Атамбаев: балдардын эч нерседен кем болбой өсүшүнө биз милдеттүүбүз

© Sputnik / Табылды КадырбековЖенщина с ребенком. Архивное фото
Женщина с ребенком. Архивное фото - Sputnik Кыргызстан
Жазылуу
Балдарды коргоо күнү менен куттуктаган мамлекет башчысы учурда кичинекейлер ата-энелер жана мамлекет тарабынан камкордукка, көңүл бурууга муктаж болуп жаткандыгын айтты.

БИШКЕК, 1-июн — Sputnik. Президент Алмазбек Атамбаев 1-июнь — Балдарды коргоонун эл аралык күнү менен куттуктап, ачык асман, чың ден соолук каалады.

Президент учурда балдар жана ата-энелер мамлекет тарабынан камкордукка, көңүл бурууга муктаж экендигин айтып, өлкөдө балдардын укугу боюнча тиешелүү эл аралык документтер бардыгын кошумчалады. 

"Мындан 20 жыл илгери Кыргызстан Балдардын укугу боюнча Конвенцияны ратификациялаган. Биз балдарды коргоо боюнча мыйзамдуулукту өнүктүрүп жатабыз. Балдардын укугун сактаганга, аларды иштетпегенге аракет кылып жатабыз", — деди президент.

Мамлекет башчысы ошону менен катар эле балдарга жасалган зомбулуктар да кездешип жатканына тынчсыздангандыгын билдирди. 

"Коргоосуз балдарга жасалган зомбулуктун өсүп бара жаткандыгы жана алар ата-энеси, туугандары жагынан ар кандай ыдык көрүп жаткандыгы бизди абдан тынчсыздандырып жатат",— деди Атамбаев.

Балдар биздин мамлекеттин келечеги экендигин айткан президент, биз алардын бекем ден соолукта, билимдүү жана руханий жактан бай болуп өсүшү үчүн баарын жасоого милдеттүүбүз деп кошумчалады.

"Силерге узун өмүр, бекем ден соолук каалайм, таалайыңар тоодой болсун. Акылдуу жана чынчыл өскүлө, ата-энеңерге кайрымдуу болуп, элибизди, өз Мекениңер – биздин Кыргызстанды бекем сүйгүлө!",— деди Атамбаев. 

Бүгүн, 1-июнда Кыргызстанда Балдарды коргоонун эл аралык күнү белгиленип жатат.

Жаңылыктар түрмөгү
0