БИШКЕК, 15-июн. — Sputnik. Өкмөт башчы Сооронбай Жээнбеков Бишкек — Нарын — Торугарт унаа жолундагы Чу дарыясы жээгин алып кеткен аймак менен жеринен таанышты.
Эске сала кетсек, Чу дарыясы нугунан көтөрүлүп, Бишкек — Нарын — Торугарт автожолунун бир бөлүгүн жеп кеткен.
Өзгөчө кырдаалдар министринин орун басары Нурбек Сыдыгалиевдин айтымында, окуя 9-июндан 10-июнга караган түнү болгон. Күндүн ысыгынан улам мөңгүлөр эрип, Чу дарыясынын ташкындоосуна алып келген.
Премьер-министр Жээнбеков Чүй облусунун губернатору Бактыбек Кудайбергеновго, ӨКМ жана Коммуникация жана транспорт министрлиги менен биргеликте маселени тез арада чечүүгө жана дарыя жээктерин бекемдөө боюнча тапшырма берди.
