Балдарды асыроого жардам берүү программасы. Архив

Кыргызстанда жыл башынан бери 200дөн ашык баланы асырап алышкан

38
(жаңыланган 17:34 28.04.2015)
1-апрелге алынган маалымат боюнча, балдар жөнүндөгү Мамлекеттик маалымат банкында багылып алынбаган 141 бала жана бала асырап алууну каалаган 207 үй-бүлө тууралуу маалымат бар.

БИШКЕК, 28-апр. — Sputnik. Жыл башынан бери Кыргызстанда 200дөн ашык бала багылып алынганын Социалдык өнүгүү министрлигинин маалымат кызматы билдирди.

Биринчи кварталда социалдык өнүгүү башкармалыгы ата-эненин камкордугусуз калган 925 баланы аныктаган.

Асырап алууга 235 бала берилип, камкордукка 402 бала алынган. 176 бала интернеттарга жиберилсе, дагы 112 баланы асырап алууга же камкордукка берүү маселеси каралууда.

Министрликтин маалыматына ылайык, жыл башынан бери оор акыбалга туш келген 2609 үй-бүлө аныкталган. Алардын ар бирине жардам берүү боюнча жекече план түзүлүп, пландын 24 пайызы аткарылган. 

Баланы коргоо боюнча 741 жеке пландын 42,3 пайызы иш жүзүнө ашкан.

2015-жылдын 1-апрелине алынган маалымат боюнча балдар жөнүндөгү Мамлекеттик маалымат банкында асыранып алынбаган 141 бала жана бала асырап алууну каалаган 207 үй-бүлө катталган.

Ошондой эле, Социалдык өнүгүү министрлигине ата-энесинин камкордугусуз калган 4 бала жөнүндө өлкө тышынан документтер келген. Учурда аларды алып келүүгө даярдыктарды көрүү иштери жүрүп жатат.

38
Белгилер:
балдарды асыроо, Социалдык өнүгүү министрлиги, Кыргызстан