Бишкектин патрулдук кызматкерлери. Архивдик сүрөт

Жетишет! Бишкектик маичилердин жинине тийген 9 нерсе

5721
(жаңыланган 15:50 22.01.2017)
Иш учурунда Кайгуул милиция кызматкерлеринин жинин келтирип, капа кылган көрүнүштөр тууралуу Бишкек ШИИБдин Кайгуул милициясынын өкүлү айтып берди.

Sputnik Кыргызстан агенттигинин редакциясы ар кыл тармактагы кызматкерлердин нервин кашайткан учурлар тууралуу материалдарды даярдап келет. 

Бул жолу Кайгуул милициясынын өкүлү иш учурунда аны кандай жагдайлар капа кыларын айтып берди. Белгилүү себептерден улам анын аты-жөнү жарыяланган жок. 

Көпчүлүк учурда эреже бузгандар жогорку жактагы "крышаларына" телефон чалам деп коркутушат. "Сен кимди токтотконуңду билесиңби? Азыр мен тигиге чалсам сени эки саатта жок кылат" дешет. Алар үнүн өктөм чыгарып тың болушат. Саатына 40 чакырым гана жүрүүгө болот деген белгиден айрымдар саатына 120 чакырым ылдамдык менен өтүшөт. Себеби анын жогору жакта "байкелери" бар да. Анан калса машинасынын номери дагы "крутой";

"Ээ, байке, сиз менен сүйлөшөм деп жатат" деген айдоочу жол эрежесин бузбаган аппак адамдай түр көрсөтүп телефонун "мэ, сүйлөшүп койчу" деп сунат. Ал эми линиянын аркы жагындагы киши абалды жөнгө салууга аракет кылып, регистраторго тартылган видеону өчүрүп, токтоткон кишини дароо коё берүүнү айтат; 

Бир күнү жолугуп калышыбыз толук мүмкүн деген коркутуулар. Туура түшүнүңүздөр. Бул биздин жумушубуз. Сиз балаңызга эки койгон мугалимдерди урушпайсызда, туурабы? Эгер жол эрежесин бузсаңыздар, мыйзамдуу негизде айыбын төлөп коюуңуздар. Бир күнү чын эле көрүшүп калып менден өч ала турган болсоңуз ИИМдеги кесиптештерим артыңыздан түшөт. Ошондуктан жол эрежесин бузуп алсаңыз катаны моюнга алып, кийин кайталабаганга аракет кылганыңыз оң. 

Атайын жабдык жок болгондуктан айдоочунун ичимдик ичкендигин же ичпегендигин аныктоо үчүн анын оозун жыттоого туура келет. Тишиңерди жууп жүргүлөчү! Тазалыкты сакташ керек да!

"Кыргызча бүтүрөлү" — ушул сөз күйбөгөн жерди күл кылат. Сиз тартип сакчылары менен сүйлөшүп жатканыңызды эстен чыгарбаңыз… 

"Мыкты коргонуу — бул чабуул жасоо" бирок мындай ыкма Кайгуул милициясына келгенде иштебейт. Сизди жол эрежесин бузгандыгыңыз үчүн же рейд учурунда токтотушат. Ошондуктан айкырып чыгыштын кереги жок. Өзүңүздөр ушундай мамиле жасап алып, кандай жооп күтөсүздөр? Булар да адам. Эмоциясы, ачуусу бар.

Документтерин текшерүүгө бербей убакытты алгандар кыжырды келтирет. Мындай адамдар албетте күмөн жаратат. Сизди Интерпол издеп жатабы, же банкты тонодуңуз беле? Документтериңизди текшерүү — биздин милдетибиз да. 

Бардык автоинспекторлор телефонун бетке такаган айдоочулардан жадап бүтүштү. Урматтуу режиссерлор камераңарды себеби бар деле, жок деле алып чыга бересиңерби? Дегеним, документтерди текшерүү үчүн унааны токтотсоң эле айдоочусу Facebook баракчасына пост жазганга жетишип калган болот. Биз албетте талкуунун башкы каарманы болуп жатып калабыз. 

Депутаттын жардамчысы, прокурордун жардамчысы деген документтерин көрсөткөн адамдар нервиңди гана бузушат… Сиз эрежени буздуңуз демек жооп беришиңиз керек! Кыскасы биздегилер чоңдугуна салганды жактырышат. 

Кайгуул милиция башкармалыгынын кызматкерлери окурмандарды жол эрежесин сактоого чакырат.

5721
Белгилер:
нерв, айдоочу, милиция, стресс
Тема:
Кыжырды кайнаткандар (57)
Тема боюнча
Бишкекте таксилердин техникалык мүчүлүштүгүн текшерген рейд башталды
Бишкектик таксисттин кыжырын кайнаткан 6 нерсе