Атактуу эстрада ырчысы Нурлан Насип

Нурлан Насип: ырчы болбосом ушул кыз мени менен таанышат беле деп ойлоном

13890
(жаңыланган 14:30 10.09.2016)
Журналист Гүлдана Талантбекова жылдыздардын атактуулукту көпкө кармап туруусунун сыры жана аны жоготуп алуунун коркунучу кандай болорун билип көрдү.

Бул ирет чыгармасын жаш-кары дебей тыңдаган, өзгөчө жаш балдардын сүймөнчүгү Нурлан Насипти кепке тарттык.

— Азыр сиз чыгармачыл доорду татыктуу сүрүп жаткандайсыз. Сизге анын таасири байкалып жатабы?

— Мен ар дайым өзүмдү эл ичинде чектен ашырбай алып жүргөнгө аракет кылам. Анткени чыгармачыл адам канчалык алдыга жылган сайын айланадагыларга башкача көрүнүшү мүмкүн. Мен азыр кандай болсом жан дүйнөм деле ошондой. Досторум "сенде өзгөрүү деле болгон жок" деп айтып калышат. 

— Кере-кере дем алып сейил бактарды аралап, Ош базар менен Дордойду түрө кыдырып кийинбей калганыңызга көп болсо керек?

— Көп убакыт болду. Кээде буулугуп, ошондой күндөрдү сагынып кетем. Кичине кезимен эле ээн-эркин жүргөндү жактырам. Таанылгандан кийин деле базар аралап, маршруткага түшүп жүрө берчүмүн. Артыңдан ар кандай сөздөр айтылат экен. Анан өзүң эле андай жерлерде жүрө албай калат экенсиң. Бирок кээде бутиктерден таппай калган кийимдерди көз айнек тагынып алып Дордойдон сатып алам (күлүп). Кечээ жакында эле клип тартаарда тандоо көп деп базарга барып келдим.

— Сиз көз айнекти катары менен тагынып барсаңыз деле таанылып калсаңыз керек? 

— Байкап калган сатуучулар кийимдерин дароо кымбаттатып жиберишет. Айрымдар кызыгып сүрөткө түшүп, алганыңды белек кылып же баасын түшүрүп берген учурлар көп кездешет.

Популярный кыргызский певец Нурлан Насип. Архивное фото
© Sputnik / Азамат Тотубаев
Нурлан Насип: күйөрмандарым билдирүүлөрүн жеке баракчаларга жазат. Жолукканда жаныңа келип кучактап, сүйүүсүн билдирип сүрөткө түшүшөт. Мен да аларга жылуу оюмду билгизем. Анан эгер мен ырчы болбосом ушул кыз мени менен таанышат беле деп ойлонуп калам

— Убакыт өткөн сайын кумир менен күйөрмандын ортосундагы тенденция өзгөрүп барат. Кээде ушунчалык ашынган күйөрманыңыз бир селфиге ыраазы болуп калса, капаланбайсызбы?

— Мен жаңы чыгып жүргөндө кулачтаган каттарды алчумун. Азыр жакшы көргөн жылдызыңдын жеке жашоосун социалдык тармактан эле көрүп алсаң болот. Замандын талабы ушундай экен. Бул деле жакшы. Азыр күйөрмандарым билдирүүлөрүн жеке баракчаларга жазат. Жолукканда жаныңа келип кучактап, сүйүүсүн билдирип сүрөткө түшүшөт. Мен да аларга жылуу оюмду билгизем. Анан эгер мен ырчы болбосом ушул кыз мени менен таанышат беле деп ойлонуп калам. 

— Азыр сиз кайсы бир деңгээлде бийиктикте турасыз. Атактуулугуңузду жоготуп алуудан коркпойсузбу?

— Мага ал нерсе көп деле билинбейт. Кандай жүрсөм ошондой эле жүргөнгө аракет жасайм. Ар бир адам атактуулуктун үстүндө жүрүшү үчүн дайыма изденүүдө болушу керек. Элди угуп иштесең артта калбайсың деп ойлойм. Маселен Бек Борбиев замандын талабына ылайык ырларды жаратып эл оозунан түшпөй келет. Бирок чыгармачылыкты эч качан экинчи жумуш катары кабыл албашың керек. Айрым учурларда үй-шартына, жеке жашоосуна байланыштуу же адам сынып калганда чыгармачылык менен коштошуп калышы мүмкүн.

— Аудиторияны дагы да кеңейтүү максатында башка тилдерде ырдап чыгуу оюңузда жокпу?

— Убакыттын өтүшү менен болот. Бирок эмнегедир жүрөгүм кыргызча ырларга жакын. Башка чет мамлекеттерге да таанылайын деген кыялым бар. Биздин кыргызча ырлар чет мамлекетке хит болуп чыгарына ишенем.

