Жапаров аскер кызматкерлеринин үйлөрдү менчиктештирүүсүнө каршы чыкты

БИШКЕК, 2-июн. — Sputnik. Жогорку Кеңештин пленардык жыйынында Турак жай кодексине өзгөртүүлөрдү жана толуктоолорду киргизүү жөнүндө мыйзам долбоору каралды.

Анда Куралдуу Күчтөрүндө кеминде 20 жыл кызмат өтөгөн аскер кызматкерлерине, ошондой эле кызмат учурунда курман болгон жоокерлердин үй-бүлөлөрүнө кызматтык турак жайды акысыз жеке менчикке берүү сунушу берилген. Анын демилгечиси V чакырылыштын депутаты Ыргал Кадыралиева болуп эсептелет. 

Аталган мыйзам долбоор Экономикалык жана фискалдык саясат боюнча комитетте каралып четке кагылгандыгы тууралуу комитеттин мүчөсү Гүлшат Асылбаева билдирди. 

"Бир Бол" фракциясынын депутаты Акылбек Жапаров комитеттин мындай чечимин колдой турганын билдирип, башка кесиптештерин да каршы добуш берүүгө чакырды. 

"Аскер кызматкерлери киреше салыгынан бошотулган. Социалдык фондго дагы акча которушпайт. Мындан улам мамлекеттик бюджеттен социалдык фондго 7,5 миллиард сом төлөнүп жатат", — деп билдирди Жапаров. 

Депутат алты саны аман аскер кызматкерлери 40 жашта эле пенсияга чыгарын, ал эми мүмкүнчүлүгү чектелген жарандарга 5 миллиард 200 миллион сом каралганын белгиледи. 

"Эми үйлөрдү менчиктештирүүгө бере баштасак алапайыбызды таппай калабыз", — деп кошумчалады депутат. 

Мыйзам долбоор экинчи окууда добуш берүүгө жөнөтүлдү.