БИШКЕК, 25-авг. — Sputnik. Бишкектик Ольга Сумина "Автоледи-2016" сынагынын жеңүүчүсү атыккандыгы тууралуу Sputnik Кыргызстан агенттигине Кайгуул күзөт милициясынан кабарлашты.
24-август күнү жеңиш аянтында аялдар арасында унааны мыкты айдоо боюнча таймаш өттү. Анда үч жылдан кем эмес тажрыйбасы бар 22-35 жаш аралыгындагы 10 кыз-келиндер катышкан.
Иш-чаранын биринчи этабында катышуучулар өздөрү жана унаасы тууралуу айтып беришкен. Андан кийин жол эрежелери боюнча экзамен тапшырышкан. Үчүнчү этапта айдоочулукту иш жүзүндө көрсөтүшкөн. Ал эми акыркы төртүнчү этапта айдоочу кыз-келиндер өзгөчө кырдаал учурларында өздөрүн кандай алып жүрүшөөрү сыналган.
Сынактын жеңүүчүсү катары Range Rover үлгүсүндөгү унаанын ээси Ольга Суммина атыкты.
Уюштуруучулардын айтымында, биринчи этапта Сумина "Кара жорго" бийин аткарып, лирикалык ыр саптарын окуду. Ал башка тапшырмаларды дагы мыкты аткарган.
Жеңүүчүгө телевизор жана иш-чаранын демөөрчүлөрү тарабынан бир катар белектер ыйгарылды.
Мындай сынак Кыргызстанда экинчи жолу өтүп жатат. Былтыр да аны Кайгуул күзөт милициясы уюштурган.
Өткөн жылкы сынакта Toyota RAV-4 үлгүсүндөгү унаанын ээси Айсулуу Парманова жеңишке жеткен.