Аскер прокурору: ефрейтордун өлүмүнө шектелген жоокер 2 айга камакка алынды

Жазылуу
Учурда Ош гарнизонунун Аскер прокуратурасынын тергөө тобу тарабынан аталган факты боюнча иликтөө иштери жүрүп жаткандыгы айтылды.

БИШКЕК, 13-сен.— Sputnik. Ош шаарындагы №01525 аскер бөлүгүндө каза болгон ефрейтор Ташбалта уулу Эламандын өлүмүнө шектелип 5-6 жоокер эмес, аскер бөлүктүн З.Б. аттуу жоокери соттун чечими менен эки айга камакка алынды. Бул туурасында Sputnik Кыргызстан агенттигине Ош гарнизонунун аскер прокурору Осмон Динмухаммед уулу билдирди. 

"Ташбалта уулу Эламанды бир жоокер эмес, бир нече жоокер ур-соккуга алган деген маалымат чындыкка дал келбейт. Учурда маркумдун өлүмү боюнча медициналык экспертизанын жыйынтыгы чыга элек", — деди ал. 

Буга чейин маркумдун агасы Алмаз Абдакимов инисин "бир-эки аскер эмес, беш-алтоосу сабаган окшойт" деген шектенүүсүн айткан.

"Каргашалуу окуяга шектелип 5-6 жоокер эмес, аскер бөлүктүн З.Б. аттуу жоокери соттун чечими менен эки айга камакка алынды", — деди Осмон Динмухаммед уулу. 

Эске сала кетсек, ушул жылдын 6-cентябрында Оштогу №01525 аскер бөлүгүндө келишимдик негизинде кызмат өтөгөн ефрейтор Ташбалта уулу Эламан менен катардагы жоокердин ортосунда чыр чыгып, окуя ефрейтордун өлүмү менен аяктаган. 

Инцидент со смертельным исходом между ефрейтором-контрактником в войсковой части в Ошской области - Sputnik Кыргызстан
Ошто мушташтан өлгөн аскердин агасы: инимди мыкаачылык менен өлтүрүшүптүр
"Учурда Ош гарнизонунун Аскер прокуратурасынын тергөө тобу тарабынан иликтөө иштери жүрүп жатат. Шектүүгө карата КРдин Кылмыш жаза кодексинин 104-беренеси боюнча денеге атайылап залал келтирген деген айып тагылууда", — деди Осмон Динмухаммед уулу. 

Ал эми маркумдун бир тууган агасы Алмаз Абдакимов Ош гарнизонунун аскер прокуратурасынын "Ташбалта уулу Эламанды бир эле жоокер ур-тепкиге алган" деген маалыматы менен макул эместигин билдирип, учурда алар жалдаган жактоочу ишти териштирип жатканын кошумчалады. 

Ташбалта уулу Эламандын сөөгү 7-cентябрь күнү өзү туулуп-өскөн Ноокат районундагы Алашан айылында жерге берилген. Маркум өз каалоосу менен аталган аскер бөлүктө милдетин өтөп, келишимдик негизде 2016-жылдан баштап иштей баштаган. 

Жаңылыктар түрмөгү
0