БИШКЕК, 10-окт. — Sputnik. Экс-президент Роза Отунбаева Мамлекеттик резиденцияда жашап жатканын КР президентинин иш башкармалыгынын жетекчиси Туруспек Коеналиев Sputnik Кыргызстан маалымат агенттигине билдирди.
Белгилей кетсек, буга чейин социалдык тармактарда жана ЖМКларда экс-президент Отунбаева резиденциядагы үйүнөн чыгарылды деген маалыматтар тараган.
"Мунун баары тең ушак. Роза Исаковнаны чыгарган жокпуз, чыгарбайбыз дагы. Экс-президентти резиденцияга жайгаштыруу боюнча президенттин буйругу бар. Ошонун негизинде эле Роза Отунбаева резиденциядагы үйүндө жашап жатат", — деди Коеналиев.
Отунбаева резиденциядан чыгарылды деген кептин тарашына Эгемендүүлүк күнү Атамбаевдин Убактылуу өкмөттүн дарегине айткан сынынан улам экс-президенттин аянттан кетип калышы түрткү болгон.
Отунбаева 2010-жылдын июль айынан 2011-жылдын декабрына чейин Убактылуу өкмөттү жетектеген.
