Ырчы Мирбек Атабеков интервью учурунда. Архив

Мирбек Атабеков менен болгон ачык маек: күйөрман кыздарым менен мамиле түзбөйм!

(жаңыланган 13:34 17.05.2016)
Ата мекендик жылдыздардын кежирлиги жана "жылдыз" оорусунун белгилери кандай болорун Sputnik кабарчысы Асел Минбаева билип көрдү.

Борбор калаанын атка минер айымдарынын телефонуна чалсаң, дайыма: "You are the only one/ You must believe me/ You are my destiny/ That gives the sense to me!" деген ыр угулар эле. Ал мага жагып калгандыктан (айым эмес, ыр) Гуглдан издей баштадым. Көрсө, аны чет элдик жылдыз эмес эле, өзүбүздүн Мирбек Атабеков ырдайт экен. 

Мына, эми ал менин маңдайымда мейманда отурат. Кызмат абалымдан пайдаланып, баягы ырды ырдап берчи деп ушунча айткым келди дейсиз! Азамат экем, өзүмдү кармап калдым. 

— Чынында биздин сүйүктүү Мирбек Атабековго караганда, россиялык ырчы Нюшаны табыш бизге оңоюраак болду. Журналисттер менен сүйлөшкөндөн тажасаңыз керек?

— Баары менин иш тартибимдин айынан! Ушул гана себептен биз көпкө чейин жолугуша албай жаттык. Журналисттер жөнүндө айтсам, сиз айткандай эмес, тескерисинче, ыраазымын. Мени менен угуучулардын ортосунда көпүрө жараткан силерсиңер да. Жөн гана кээде адамдарды тажаткандан корком. 

— Маек учурунда сизди ырдап бер деп көп суранышат. Кыжырыңызды келтирсе керек? 

— Жок, кыжырлантпайт. Кечинде же түштөн кийин эч оорчулук жаратпайт. Жан дилим менен ырдап берем. Ал эми эртең менен ырдоо татаалыраак — үнүңдүн ойгонушу убакытты талап кылат. Бирок баары бир баш тартпаганга аракет кылам. 

Популярный кыргызский певец Мирбек Атабеков во время интервью. Архивное фото
© Sputnik / Табылды Кадырбеков
Атактуу ырчы Мирбек Атабеков интервью учурунда

— Өзүңүздүн райдериңиз барбы? Бөтөнчө бир нерсе талап кыла аласызбы?

— Бизде Кыргызстанда андай мүмкүн эмес. Бишкекте го макул, бирок аймактарда өзгөчө бир нерсе талап кылуу — деги эле акылсыздык! Биз анчалык эрке же кежир эмеспиз, тарбиябыз ошондой. 

— Сиз дүкөндө картошканын же байпактын баасын карап жатканыңызды көргөндө эл эмне кылат?

— Мени ар ким эле тааный бербейт, биздин өлкөдө музыкага баары кызыкпайт. Көбүнчө Мирбек Атабековдун инисиндей карашат, телеэкранда улуураак, толугураак көрүнөм да. Камералардын иштегени ошондой — салмагыңды көбөйтүп коюшат. 

— Фанат кыздар сизди белек-бечкекке бөлүп-жыртып кеткенге аракет жасаган учурлар көппү?

— Мен үйлөнгөндөн кийин андайлар токтойт деп ойлогом. Бирок кыздар баары бир мени кучактаганга, өпкөнгө аракет кылышат, ыйлагандары көп. 

— Аларга мунун кереги канча? Сизден аларга эмне керек: сүйүүбү, "жалындуу" түнбү, достукпу же эмне?

— Өзүм да билбейм. Бирок мен алардын ар бирин баалайм. Албетте, айрымдары кумирлерин алмаштырышат, бирок бүтүндөй чыгармачылык жолуңда сага берилгендер да болот. Андыктан, алардын бар экенине рахмат.

— Күйөрманыңыз менен, кур дегенде, бир жолу мамиле түзүп көргөнсүзбү? Жок дегенде, үйлөнгөнгө чейин?

— Жок. Мамиле түзөрдөн мурун, бири-бириңди жакшы билишиң керек. Кыздарды өзүмө тартыш үчүн өз атымды пайдалангым келбейт. Бул наадандык. 

— Сизди жактырган айым-кыздар толтура. Эмне үчүн жубайлыкка Мээримди тандадыңыз?

— Ал мени дайыма колдойт, меники туура эмес болсо да анысынан жазбайт. Аял күйөөсүнө ишенип жана ага таянышы керек деп эсептейм. Менин жубайымдын да түшүнүгү ушундай. Ал мени менен атаандашканга аракет жасабайт.

Андан дагы анын таарынычы бат жазылат. Аял кишиде мындай сапат өтө маанилүү. 

