Планшетте иштеп жаткан адам. Архив

Бизнес-тренингден байыгандар барбы? Же 1000 долларлык тренингдин пайдасы канча?

824
(жаңыланган 14:17 02.04.2016)
Бүгүнкү күндө буга чейин теледен көрүп, бирөөдөн угуп таң калып келген көп нерселер күнүмдүк жашообузга абдан сиңип, көндүм оокатка айланып калган. Sputnik Кыргызстан агенттигинин кабарчысы Исмаил Мамытов Батыштан келген саамалыктын бири бизнес-тренинг деген нерсенин оош-кыйышын карап көрдү.

Акыркы жылдары ар кыл семинарлар көбөйдү. Чечендик өнөрдү, туура ойлонушту, кантип дос күтүүнү үйрөтүшөт. Жада калса жалгыздыктан жадагандар үчүн өзүнчө курстар бар. Эң кеңири тараганы — бизнес-тренингдер. Алардын алды 100 доллардан баштап 5000 еврого чейин жетет.

Интернетти барактап отуруп, кызыктуу жарнамага көзүм түштү.

"Кантип нөлдөн бизнес баштоо керек? Карыздан бат кутулууну каалайсыңбы? Ийгиликтүү бизнес жасоону үйрөтөбүз".

Бул эч нерсе эмес, "үй-бүлө бюджетин туура колдонууга үйрөтүп", бул да аздык кылса "сүйүктүүңүз менен табыштырып, үй-бүлөлүк бакытты таап берет", ал да аздык кылса, "балдарыңыздын талантын ташкындатып, каржы интеллектин көтөрүп салат". Ушул жарнамадан келесоо эле баш тартпаса, акылы жайында адам пендечилик кылып, дароо ээрчип кетери бышык.

Жашырганда эмне, жарнама мени магниттей эле тартып алды. Интернеттеги издөө системалары менен "бизнес-тренинг" деп жазсам эле, жамгырдан кийинки козу карындай жайнап чыкты.

"Базар экономикасы такыр өзгөрдү, эскичилик менен иш кылуу кооптуу, дароо өзгөрүп, жаңыча ыкма менен иште, өз бизнесиңди 100 миң долларга чейин көбөйт" деген бизнес-мектептин сайтын барактап көрөлү.

Сайтка кирер менен эле, биздин тренингден кийин ишкерге окшоп ой жүгүртүп, бизнесиңдеги кирешени эки эсе көбөйт да, байып жатып кал деген тренердин сүрөтү турат. Жарнамаларын карап отуруп, алар мага сыйкырчыдай эле сезилди. Элестетип көрүңүз, алардын айтымында, эки күндүк тренингде ой жүгүртүү түп-тамыры менен өзгөрүп, бизнесиңиз дүңгүрөп өсүп кетет экен.

"Бул тренерлер өзү ким?" деген суроо тамакка такалган сөөктөй эле туруп алды. Анда чогуу иликтеп көрөлү. Бул соболго бардыгы кызыгарын аңдап түшүнгөн тренерлер, өзүлөрүн болушунча "апакай" кылып, сайтынын көрүнүктүү жерине балп эте жайгаштырып коюшкан. Алардын айтымында, көпчүлүгү жоктон баштап миллионер болушкан, арасында илимдин докторлору, профессорлор бар. Бизнестин 50гө чукул түрлөрүн өздөштүрүп, 10дон ашуун китептердин авторлору.

Бул маалыматтардын канчалык чындыкка жакын экенин текшерүү кыйын эмес. Ооба, китептери бар. Ал китептер бекер эмес, 500 сомдон 1000 сомго чейин сатылат. Ар кыл сертификаттарын көрүүгө болот. Дүйнөнү дүңгүрөткөн тренерлер менен кошо сүрөткө түшүп, аларды көрүнүктүү жерлерине илип коюшкан. Бирок, дүңгүрөгөн бизнесинен дайын жок.

Булар жалганчылар, ишенбеш керек дегендер да бар. Бактыяр Шаршеев, тренингдерге катышып, өзүнөн эч кандай өзгөрүү байкаган эмес.

"Жарнамага алданып барып алыптырмын, эки күндүк убактымды жана 100 доллар акчамды кетирдим. Эч кандай байып кеткеним жок", — дейт Шершеев.

Ал эми Мырзахит Мырзаев акча которуп атайын семинарларга барганды жактырбайт.

"Ошол эле бизнестин дөө-шаалары өз учурунда эч кандай сабактарсыз эле өз ишмердүүлүгүн баштап, учурда ийгиликтүү бизнесин жүргүзүүдө", — деди Мырзаев.

Ал эми ишкер Элзар Абылкасымов бул семинарлар адамга мотивация берерин белгиледи.

