Германиянын федералдык канцлери Ангела Меркель. Архив

Кыргызстандагы бейөкмөт уюм Аскаровду абактан бошотууну Меркелден суранып жатат

267
(жаңыланган 10:48 11.07.2016)
Бейөкмөт уюм Германиянын канцлери ЕККУдагы төрайымдык мүмкүнчүлүгүн колдонуу менен Азимжан Аскаровду абактан чыгаруу жолдорун узартпастан таба тургандыгына үмүт артат.

БИШКЕК, 10-июл. — Sputnik. Журналисттерди коргоо комитети бейөкмөт уюму Германиянын канцлери Ангела Меркелге кайрылып улут аралык чыр тутантууга айыпталып өмүр бою эркинен ажыратылган Азимжан Аскаровду бошотууга жардам көрсөтүүнү суранышты. Мындай кайрылуу укук коргоо уюмунун расмий сайтына жайгаштырылган. 

"Журналисттерди коргоо комитети Сизди (Ангела Меркель) өлкө жетекчилеринин көңүлүн абактагы Азимжан Аскаровго буруп, анын эркиндикке чыгышына жардам көрсөтүүнү суранабыз. Президент Алмазбек Атамбаевди БУУнун адам укуктары боюнча комитетинин чечимин карманууга чакырышыңызды өтүнөбүз. Аталган комитет Аскаровду күнөөсүз деп таап, анын бошотулушун талап кылган эле", — деп айтылат Меркелге жолдонгон кайрылууда.

Германиянын федералдык канцлери Ангела Меркель президент Алмазбек Атамбаевдин чакыруусу менен Кыргызстанга 13-14-июлда келет

"Биз Сиздин Кыргызстандын жетекчилери менен Азимжан Аскаров боюнча жүргүзгөн буга чейинки сүйлөшүүлөрүңүздү терең урматтайбыз жана дагы ЕККУдагы төрайымдык мүмкүнчүлүгүңүздү колдонуу менен Азимжан Аскаровду абактан чыгаруу жолдорун узартпастан таба тургандыгыңызга үмүт артабыз", — деп кайрылуу жыйынтыкталат. 

Белгилей кетсек, БУУнун адам укуктары боюнча комитетинин доклады 21-апрелде жарыяланган. Анда Азимжан Аскаров абакка мыйзамсыз кесилүү менен кордоого кабылганы жазылган. Комитеттин адистери айыпкердин түрмөдөн бошотулушун талап кылган. Кийнчерээк мындай талаптарга дагы бир нече эл аралык уюмдар кошулушкан

Азимжан Аскаров 2010-жылы улут аралык чыр тутантууга айыпталып өмүр бою эркинен ажыратылган. Ал Бишкек — Ош унаа жолун тосууну уюштургандардын катарында болгону айтылат. Куралсыз 13 милиция кызматкери каршылыкка чыккан элге түшүндүрүү иштерин жүргүзүп жаткан маалда, башаламандык жараткандар аларды сабап, Сулайманов аттуу милиция кызматкерин өлтүрүп туруп, мыкаачылык негизде өрттөп жиберишкен.

267
Белгилер:
суроо-талап, абак, президент, БУУ, Ангела Меркель
Тема:
БУУ комитети Кыргызстанды Азимжан Аскаровду бошотууга чакырды (42)
Тема боюнча
Азимжан Аскаровдун үйү мамлекеттин пайдасына конфискацияланат
Кыргызстанга Германиянын канцлери Ангела Меркель келет