Популярный кыргызский певец Мирбек Атабеков во время интервью. Архивное фото
© Sputnik / Табылды Кадырбеков
Мирбек Атабеков: Менин сырым — репертуарымда. Бир ырды айлап, жылдап жазган учурлар болот. Композиция кынтыксыз болуп, бардык жагынан көңүлүмө толмоюн, аткарбайм!

— Сиздин көз карашыңызча, кыргызстандык аткаруучуларга эмне жетпейт?

— Жетпеген нерсе көп. Менде да кемчиликер бар. Мисалы, биз жалкоо элбиз. Дүйнөлүк деңгээлдеги жылдыздарга салыштырганда, мен таптакыр эле жалкоомун. Аларда ар бир секунд бош эмес. Мен аларга көз артып да кетем, ушунчалык катуу атаандашып турушат дейсиз. 

— Иш күнүңүз канчага созулат?

— Күндүзгү саат 12ден түн ортосуна чейин. Дегинкиси мен таңкы саат алтыда деле тура алам, анда көбүрөөк ишке убактым жетмек. Бирок артист жок дегенде 8-9 саат укташы керек.

— Кыргызстанда мыкты ырдаган жаш жигиттер көп турса, эмнеге сизди баарынан жакшы көрүшөт? Сырыңыз эмнеде?

— Менин сырым — репертуарымда. Бир ырды айлап, жылдап жазган учурлар болот. Композиция кынтыксыз болуп, бардык жагынан көңүлүмө толмоюн, аткарбайм!

Анан албетте, окуш да керек. Эч билими жок эле көчөдөн келген киши банкты ийгиликтүү башкара алат деп күтпөйсүз да, туурабы? Эстрадалык иште деле өз бөтөнчөлүктөрү бар: музыкалык терминдерди билиш керек, машыгыш керек. 

Атайын билими болбосо эң шыктуу адам да туура-так ырдай албайт. Мен башында обондун ыргагын да туура келтире албай койгом. 

— Кайсы бир аткаруучу укмуштай сонун ыр ырдап чыкса, көңүлүңүздүн тереңинде ич тардык кыласызбы?

— Негизи биз ынтымактуубуз. Бирге футбол ойнойбуз, ал тургай өзүбүздүн командабыз бар. Бирок канчалык танбайлы, аз да болсо бири-бирибизге көрө албастык болушу мүмкүн. Дегинкиси ошондой эле болушу керек, бул өнүгүп-өрчүшүңө жакшы түрткү берет. 

— Ийгиликтин чокусунда турганыңызды, турмушуңуз оңунан чыкканын кайсы учурда сездиңиз? 

— Жашоомдо калыптанып бүттүм, баралыма толук жеттим деп айта албайм. Биз, пенделер, эмнени кааларыбызды жакшы түшүнбөйбүз. Дайыма издөөнүн үстүндөбүз. Бирок мен популярдуу болгонумду биринчи жолу сезгенимди эстей алам. 

Анда Ошто Темир Назаровдун концертинде ырдап жаткам. Менин ырларым радиодон жаңы эле бериле баштаган болчу. Клип, эч нерсем жок эле. Алып баруучу мени жарыялаганда көрүүчүлөр катуу кол чаба башташты. Бул менин кичинекей даңкка жеткеним болчу. 

— "Жылдыз" оорусунун кандай белгилерин сездиңиз?

— Андай оорунун терс таасирлерин сезерим менен, "ден соолукка" сак болуш керектигин түшүндүм. Мен ал оорунун ашыкча текеберлик жана өзүмчүлдүк сыяктуу белгилерин айта алам. Адам дароо эле көп нерсени талап кыла баштайт. 

— KG Club деген ырда: "Москвада Билан, бизде Атабеков, аларда "Спартак", бизде Атабеков, ал жакта Кремль турса, бизде Атабеков, кыскасы, укмуш сонун Мирбек!" деген сөздөр бар. Муну укканда оюңузга эмне келди?

— Муну Элдияр Кененсаровдун оозунан угуш аябай жакты. Ал ата мекендик КВНде эң биринчи орунда эмеспи!

Популярный кыргызский певец Мирбек Атабеков во время интервью. Архивное фото
© Sputnik / Табылды Кадырбеков
Мирбек Атабеков: Менин көрүүчүлөрүм мага бөлөк-бөтөн эмес, ошон үчүн аларды жер-жерлеп бөлгүм келбейт. Бишкекте, Ошто, Нарында — деги эле бардык жерде — менин чыгармачылыгымды сыйлаган адамдар бар.

— Сиз өлкөнүн бардык жерине гастролго барасыз. Бишкектин көрүүчүлөрү, мисалы, Нарындыкынан же Оштукунан айырмаланабы?

