Кара-Сууда мүрзөдө адам сөөктөрүн казган чөөлөрдү бүгүн түнү атып жок кылышат

БИШКЕК, 16-сен. — Sputnik. Кара-Суу районундагы Мамажан айылынын жашоочуларынын тынчын алган чөөлөр бүгүн түнү аттырылып, жок кылынат. Бул тууралуу Жоош айыл өкмөтүнүн башчысы Жылдызбек Тиллабаев кабарчыга билдирди.

Анын айтымында, ветеринарлар залалсыздандыруу чараларын көрүштү.

"Чөөлөрдү түнү гана атууга мүмкүн болуп жатат. Учурда Кара-Кулжа районунан төрт мерген чакырттык. Бүгүн түнү менен чөөлөрдү аттырабыз", — деди айыл өкмөт башчысы Жылдызбек Тиллабаев.

Кара-Суу райондук ветеринардык, фитосанитардык коопсуздук боюнча башкармалыгынын башчысы Арстанбек Сулайманов билдиргендей, чөөлөр оору таркатуучу жаныбарлардын түрүнө киргендиктен, атайын адистер Мамажан айылына барып келишти.

"Белгиленген тартипте мал жандыктарын дарылап турабыз. Коркунуч жок", — деди ал.

Ал эми Кара-Суу райондук администрация жетекчилиги окуя боюнча тиешелүү жетекчилерге окуяны иликтөө жана чара көрүү тапшырмасы берилгендигин кабарлашты.

Мындан сырткары, район аймагындагы жолбун иттерди жана чөөлөрдү атууну көзөмөлдөө боюнча чараларды күчөтүү талабы коюлган.