БИШКЕК, 1-июль — Sputnik. Президент Алмазбек Атамбаев Чүй облусунун Москва районундагы Садовое айылында Куткаруучуларды даярдоонун мамлекеттик борборунда (КДМБ) Өзгөчө кырдаалдар министрлигинин кызматкерлерине көп батирлүү үйдү тапшыруу аземине катышты.
Мамлекет ӨКМ кызматкерлерин кесиптик майрамы менен куттуктап, куткаруучулар акыркы 10 жылдын аралыгында 2000ден ашуун куткаруу иштерине катышканын белгиледи.
"Борбордун кызматкерлери 867 адамдын өмүрүн сактап калышкан. 2006-жылы сиздер Нарын облусунун Кочкор районундагы жана Ош облусунун Нура айылындагы жер титирөөлөрдөн жапа чеккен жарандарга жардам бердиңиздер. Борбордун жеке курамы Төө-Ашууда жана башка климаттык шарттары татаал региондордо жарандардын коопсуздугун камсыз кылат", — деди өлкө башчы.
Президент мындан бир жыл мурда да ӨКМ кызматкерлери үчүн эле көп квартиралуу үйдүн ачылышы өткөнүн эске салды. Ошондо куткаруучулар борборунун кызматкерлери үчүн дагы бир 18 квартиралуу үй куруу чечими кабыл алынган.
"Куткаруучулар жана аскер адамдары кыйынчылык мезгилде өлкөбүздүн жарандары үчүн өз өмүрүн курмандыкка чалууга даяр. Силер чыныгы мекенчилсиңер", — деди Атамбаев.
Мамлекет башчысы куткаруучуларды жетишкен ийгиликтери, көп жылдык ак ниет эмгеги жана жогорку кесипкөйлүгү үчүн КР президентинин белек сааттары менен сыйлады.
18 батирлүү үйдүн курулушуна республикалык бюджеттен 21,5 млн. сом сарпталган. Андан тышкары, президентинин буйругу менен ӨКМдин куткаруучулар борборунун машыгуучу залына спорт шаймандарын сатып алууга 500 миң сом бөлүндү.
