БИШКЕК, 7-окт. — Sputnik. Роза Отунбаеванын суранычы менен Алмазбек Атамбаев Кадыржан Батыров менен болгону бир эле ирет жолукканын президенттин аппараты билдирди.
Маалыматка ылайык, Атамбаев Кадыров менен 2010-жылы апрелде жолуккан.
"Аталган жолугушуу Убактылуу өкмөттүн төрайымы Роза Отунбаеванын демилгеси менен болгон. Ал ошол убактагы биринчи орун басары Алмазбек Атамбаевди өзбек улуттук-маданият борборунун лидерин кабыл алууну суранган", — деп айтылат маалыматта.
Президенттин аппараты Атамбаев буга чейин ал жолугушууда Батыров этникалык азчылыктарды мамлекеттик кызматка алууну суранганын бир нече жолу айтып келгенин кошумчалады. Мындай көйгөй бар экенине негизинен макул болуу менен катар эле Атамбаев Батыровдун дарегине ал жетекчилик кылган "Ватан" ("Мекен") саясый партиясынын этностук өзгөчөлүгү боюнча түзүлүшүнө карата сынын айткан.
Ошол эле учурда 2010-жылдагы окуялар жөнүндө маалыматтын ЖМКларга көп чыгып жатышы, анын ичинде Батыровдун маеги президенттин буга чейин айткандарын тастыктап жатат. Эртеби-кечпи Убактылуу өкмөттүн айрым мүчөлөрү жашырып келген айрым чындыктар элге белгилүү болот.
Президенттин маалымат кызматы Кадыржан Батыровдун өзбек жана кыргыз тилиндеги маектеринин мазмуну бир топ өзгөртүлгөнүн белгилейт.
"Кыргыз тилинде аудио-видео версиянын жоктугу "Азаттык" кыргыз кызматы тарабынан атайы саясий максатты көздөп редакцияланган болушу мүмкүн деген ойго түртөт. Атап айтканда, кыргызча жана орусча тексттеринде Убактылуу өкмөттүн бир мүчөсү менен байланыштары болгону тууралуу Батыровдун сөздөрүн редакторлор "тазалап" коюшканын эксперттер дароо байкашкан. "Эркин Европа" Радиосу /"Эркиндик "Радиосу" администрациясы "Азаттык" кыргыз кызматынын жетекчилеринин саясый жан тартуучулугуна көӊүл буруусу зарыл экенин абдан маанилүү деп эсептейбиз", — деп айтылат маалыматта.
Батыров 2010-жылы этникалар аралык касташууну козуткан деп айыпталып, сыртынан соттолгон.
