БИШКЕК, 11-ноя. — Sputnik. Болгарияда өткөн Эл аралык супермоделдердин сынагында баш байгени багындырган кыргызстандык Таңсулуу Өмүрзакова ырдоону кыялданарын Sputnik агенттигинин кабарчысы менен болгон маегинде билдирген.
Үстүбүздөгү жылдын 3-7-ноябрь күндөрү Болгариянын борбору София шаарында Super model' Universie 2015 сынагы болуп өттү.
"Конкурс 18 жаштан 25 жашка чейин кыздар менен жигиттердин ортосунда өттү. Ага дүйнөнүн ар кыл мамлекетинен келген 30дан ашуун өкүл катышты. Мен бул сынакта жеңүүчү болдум", — дейт Өмүрзакова.
Биринчи орунду Россиянын өкүлү Мария Овечкина багындырса, экинчи сапта москвалык сулуу Мария Лима турду. Израилден келген Мария Барлинни үчүнчү, ал эми Белоруссиядан келген Екатерина Черняк төртүнчү орунга ээ болду.
Кыргызстандын Жалал-Абад облусунан келген Таңсулуу Өмүрзакова буга чейин Минск шаарында өткөн "Ааламдын сулуу айымы" сынагына катышып, "Сулуулук айымы" титулуна ээ болгон.