"Мектепте бизди кантип бизнес кылууну, жашоого кандай көз караш менен кароону үйрөтпөйт. Андыктан бизнес сабактар адамга пайдалуу. Мен ишкер болгондуктан, бизнестин сырларын өздөштүрүүгө абдан пайда берет", — деди Абылкасымов.

Таалай Мадиев учурда Бишкекте эки, Ошто бир атыр саткан дүкөн ачкан. Ал төрт жыл мурун сабак алып баштаган. Башкаларга ишкерликтин сыры боюнча сабак өтүп турат. 

"Семинарларга бир эле жолу барып, булар жалганчы экен дегендер арбын. Спорт залга бир барып, чемпион болгондор жок да. Ошол сыяктуу эле сабактарга такай барса, анан тыянак чыгат. Мен төрт жыл мурун курстан өткөм. Учурда бизнес кылуу менен бирге, тренер болуп да эмгектенем", — деди Мадиев.

Бишкектеги бизнес сабактарын үйрөтүүчү мектептерге баш бакканыбызда алар жарнамага жазгандарын кайталап беришти. Алардын айтымында, пайда көрүү үчүн акчаны аяган туура эмес. Алган билимди туура колдонуу — ар бир адамдын өзүнөн деген жооп кайтарышты. 

Эгерде бир күндүк сабакка катышам десеңиз 100 доллар, эки күндүгү 200 доллар, ал эми дасыккан бизнесмен болууну чечсеңиз, бир аптага 1000 доллар төлөйсүз. Ысык-Көлдүн жээгине алып барып сабак өткөндөр 5000 евроңуз үчүн "акылдуу" кылып коет.

Албетте, бул кызматты пайдаланууну ар ким өзү чечет.

824
Белгилер:
акча, сабак, тренинг, бизнес, ишкер
Тема боюнча
Мекендештердин III форуму быйыл августта Ош шаарында өтөт
Кыргызстан бизнес жүргүзүүгө ыңгайлуулугу боюнча 67-орунду ээледи
Кыш мезгили. Архив

Дагы кар жаайбы? Бир жумага карата аба ырайы

63
Бул жумада көпчүлүк аймактарда кар жаап, бирок мурунку аптадагыдай катуу суук болбой турганы айтылды.

БИШКЕК, 29-ноя. – Sputnik. Кыргызгидромет агенттиги алдыдагы аптага карата аба ырайынын божомолун жарыялады.

Ага ылайык, борбор калаада дүйшөмбүдөн бейшембиге чейин күн ачык болот. Ал эми жума күнү мезгил-мезгили менен кар жаашы ыктымал. Батыштан соккон шамалдын ылдамдыгы секундасына 4-9 метрге жетет.

Чүй, Талас облустары

30-ноябрда жана 1-декабрда жаан-чачын жаабайт. 2-3-декабрда Талас облусунун кээ бир райондорунда жана Чүйдүн тоолорунда кар жаайт. Ал эми дыйканчылык аймактарында күн ачык болот. 4-декабрда көпчүлүк жерлерде мезгил-мезгили менен кар жаайт. Жолдорго муз тоңуп, тайгак болот.

Ош, Жалал-Абад, Баткен облустары

30-ноябрда жаан-чачын күтүлбөйт. 1-2-декабрда Ош, Жалал-Абад облустарынын кээ бир райондорунда кар жааса, Баткен облусунда күн ачык болот. Ошондой эле Ош облусунун дыйканчылык аймактарында дагы жаан жаабайт.

3-декабрда түнкүсүн кээ бир райондордо кар жаашы мүмкүн. Эртең менен жана күндүз Жалал-Абад облусунун айрым аймактарында, Ош, Баткен облустарынын тоо этектеринде жана тоолуу жерлеринде кар жаайт. Бирок Ош, Баткен облустарынын өрөөндөрүндө күн ачык болот.

4-декабрда көпчүлүк аймактарда мезгил-мезгили менен кар жаашы ыктымал.

Ысык-Көл облусу

30-ноябрда түнкүсүн кээ бир райондордо кар жаап, күндүзү күн ачык болот. 1-2-декабрда түнкүсүн жаан-чачын болбойт, 2-декабрда күндүз кээ бир райондордо кар жаайт. 3-4-декабрда кээ бир райондордо кар жаашы болжолдонууда.

Ал эми 30-ноябрда түнкүсүн Каракол шаарында кар жаайт, Чолпон-Атада күн ачык болот. 30-ноябрда күндүз жана 1-4-декабрда жаан-чачын күтүлбөйт.

Нарын облусу

30-ноябрда жана 1-декабрда жаан жаабайт, ал эми 2-3-декабрда күндүз кээ бир райондордо кар жаайт. 4-декабрда көпчүлүк аймактарда мезгил-мезгили менен кар жаашы күтүлөт.

