Иззат Артыковду күйөрмандары Бишкектен кучак жайып тосуп алышты

БИШКЕК, 12-авг.— Sputnik. Рио Олимпиадасынан коло медаль алган оор атлетчи Иззат Артыков баштаган КР спортчуларын эл аралык "Манас" аэропортунан кыргызстандык күйөрмандар желек жана сүрөөн менен тосуп алды. Ошондой эле Артыковдун туугандары, кош бойлуу келинчеги да келди. Ал Иззат үчүн өзгөчө торт жасаттырган. 

Иззат Артыковго аэрпорттон Токтогул районунун жетекчилиги "Токтогул районунун ардактуу атуулу" наамын тапшырып, сертификат ыйгарды. 

Белгилей кетсек, Иззат Артыков 69 килограммга чейинки категорияда жалпысынан 339 килограмм салмакты көтөрүп, үчүнчү орун — коло медалга ээ болгон.

Балбан учуп келген учак "Манас" аэропортунун босогосун эки жактан аттырылган арка сымал суудан өтүп аттады.

5-августта башталган Рио Олимпиадасында Кыргызстандын намысын 19 спортчу спорттун алты түрүнөн коргоп жатат. Алардын ичинен оор атлетчилер — Жаңыл Окоева, Иззат Артыков, сууда сүзүүчүлөр — Дарья Таланова, Денис Петрашов, боксчу Эркин Адылбек уулу жана дзюдочу Отар Бестаев өз күчтөрүн сынашты. Сууда сүзүүчү Денис Петрашов Рио оюндарында 200 метр аралыкка брасс түрүндө сүзүүдө Кыргызстандын рекордун жаңылады. Ал эми атаандаштарынын ичинен 38-орунду алган. 

Алдыда дагы күрөшчүлөр, жеңил атлетчилер жана дзюдочулар болуп 13 спортчу өлкө намысын коргойт. 

Кыргызстандык спортчулар качан күч сынаша турганын Sputnik Кыргызстан агенттигинин инфографикасынан караңыздар>>