрөлөт деп сүйүнчүлөшкөнүн Sputnik сайтынын кабарчысы менен болгон маегинде билдирди.

9-апрель күнү Бишкек шаарындагы Эне жана баланы коргоо улуттук борборунда 34 жаштагы Гүлайым Абдылдаева төрт эм уул төрөгөн. Алардын салмагы – 2 кг. 80 гр., 2 кг. 270 гр, 1 кг. 770 гр. жана 2 кг 591 гр.

35 жаштагы Нурлан Зарнаев менен 34 жаштагы Гүлайым Абдылдаева төрт эмге чейин үч эркек балалуу болушкан. Азыр уулдарынын улуусу Нурсултан 3-класста, экинчиси Эрбол 2-класста окуйт, үчүнчү уулу Элханга бир жаш эки ай болду. Нурлан мырзанын тунгуч уулуна ысымды эжелери, андан кийинкилерине туугандары койгон. 

Төбөсү көккө жете сүйүнгөн жубайлар төрт эмге аты өзүлөрү тандап коюшту.

"Ымыркайларга Кыргызстанга белгилүү болуп калган кишилердин аттарын коюуну чечтик. Уулдарыбызга Алмазбек (президенттин урматына), Асылбек, (ЖК төрагасы Асылбек Жээнбековдун урматына), Кубанычбек (Бишкек мэри Кубанычбек Кулматовдун урматына) жана Камчыбек (Эне жана баланы коргоо улуттук борборунун башчысы Камчыбек Узакбаевдин урматына) деген ысымдарды ыйгардык ", — деди ал.

Төрөтканадан 14-апрелде чыккан Гүлайым Абдылдаеваны шаардык муниципалиттин өкүлдөрү, төрөткананын кызматкелери, туугандары салтанат менен тосуп алып, үйүнө узатышты. Ымыркайлардын чоңоюшу үчүн бийлик өкүлдөрү бардык керектүү жардамдарды бере тургандыктарын айтышты.

Эне жана баланы коргоо улуттук борборунун жетекчиси Камчыбек Узакбаев баатыр энеге 170 миң сомду борбордун атынан тапшырса, Бишкек мэриясы 100 миң сом бөлө турган болду.

Төрт эмдин атасы Нурлан Зарнаевге президенттик аппараттан да чалып, Алмазбек Атамбаевдин буйругу менен аларга батир берилээрин айтышканын кошумчалады. 

"Буюрса батир болуп калат го деп турабыз. Андан сырткары Социалдык коргоо министрлиги да жардам беребиз деп жатат", — деди ал.

Нурлан Зарнаев учурда жеке курулуш фирмасында иштейт. Келинчеги Гүлайым Абдылдаева Эне жана баланы коргоо улуттук борборунда лаборант. Алар Туңгуч кичи районундагы "Рухий Мурас" жаңы конушунда жашайт. Нурлан Зарнаев 25 жашында биринчи уулду болгон.

Кыргызстандын тарыхында төрт эмдин төрөлүшү ушуну менен экинчи жолу катталып жатат.

136
Белгилер:
төрөткана, төрт эм, Эне жана баланы коргоо улуттук борбору, Гүлайым Абдылдаева, Нурлан Зарнаев
Пикирлер