БИШКЕК, 26-май — Sputnik. Бүгүнкү күндө ажылык иштерин уюштуруу боюнча Ош облусунун жети районунда атайы адистер даярдалып, жергиликтүү тургундар тийиштүү маалымат менен камсыз болуп жатканын Ош облусунун мусулмандар казыяты кабарлады.
Маалыматка ылайык, дүйшөмбү күнү Кыргызстан мусулмандарынын Азирети муфтийинин орун басары Эратов Равшан ажы, Муфтияттын Ажылык-Умра бөлүмүнүн адиси Хамидулла Садиллаевдин ажылык иштери боюнча Ош облусундагы казыяттын адистери менен жолугушуусу болуп өттү. Анда ажылыкка каттоо боюнча аймакта жүргүзүлүп жаткан иштер боюнча маалыматтар берилди. Ош облусу боюнча ажылыкка жооптуу өкүл Ыманали Матраимовдун билдирүүсүндө, ажыга баруу үчүн 2015-жылдын 25-майына карата облус боюнча 456 адам каттоого алынган.
Жыйын соңунда муфтияттын өкүлдөрү тизмеге алуунун жол-жобосу, ажылыкка каттоо анкетасын туура толтуруу эрежелери боюнча кеңири түшүндүрмө беришип, суроолорго жооп беришти.
Быйыл зыяратчылар Сауд Аравиясына 27-августтан 13-сентябрга чейин учуп, 15-октябрга чейин кайтып келишет. Ал эми ажылык сапардын баасы 2550 долларды түздү.
