БИШКЕК, 26-дек. — Sputnik. Бишкек — Ош унаа жолундагы кооптуу жерлерде кар көчкүсүн атайылап түшүрүү иштери жүргүзүлдү. Бул тууралуу ӨКМ билдирди.
Маалыматка караганда, Генералдык штабдын артиллериялык эсеби кар көчкүсүн Бишкек — Ош унаа жолунун 132-133-чакырымдарында жүргүзгөн.
"Жалпысынан алты артиллериялык снаряд атылды. Анын натыйжасында жалпы көлөмү 500 куб метр болгон кар көчкү түшүрүлүп, унаа жолго жеткен эмес", — деп жазылат маалыматта.
Кар көчкүсүн атайылап түшүрүү иштери 26-декабрь күнү Жалал-Абад облусунун Токтогул районунун аймагында улантылат.