БИШКЕК, 27-май — Sputnik. Бүгүн Кыргызстандагы көрүнүктүү мамлекеттик жана коомдук ишмери, кыргыз интеллигенциясынын түптөөчүлөрүнүн бири Зууракан Иманкалыкованы эскерүү кечеси өтөт. Бул туурасында анын туугандары, иш-чаранын уюштуруучулары кабарлашты.
Иманкалыкова өзүнүн өмүрүнүн чейрек кылымын кыргыз парламентине арнап, кезегинде Кыргыз ССРинин Жогорку Советинин төрагасынын орун басары болуп жыйырма жылга чукул иштеген. Үч ирет Кыргыз ССРинин депутаттыгына шайлаган.
Иманкалыкова кыргыз улутунун интеллигенциясынын түптөөчүлөрүнүн башында турганын айтышат. Элеттен таланттуу жаштарды жыйнап, идиректүүлөрүн жогорку окуу жайларга окууга багыттап, камкордук көргөндүгүн эскеришет.
Кыргыз ССРинин парламентиндеги ишмердигин Иманкалыкова президиумдун аппаратында бөлүм башчы катары уюштуруу иштери маселелери, ошондой эле мунапыс жана сыйлык маселелери боюнча иштөө менен уланткан.
Замандаштары ал жаш кезинен тарта эле ири коллективдерди башкарып, респубиликанын ак кар, көк муздуу жерлерин тынбай кыдырып, эмгек артынан түшкөн каарман болгондугун айтышат.
Ал Исхак Раззаков, Леонид Брежнев, Төрөбай Кулатов, Константин Юдахин, Күлүйпа Кондучалов, Аалы Токомбаев, Чыңгыз Айтматовду жакындан билип, тыгыз иштешкен.
Иманкалыкова мамлекеттик ой жүгүртө билүүсү, бийик руханий сапаты, акыйкаттуулугу жана кандай гана маселе болбосун аны оң чече билүүсү менен айырмаланган.
"Ал биз үчүн Кыргызстандын элине берилип жана ак дилден кызмат кылуунун үлгүсү болчу",— деп эскеришкен анын замандаштары.
Бүгүнкү кечеде анын достору, туугандары, тарбиялануучулары, ал калыптандырып кеткен интеллигенция өкүлдөрү келип, бул тарыхый инсан туурасында айтып беришет.
Зууракан Иманкалыкова 2011-жылы Бишкек шаарында каза болгон.
Кечеге келгендер уюштурулган фотокөргөзмө, анын документтери, грамоталары, ал тууралуу басылмаларга чыккан макалалар менен таанышууга мүмкүнчүлүк алат.
