Сариев: күч түзүмдөрү тартип сактоону өздөрүнөн башташы керек

Жазылуу
Жыйындын жүрүшүндө премьер-министр ички иштер органдарындагы жат көрүнүштөр, коррупцияга байланыштуу эл арасындагы даттануулар азайбай жаткандыгын кошумчалады.

БИШКЕК, 24-июль — Sputnik. Укук коргоо кызматкерлери тартип сактоону өздөрүнөн баштоосу керектигин премьер-министр Темир Сариев Ички иштер министрлигинин коллегия жыйынында билдирди.

Милиционер фуражкасы. Архив - Sputnik Кыргызстан
Сариев укук коргоо органдарына бизнес өкүлдөрүн мыйзамсыз текшерүүгө тыюу салды
Маалыматка ылайык, биринчи жарым жылдыкта өлкө боюнча 15 миң 345 кылмыш иши катталган, бул көрсөткүч 2014-жылдын ушул мезгилине салыштырмалуу 12,9 пайызга көп болуп саналат.

Премьер-министрдин айтымында, кылмыштуулукка каршы күрөшүү жаатында жасалып жаткан иштери жетишсиз. Ал ар бир жаран мыйзам алдында бирдей жоопкер экенин белгилеп, бул багытта милиция кызматкерлери арасында түшүндүрүү иштерин күчөтүү зарылдыгын айтты.

"Милициянын негизги милдети – элдин ишенимин кайтаруу. Эл милицияга ишенгенде гана мамлекеттеги туруктуулук, өнүгүү камсыздалат. Өкмөт алдында кыска мөөнөттө сапаттуу өзгөртүүлөрдү ишке ашыруу милдети турат, ал үчүн тартипти камсыз кылуу керек", — деди Т.Сариев.

Муну менен катар өкмөт башчы укук коргоо кызматкерлери тартипти сактоону өздөрүнөн баштоосу керектигин эскертти. 

"Милиция бийлик органдарынын, мамлекеттик кызматкердин үлгүсү. Формачандардын тартиби, жүрүм-турумунан улам жарандардын бийликке болгон мамилеси, баасы калыптанат. Ошондуктан ар бир укук коргоо кызматкери кийинки муунга үлгү болуусу абзел. Ошондо гана элге сөзүбүз өтөт. Өзүңөр мыйзам бузсаңар, сиздерди эч ким укпайт", — Сариев.

Жыйын жүрүшүндө премьер-министр ички иштер органдарындагы жат көрүнүштөр, коррупцияга байланыштуу эл арасындагы даттануулар азайбай жаткандыгын кошумчалады.

Мындан тышкары, уюшкан кылмыштуулукка, диний экстремизмге, балдарга карата зомбулук көрсөтүү фактыларына жана коррупцияга каршы чараларды күчөтүү тапшырмалары берилди.

Жаңылыктар түрмөгү
0