— Менин көрүүчүлөрүм мага бөлөк-бөтөн эмес, ошон үчүн аларды жер-жерлеп бөлгүм келбейт. Бишкекте, Ошто, Нарында — деги эле бардык жерде — менин чыгармачылыгымды сыйлаган адамдар бар. Болгону, менин байкаганым, ар кайсы облуста ар башка ырды көбүрөөк жактырышат: Баткенде бирөөнү болсо, Бишкекте экинчисин сурашат. Мүмкүнчүлүктөн пайдаланып, сүйүктүү угуучуларыма рахмат айткым келет!

— Сиз той-үлпөттөрдө да ырдайсыз да. Бөтөнчө бир нерсе жасап бер деп сураган учурлар болгонбу?

— Биздин элде өтө аша чапкандык деле болбойт. Бир жолу менден айымдар аткаруучу "Жар-жар" деген ырды ырдап бер деп сурашты. Аны кыз-келиндер гана аткара турганын түшүндүргөм. 

Дагы бир жолу бизди бир кыздын туулган күнүнө чакырышты. Келсем, ошол кичине кыз менен эле анын жалгыз досунун алдында ырдаш керек экен. Ата-энеси гонорар төлөп бергенине карабай, мен үчүн ырдаш ыңгайсыз болгон. Ошондон кийин жок дегенде 50-60 киши болсо гана ырдап чыкканга аракет кылабыз. 

— Дүйнөлүк жылдыздардын кимиси менен бир сахнага чыгып ырдайт элеңиз?

— Бейонсе менен. Ал азыр дүйнөдө биринчи турат.

— 20 жылдан кийин сиз кандай болосуз?

— Сырткы келбетим сакталып каларбы же калбайбы, билбейм, бирок жүрөгүмдө жаш бойдон каларым анык! Аябай жакшы үн жазуучу студия ачсам дейм. Жаш аткаруучуларга жардам бергим келет. Дагы эмне? Пландарым, тилек-ойлорум көп!

Белгилер:
шоу-бизнес, эстрада, ырчы, Мирбек Атабеков
Тема боюнча
Өлүм алдында жаткан кыз кантип Кыргызстандын сулуусу болду
Дүйнөнү дүңгүрөткөн Атай Өмүрзаковдун 10 ийгилиги
Бишкекте Абхазиядан алып келинген автоунаалардын ээлери нааразычылык акциясына чыгышты

Бишкектин борбордук аянтында кайрадан митинг өтүүдө. Видео

(жаңыланган 14:33 19.04.2021)
Өкмөт үйүнүн жанында 100дөй киши чогулган. Алар Кыргызстанга Абхазия өлкөсүнөн келген унааларды мыйзамдаштырууну талап кылышууда.

БИШКЕК, 19-апр. — Sputnik. Бишкекте Абхазиядан алып келинген автоунаалардын ээлери нааразычылык акциясына чыгышты. Бул тууралуу Sputnik Кыргызстан агенттигинин кабарчысы жеринен билдирди.

Өкмөт үйүнүн жанында 100дөй киши чогулган. Алар адегенде бир убакта сигнал басып, Садыр Жапаровдун жолугушууга чыгышын талап кылышкан. Милиция ызы-чуу чыгарууга жол берилбей турганын айткандан кийин чогулгандар Өкмөт үйүнүн парад өтүүчү жагына барышкан.

Нааразычылыкка чыккандар Кыргызстанга ташылып келинген абхазиялык номер тагылган автоунааларды мыйзамдаштырып берүүнү талап кылышты. Алардын алдына өкмөттүн өкүлү чыгып, көйгөйдү чечүүнүн жолдорун талкуулашты.

Абхазиядан алынган унааларга байланыштуу чуу

Кыргызстанда Абхазиядан алынган унааларды аныктоо боюнча рейд жүрүүдө. Себеби мындай унаалар ЕАЭБдин бажы мыйзамдарын бузуу менен алып келинген. Болжол менен онго жакын машина айып короого токтотулган.
Мындан улам Ала-Тоо аянтында жана өкмөт үйүнүн алдында Абхазиянын номери тагылган унаалардын ээлери митингге чыгышты. Алар Республикага буга чейин кирип кеткен автолорду мыйзамдаштырып берүүнү талап кылышууда. Айдоочулар буга чейин эскертүү берилбегенин билдирип, нааразы болушту. Митингчилер унааларын насыяга алгандар бар экенин, айрымдары такси айдап үй-бүлөсүн багарын айтышты.

