Facebook социалдык тармагынын Atai Omurzakov аттуу колдонуучусунун бетинен тартылган кадр. Архив

Атай Өмүрзаков эл чогулткан каражаттан баш тартты

1798
(жаңыланган 14:14 22.06.2016)
Бийчилерге 3D форматындагы бий шоусун уюштуруу боюнча сунуш түшкөн. Аны ишке ашыруу үчүн 200 миң долларга жакын каражат керектелмек.

БИШКЕК, 22-июн. — Sputnik. Белгилүү бийчи Атай Өмүрзаков марафондон чогулган каражатты албай тургандыгын Facebook баракчасына жазып чыкты. 

Эске салсак, 2015-жылы Атай Өмүрзаков менен анын тобу Германия менен Англиянын дүйнөлүк масштабдагы продюсердик компанияларынан сунуш алган. Негизги максат 3D форматындагы бий шоусун уюштуруп, аны дүйнөнүн эң чоң сахналарынан көрсөтүү болгон. Бирок аны ишке ашыруу үчүн 200 миң долларга жакын каражат керектелмек. 

"Биздин долбоордун ишке ашып кетүүсүнө колдоо көрсөткөн мекендештериме ыраазычылык билдирем. Бардыгыңыздарга белгилүү болгондой Кайрат Бекмамбетов аттуу мекендешибиз бизге колдоо көрсөтүү үчүн марафон уюштурган. Өз салымын кошкусу келгендер абдан көп болуптур, чоң суммадагы каражат чогулду", — деп билдирди Өмүрзаков. 

Белгилүү бийчи каражатты мындай жол менен издөөнү каалабагандыгын билдирип, чогулган каражатты муктаж балдарга берүү чечимине келгенин белгиледи. 

"Долбоордун каражат жактан пайда алып келе турган коммерциялык жайы бар. Буга байланыштуу биз өзүбүздүн сунушту бизнесмендер менен инвесторлорго багыттаган элек. Ушул жол менен каражат издөөнү уланта беребиз", — деп билдирди бийчи.

Белгилей кетсек, Атай Өмүрзаков буга чейин социалдык тармактагы баракчасына колдоо көрсөткөн инвесторлор чыгымын бир эле жылда актап ала тургандыгын билдирген. 

1798
Белгилер:
бий, инвестор, долбоорлор, каражат, Атай Өмүрзаков
Тема боюнча
Атай жана "Тумар КР" тобу британиялык сынактын финалына чыкпай калды
Дүйнөнү дүңгүрөткөн Атай Өмүрзаковдун 10 ийгилиги