— Чет элдик сынактарга катышайын деген оюңуз бар болсо керек?

— Мурун каалоом күч эле. Убакыт өткөн сайын сынакка катышуудан коркот экенсиң. Анткени атың чыгып калгандан кийин мыкты даярданып катышпасаң болбойт. Жан дүйнөм назик. Эгер утулуу ызасын тартып калсам андан "айыгуу" кыйын болуп калышы ыктымал. 

— Эл адамы катары келбетиңизге кантип кам көрөсүз? Албетте чачты түрлөп кыркып, сакал-мурутту аласыз. Бирок бул кам көрүүнүн классикалык ыкмасы. Коррекция, пиллинг дегендей?

— Эркек киши негизи спорт менен машыгышы керек. Мен көптөн бери спорт залга бара албай жүрөм. Жайкысын аллергия боло бергендиктен маанайым көп жерден сууй берет. Анан эми той, концерттерге барарда атайын салондорго чач кырктырганга эле киребиз. Фотосесия кыларда бети-башыма грим коюлат. Ашыкча боёнуп, кашымды коррекциялаткан учурлар болгон эмес. Кудай берген өң-келбетке ыраазы болуп жүрөбүз.

— Бир жолу телепрограммага барганыңызда тишиңизге байланыныштуу куйкум тамашалар айтылды эле. Сиз капа болгон жоксузбу?

— Эми бул нерсеге деле көнүп калдым (күлүп). Ооба, менин тишим чоң жана аралары ачык болгондуктан ар нерсеге окшоштурушат. Өткөндө тамашоуга барсам ал жактагылар тамаша иретинде тийишип жатышты. Анын баарын, албетте, туура кабыл алам. 

Популярный кыргызский певец Нурлан Насип. Архивное фото
© Sputnik / Азамат Тотубаев
Нурлан Насип: үйдөгү гардеробумду карындашым тейлейт. Мен чекесинен кийип турам. Формаларымдын баары сакталуу. Ар бири өзүнчө тарых. Кээде теле-радиолорго барганымда күйөрмандарга ырымдап белек кылып бермей жайым бар

— Азыр күз келип, той-топур көп. Сүйгөн ырчыңдын талантына ошол жактан күбө боло аласың. Анын үстүнө ырчыларыбыз да той вариантындагы ырларга өтүп алышты окшойт?

— Кошулам. Анткени элдин талабы ошондой болуп жатпайбы. Ар кандай тематикадагы ырларды жаздырып көрдүк. Бирок эл ал чыгарманы көп укпастан, шаңдуу ырларга басым жасайт. Анан "заманың түлкү болсо түлкү, бөрү болсо бөрү болгонго" туура келет экен. Биздин киреше тапкан булагыбыз — тойлор. Байкап отурсам, коңшу мамлекеттерде да ушундай көрүнүш бар экен. Айылдарга концерт койсоң ашып кетсе 100 сом, райондордо 250 сом. Ошончо чыгым менен баргандан кийин эмгегиң акталбай калат. Тойдо баары жеңил. Анан ошол нерсеге ыктап алдык окшойт. 

— Гардеробуңуз концерттик кийимдерге толсо керек. Сиз аларды сактайсызбы же инилериңиз менен бөлүшөсүзбү?

— Үйдөгү гардеробумду карындашым тейлейт. Мен чекесинен кийип турам. Формаларымдын баары сакталуу. Ар бири өзүнчө тарых. Кээде теле-радиолорго барганымда күйөрмандарга ырымдап белек кылып бермей жайым бар. Болбосо баарын сактап келем. 

— Кандай гана ыр чыгарбаңыз, көбү хитке айланат. Себеби эмнеде? Башка ырчылардан эмне менен айырмаланам деп ойлойсуз?

— Ар бир адамдын кийинүү жана ырдоо стили, элге жаккан манерасы болот. Кээ бир адамдар ырчылардын жүрүм-турумуна карап баа берет экен. Мени кээде чоң эжелер "ии ушул бала жагат, жөнөкөйлүктөн жазба" деп баласындай кучактап бетимен өбүшөт. Айрымдары ырларымды жактырышат. Анан мени кичинекей балдар көргөн жерден карыш жылдырышпайт. Ырчылар ошон үчүн өнөрпоз болуудан мурун адамгерчиликтүү болушу керек деп ойлойм. Ырды хит кылган — эл. 

— Той, концерт, ызы-чуу… уктап эс алуу… анын ортосунда журналисттерге интервью бермей. Бул көнүмүш нерселердин кайталана берүүсүнөн тажаган жоксузбу? 