Өткөн аптада Экономика жана финансы министрлиги абхазиялык номер тагылган унааларды мамлекет алып коюшу мүмкүн экенин эскерткен

Белгилер:
талап, унаа, номер, Абхазия, митинг
Тема боюнча
Министрлик: Абхазиянын номери тагылган унааларды мамлекет алып коюшу мүмкүн
Кыргызстандык делегация Россиянын Екатеринбург шаарында өткөн Жай - 2021 деп аталган туристтик көргөзмөсүнө катышты

Кыргызстандын өкүлдөрү Екатеринбургдагы туристтик көргөзмөгө катышты

(жаңыланган 14:04 19.04.2021)
Көргөзмөдө делегация мүчөлөрү Ысык-Көл аймагынын туристтик мүмкүнчүлүктөрү менен тааныштырып, ал катышуучулардын жана коноктордун кызыгуусун арттырды.

БИШКЕК, 19-апр. — Sputnik. Кыргызстандык делегация Россиянын Екатеринбург шаарында өткөн "Жай - 2021" деп аталган туристтик көргөзмөсүнө катышты. Бул тууралуу өлкөнүн Тышкы иштер министрлиги кабарлады.

  • Стенд Кыргызской Республики на международной туристической выставке ЛЕТО-2021 в Екатеринбурге
    Кыргызстандык делегация Россиянын Екатеринбург шаарында өткөн "Жай - 2021" деп аталган туристтик көргөзмөсүнө катышты
    © Фото / пресс-служба МИД КР
  • Стенд Кыргызской Республики на международной туристической выставке ЛЕТО-2021 в Екатеринбурге
    Иш-чара 16-17-апрель күндөрү өттү. КР делегациясына Екатеринбургдагы Башкы консулдук колдоо көрсөткөн.
    © Фото / пресс-служба МИД КР
1 / 2
© Фото / пресс-служба МИД КР
Кыргызстандык делегация Россиянын Екатеринбург шаарында өткөн "Жай - 2021" деп аталган туристтик көргөзмөсүнө катышты

Иш-чара 16-17-апрель күндөрү өттү. КР делегациясына Екатеринбургдагы Башкы консулдук колдоо көрсөткөн.

"Делегация курамына өкмөттүн Ысык-Көл облусундагы өкүлү Элчибек Жантаев, Кыргызстандын Екатеринбургдагы башкы консулу Руслан Бийбосунов, Экономика жана финансы министрлигинин алдындагы Туризм департаментинин директору Самат Шатманов жана Ысык-Көлдөгү санаторийлердин өкүлдөрү катышты", — деп айтылат маалыматта.

Жарманкеде Ысык-Көл облусуна өзгөчө "Өнөктөш регион" статусу берилгени айтылат.

Иш-чарада делегация өкүлдөрү Ысык-Көл аймагынын туристтик мүмкүнчүлүктөрүн көрсөтүштү. Бул өз кезегинде катышуучулардын жана коноктордун кызыгуусун арттырды. Мындан сырткары, алар кызматташуу боюнча россиялык жана чет өлкөлүк кесиптештери менен көптөгөн жолугушууларды өткөрүп, бир катар макулдашуу жана келишимдерди түзүүгө жетишкен.

Иш-чарада Кыргызстандын көргөзмө павильону кызыктуу, мыкты жасалып, катышуучулар жана коноктор көп киргени айтылат. Аны Екатеринбург шаарында жашаган мекендештердин колдоосу менен Башкы консулдук жасаган. Келгендердин баары улуттук суусундуктардан, боорсок жана кургатылган жемиштерден ооз тийип кетишкен.

"Кыргыз делегациясы "Жай - 2021" эл аралык көргөзмөдө Челябинск облусунун туристтик чөйрөсү жана ири өнөр жай ишканаларынын профсоюзу менен жолугушууларды өткөрдү. Анын жыйынтыгы менен Екатеринбург – Тамчы (Ысык-Көл) авиакаттамын ачуу, кызматташуунун кошумча мүмкүнчүлүктөрү жана Кыргызстанга Россиянын Урал аймагынан туристтердин агымын арттыруу маселелери каралган", — деп айтылат билдирүүдө.

Көргөзмө Россиянын Федералдык туризм агенттигинин, Свердлов облусунун инвестиция жана өнүгүү министрлигинин, Россиянын туриндустрия союзунун колдоосу менен Урал туристтик ассоциациясы тарабынан уюшулду. Ага Кыргызстандан тышкары Армения, Болгария, Чехия, Хорватия, Малайзия, Израиль жана башка өлкөлөрдүн делегациялары катышкан.

Белгилер:
Ысык-Көл, катышуучу, көргөзмө, Екатеринбург, Россия
Тема боюнча
Кадыралиев: бизге туристтер көбүнчө Казакстандан жана Россиядан келишет
ТИМ башчысы КМШдагы кесиптештери менен маанилүү документтерге кол койду