БИШКЕК, 5-сен. — Sputnik. II Дүйнөлүк көчмөндөр оюндары башталгандан бери 10 кишиге медициналык жардам көрсөтүлүп, сегиз киши стационардык ооруканага жаткырылганын Саламаттык сактоо министрлигинин маалымат кызматы билдирди.
Чолпон-Ата шаарынын аймактык ооруканасынын директору Альмира Алдашеванын айтымында рентген кабинеттер, лаборатория күнү-түнү иштеп, хирургдар нөөмөттө турушат. Ошондой эле терапевт, гинеколог жана реаниматологдор да күчөтүлгөн тартипте иштеп жатат.
"Ысык-Көл аймактык ооруканасында 90 орун бар. Көчмөндөр оюндарына карата кошумча 20 орун коюлган. Учурда Чолпон-Атадагы аймактык оорукананын дарыгерлери толугу менен даяр. Керектүү дары-дармек менен камсыздалган. Ар бир топтогу кан дагы даярдалган. Кан менен камсыздоодо маселе жок", — деп айтылат маалыматта.
Эске салсак, Кырчын жайлоосунда болгон иш-чарада бир катышуучу чычаңын сындырып алып, ага алгачкы медициналык жардам көрсөтүлгөн.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