— Туура айтасыз. Булар көнүмүш адат болгону менен кээде тажатып жиберет. Сүйүктүү жумушуң болгондон кийин кайдыгер карабаганга аракет жасайсың. Радиого барсаң "сүйлөшкөн кызың барбы, жети атаңызды, гимнди билесизби" деген суроолорду көп беришет. Алардан тажабай жоопторун жаңылап бергенге аракет жасайм. Сиз айткандай күнүмдүк жашоодон тажай берип, акыркы күндөрү телефон, бардык байланыштарды өчүрүп тынч жерде эс алып келсем деген ойлор келет. Былтыр Дубайга барам деген планым ишке ашпай калган. Буюрса быйыл ошол жакты мээлеп атам. Буга чейин чыгармачылык менен Америка, Германия, Малайзия, Кытай, Россиянын көп жерлеринде эс алдым. 

— Эмне тууралуу кыялданасыз?

— Акыркы учурларда мени ойлондурган бир нерсе бар. Эркек киши эки нерседен жаңылбашы керек экен. Бири туура тандаган кесип, экинчиси жубайың деп айтылат. Келечектеги жубайым менин кыялымдагыдай болсо дейм. Чыгармачылыкта болушум да аялдан көз каранды. Ал кандай гана чөйрөдөн болбосун, мени ар тараптан колдоп, дем-күч бергени маанилүү. Анан турмуштун ысык-суугунда бирге болсо дейм. Азыр келечектеги жубайым тууралуу көп кыялданчу болдум.

13890
Белгилер:
маек, ырчы, Нурлан Насип
Тема боюнча
Камчы Сарыбаев: кызымдын жентек тоюна Айсулуу Тыныбекова келет деп турам
Азиз Мурадиллаев: кастингге эң акыркы барсам да, Алымбек датканын ролу мага буйруптур
Юридикалык клиникалар ассоциациясынын жетекчиси, илимдин кандидаты Артур Бакиров. Архив

Бакиров: маяна кечиксе иш берүүчү кошумча акы төлөөгө милдеттүү

5
(жаңыланган 14:17 17.05.2021)
Юридикалык клиникалар ассоциациясынын жетекчиси, илимдин кандидаты Артур Бакиров пандемия учурунда маяна берилбей жатса эмне кылуу керектигин айтты.

Эгерде маяна алуучу күн майрам же дем алышка туш келип калса, эмгек акы ошол күнгө чейин алдын ала төлөнүшү зарыл. Бул тууралуу Артур Бакиров Sputnik Кыргызстан радиосунун "Онлайн-адвокат" рубрикасында билдирди.

Бакиров: маяна кечиксе иш берүүчү кошумча акы төлөөгө милдеттүү

Анын айтымында, эмгек акы айына бир жолу сөзсүз төлөнүшү керек.

"Пандемиядан улам иш берүүчүлөр экономикалык кризиске туш болду. Мунун кесепети жумушчуларга дагы тийип, маяна өз учурунда тийбей жатты. Мыйзамга ылайык, эмгек акы айына бир жолудан кем эмес төлөнөт. Эмгек акы төлөө мөөнөтү жамааттык келишимде же уюмдун локалдуу ченемдик актысында белгиленет. Маяна ала турган күн дем алыш же майрамга туш болуп калса, эмгек акы ага чейин төлөнүүсү зарыл. Эмгек келишим токтотулганда бардык төлөнө турган акы иштин акыркы күнүнөн кечиктирилбестен кызматкерге берилет. Иш берүүчү эмгек, өргүү жана башка акыларды төлөөнүн мөөнөтүн бузганда ар бир күн үчүн төлөнбөгөн сумманын 0,15 пайызын кошуп төлөөгө милдеттүү. Жумуштан бошотулган учурда иш берүүчү эсептешүү күндөн кечиктирген каражаттын 0,5 пайзын ар бир күн үчүн кошуп төлөшү керек", — деди Бакиров.

Юрист пайыздардын жалпы суммасы негизги төлөнө турган каражаттын 200 пайызынан ашпашы керектигин кошумчалады.

5
Белгилер:
жумушчу, маяна, юрист, Артур Бакиров
Тема боюнча
Юрист саатына акы төлөө эмгек тутумунун күнгөй-тескейин айтып берди
Туризм боюнча эксперт Айша Мамбеталиева

Мамбеталиева: чет өлкөдөн вакцина алган туристтер келе баштады

3
(жаңыланган 14:12 17.05.2021)
Туризм боюнча эксперт Айша Мамбеталиева учурда өлкөдө туризм акырындан жанданып, көбүнесе вакцина алган саякатчылар келе баштаганын билдирди.

Былтыр сырткы туризм такыр токтоп калса, быйыл вакцина алгандар, ооруп айыккандар жана санитардык нормаларды жакшы сактагандар келе баштады. Мындай пикирин Айша Мамбеталиева Sputnik Кыргызстан радиосуна маек куруп жатып маалымдады.

