БИШКЕК, 18-авг. — Sputnik. II Дүйнөлүк көчмөндөр оюндары (ДКО) башталганча селдин кесепеттери жоюла тургандыгын Sputnik Кыргызстан агенттигине ДКОнун катчылыгынан кабарлашты.
Эскерте кетсек, нөшөрлөгөн жаандан улам суу Чолпон-Ата шаарындагы 70 турак жайдын короо-жайын, кафе-дүкөндөрдүн имаратын, мындан тышкары, "Рух-Ордо" комплексин каптап кеткен. Окуя болгон жерде ӨКМдин куткаруучулары иштеп, тазалоо иштерин жүргүзүп жатат. Жаңы курулуп бүткөн ипподромго да суу көп келип, ат чуркоочу аянттын 80 метр аралыгын каптап кеткен.
"Ипподромдогу ат майданга чоң доо келтирилген эмес. Учурда чыгымдар эсептелип жатат. Көчмөндөр оюндары башталганча тазаланып бүтөт", — деп кабарлашты катчылыктан.
Экинчи дүйнөлүк көчмөндөр оюндары Ысык-Көлдүн жээгинде 3-8-сентябрь күндөрү өтөт. Мында 35 мамлекеттен келген спортчулар күрөш, салбурун, жаа атуу, интеллектуалдык оюндар жана спорттун башка түрлөрү боюнча ат салышат.
Sputnik Кыргызстан маалымат агенттиги жана радиосу Көчмөндөр оюндарынын расмий медиа өнөктөшү болуп саналат.
