БИШКЕК, 27-июл. — Sputnik. Бишкектеги Жаштар аллеясына коюлган өзгөчө эстеликти сырдап, көркүнө чыгарышты.
"Көз айнек. Көз караш" арт-инсталляциясы сүрөтчүлөрдүн DOXA art-group тобу тарабынан жасалган. Шаршемби күнү, 27-июлда саат 16:00дө анын ачылышы болот.
Бул эстеликтин бийиктиги эки, узундугу алты метр. Анын айнектеринде адам укуктары тууралуу жазуулар камтылган. Долбоордун урааны — "Өз укукгуңду коргоо үчүн аны билүү керек".
"Биз жаштар адам укуктары боюнча көп маселени билбей тургандыктарын көрсөткүбүз келди. Андыктан "көздү ачыш" үчүн Конституцияда жазылган өз укуктарыбызды билишибиз керек", — дейт долбоордун координатору Айжана Боронбаева.
Көз айнек Борбор Азиядагы дебаттар эл аралык билим берүү ассоциациясынын (IDEA CA) тапшырыгы жана "Сорос — Кыргызстан" фондунун Жаштар программасынын каржылоосу менен жасалган.