Мамбеталиева: чет өлкөдөн вакцина алган туристтер келе баштады

Анын айтымында, пандемияга карабастан Кыргызстан туризм үчүн ачык.

"Туризм тармагы пандемияга байланыштуу абдан жабыр тартты. Өткөн жайда өлкөгө сырттан туристтер келген эмес. Быйыл акырындап көбөйө баштады. Алар — вакцина алып, санитардык нормаларды сактап жана ооруп сакайгандар. Адамдар эки жылга чукул карантиндик абалда отуруп, ар кандай стресске туш болду. Мындай жагдайдан чыгуу үчүн саякаттоо эң мыкты жол болуп саналат. Соңку учурда активдүү жаштар көбөйдү. Учурда туристтердин ПЦР-тест тапшырып өлкөгө кире берүүгө мүмкүнчүлүгү бар. Тилеке каршы, бул жаатта бир топ көйгөйлөр чыгууда. Ошол эле авиакаттамдар менен учуп келүү кымбат болуп жатат. Көп өлкөлөрдөн түз рейс жоктугуна байланыштуу туристтер Түркия же Россия аркылуу келүүгө мажбур. Мындан тышкары, маркетинг жаатында аксап жатабыз. Ушул багыттарда аракет көрүү зарыл. Экологиялык, тоо туризми жана Жибек Жолундагы өлкө катары өзүбүздү көрсөтүүбүз керек. Чындап алганда өлкөнүн туристтик потенциалы абдан эле чоң. Бул жакка келип кайра кетип жаткан туристтердин арасында сурамжылоо жүргүзгөндө табияттын кооздугун, элдин меймандостугун баалашат", — деди Мамбеталиева.

Ошондой эле ал туристтер көбүнчө аймактарды, ал жактагы карапайым калкты көрүүнү каалай турганын кошумчалады.

3
Белгилер:
пандемия, БУУ, туризм, Айша Мамбеталиева
Тема боюнча
Шатманов: Кыргызстандын кооз жерлерин онлайн саякаттаса болот
Centerra Gold Inc. компаниясынын кызматкери. Архив

Сүйлөшсөк да, ажырашсак да болот. Кыргыз бийлиги "Кумтөргө" кандай шарт коюуда

0
(жаңыланган 14:33 17.05.2021)
Жапаровдун айтымында, Кумтөр улутташтырылбайт, бирок кыргыз элине кызмат кыла тургандай механизм даярдалып жатат.

БИШКЕК, 17-май — Sputnik. Кыргыз бийлиги Centerra Gold Inc. компаниясы менен ажырашса да, сүйлөшсө да болот. Бул туурасында Кумтөрдүн ишмердүүлүгүн текшерген мамлекеттик комиссиянын төрагасы Акылбек Жапаров билдирди.

Ушу тапта Жогорку Кеңеш Кумтөр кениндеги ишмердүүлүктү текшерген мамлекеттик комиссиянын корутундусун угуп жатат.

Жапаров кыргыз тарап койгон шарттарды атап, эгер Кумтөр тышкы башкарууга өтө турган болсо, кенди чет өлкөнүн инвесторлору эмес Кыргызстан өзү иштете турганын белгиледи.

"Бүгүнкү күндө бизнес долбоорду, каржылык анализди бүтүрдүк. Биздин да, алардын да доосу бар. Бирок ортодо сүйлөшүүгө келсек болот. Азыр эки жолу бар, ажырашсак да, сүйлөшсөк да болот. Бирок алтындын 80 пайызы кыргыз тарапта болгондон кийин Centerra компаниясынын 50 пайыздан ашык акциясы бизде болсо макулбуз. "Кумтөр Голд Компаниде" бери дегенде 90 же 80 пайызга чейин биздин үлүш болуш керек. Болбосо толугу менен 100 пайызын биз алалы деген шарт коюп жатабыз", — деди Жапаров.

Ошондой эле ал Кумтөрдү "улутташтыруу" деген сөздү атайын алыстатып жатканын, бирок алтын кени кыргыз элине кызмат кыла тургандай механизм даярдалып жатканын кошумчалады.

0
Белгилер:
Акылбек Жапаров, алтын, бийлик, шарт, Кумтөр, Кыргызстан
Тема:
"Кумтөргө" 3 миллиард доллар айып салынышы
Тема боюнча
Башкы эколог Кумтөр тууралуу: бардык соттук процесстерде жеңерибизге ишенем
Кумтөр маселесин чечүү үчүн АКШ менен Канададан алдыңкы юристтер тартылды
Кыргызстан Кумтөрдү иштетип кетүүгө даярбы? Жапаровдун жообу