БИШКЕК, 21-апр. — Sputnik. ШКУга мүчө мамлекеттердин ичинен Россиянын, Тажикстандын, Казакстандын жана Кытайдын аскер күчтөрү биргеликте машыгуу өткөрүү үчүн Кыргызстанга келгенин Коргоо министрлигинин маалымат кызматы билдирди.
Мамлекеттердин биргелешкен машыгуулары 21-апрелден 25-апрелге чейин Токмок шаарындагы 52806-аскер бөлүгүндө өтөт. ШКУга мүчө мамлекеттердин аскер күчтөрү туткундарды куткаруу, мыйзамсыз түзүлгөн топторду тоо шартында жок кылуу ыкмаларын бирге өздөштүрүшөт.
Ошондой эле, аталган аскер бөлүгүндө 9-май күнү Ала-Тоо аянтындагы парадга катыша турган жеке курамдын машыгуулары менен автотехниканын даярдыгын Башкы штабдын жетекчиси, генерал-майор Асанбек Алымкожоев текшерет.
Шанхай кызматташтык уюму 2001-жылы Кытай, Россия, Казакстан, Тажикстан, Кыргызстан жана Өзбекстан мамлекеттиринин лидерлери тарабынан түзүлгөн. Өзбекстан мамлекетинен сырткары калган бардык мамлекеттер 1996-жылы түзүлгөн "Шанхай бешилтигинин" мүчөсү. Бул уюм аскер тармагында биргелешкен иш-чараларды өткөрүү, бири-бирине болгон ишенимди чыңдоо жана чек ара аймактарында аскер күчтөрүн өз ара түшүнүүчүлүк менен азайтуу жаатында кызматташат.