5-6-декабрга карата Кыргызстандагы аба ырайынын жакындатылган божомолу

5-декабрда түнкүсүн Ош, Жалал-Абад, Баткен облустарынын көпчүлүк аймактарында, Чүй, Талас, Ысык-Көл, Нарын облустарынын кээ бир райондорунда мезгил-мезгили менен кар жаайт. Күндүз кээ бир райондордо кар жаашы мүмкүн.

6-декабрда тоолуу жерлерге кар түшүп, дыйканчылык аймактарда күн ачык болот. Абанын температурасы бир аз төмөндөйт.

63
Белгилер:
аймак, тоо, күн, жаан, кар, аба ырайы, Кыргызстан
Тема боюнча
Кышында унаадагы күйүүчү майды үнөмдөөнүн жолу айтылды
Декабрга карата аба ырайы. Тоолуу жерлерде суук 34 градуска жетет
Global Education Foundation коммерциялык эмес уюмунун негиздөөчүлөрүнүн бири Хабиб Арзыкулов

Арзыкулов: чет өлкөдөн жаштардын билим алуусун каржылоочу уюм ачылды

50
(жаңыланган 15:05 29.11.2020)
Global Education Foundation коммерциялык эмес уюмунун негиздөөчүлөрүнүн бири Хабиб Арзыкулов чет өлкөдө билим алуу үчүн демөөрчү таап берген уюмдун ачылгандыгын айтты.
Арзыкулов: чет өлкөдөн жаштардын билим алуусун каржылоочу уюм ачылды

2021-жылдын күзүндө окуучулар демөөрчүлөрдүн колдоосу менен АКШнын жана Европанын окуу жайларына жиберилет. Бул тууралуу Хабиб Арзыкулов Sputnik Кыргызстан радиосунун эфиринде маек куруп жатып билдирди.

Анын айтымында, чет өлкөдө билим алган тажрыйбалуу адистер уюмдун ишин жүргүзөт. Учурда финансы маселеси иштелип жатат.

"Global Education Foundation (GEF) жалпы билим берүүгө салым кошолу деген жакшы максат менен ачылды. Биз өзүбүз ишкерлик менен алек болобуз. Фонддун түптөөчүлөрү эки киши. Алардын бири — Алмаз Арапов. Ал 3-4 жылдан бери балдарды чет өлкөгө коммерциялык негизде окууга жөнөтүп келген. Анын тажрыйбасын жана менин да ишкерлер менен иштешүү тажрыйбамды эске алып, уюмду ачтык. Чет өлкөдө окуу ар биринин кыялы болуш керек. Ошол себептен сыртта окуп гана калбастан билим, тажрыйба алып, Кыргызстанга келип, өлкөнүн өнүгүшүнө салым кошот деген үмүттөбүз. Балдарды тандап алууда атайын критерийлерди койгонбуз. Тандоо ачык-айкын болушу үчүн билим берүүдө тажрыйбасы бар, таанымал адамдардан комиссия түзөлү деп жатабыз. Алар атайын конкурстук негизде тандашат. Негизги талап англис тилин жакшы билиши керек. Бюджеттик орундарга жараша мыктылары тандалып, чет өлкөгө жөнөтүлөт", — деди Арзыкулов.

Ошондой эле ишкер мугалимдердин кесипкөйлүүлүгүн жогорулатуу максатында тажрыйба алмашуу үчүн чет өлкөгө жиберүү, жакшы окуган окуучуларга стипендия төлөп берүү иштери да пландалып жаткандыгын кошумчалады.

50
Белгилер:
жаштар, чет өлкө, билим берүү
Тема боюнча
Сауд Аравияда докторантурада окуган Дөөлөс: стипендиям 25 миң доллардан ашат

Юпитер планетасынын үстүнөн көрүнүшү. NASA тарткан видео

0
NASA агенттигинин планета аралык "Юнона" станциясы Юпитерге 2016-жылдан бери байкоо жүргүзүп келет. Күн системасындагы эң чоң планетага жетүү үчүн космос кемеси беш жыл убакыт короткон.

Видео атайын аппараттын жардамы менен тартылган 41 сүрөттөн куралган. Анда көрүүчү Юпитер асмандан кандай көрүнөрүн байкай алат.

"Юнона" миссиясынын максаты Юпитерди дагы да терең изилдөө болуп саналат. Бул планеталар аралык станция 1995-2003-жылдары ири планетаны айланган экинчи космос кемеси болуп калды. Алгач ирет "Галилео" станциясы тегерете байкоо салган.

0
Белгилер:
Юпитер, видео, планета, NASA
Тема боюнча
Кайнап жаткан кадимки Күн планетасынын үстүнөн көрүнүшү. Видео, сүрөт