БИШКЕК, 26-янв. — Sputnik. Сокулуктун Дача айылына кулаган учак кырсыгынан каза болгон түркиялык төртүнчү учкучтун ким экендиги аныкталды, эми анын сөөгү түндөп Түркияга жөнөтүлөт. Бул туурасында Саламаттыкты сактоо министрлигинен кабарлашты.
26 Үчтүн айы 2017, 17:51
Учкуч болушу мүмкүн деп шектелип жаткан денеден алынган үлгүсү анын ким экендигин аныктоо үчүн 24-январда Түркияга анализ кылуу үчүн жиберилген. Бүгүн КРдин Тышкы иштер министрлигине (ТИМ) сөөктөн алынган ДНК-анализ лайнердин төртүнчү учкучуна таандык деген кабар келген.
ТИМден сөөк бүгүн түнү, 26-январда Түркияга жөнөтүлө тургандыгын кабарлашты.
Буга чейин каза болгон үч учкучтун сөөгү алардын мекени Түркияга жөнөтүлгөн.
Эске салсак, 16-январда таңкы саат 7.18де Сокулук районуна караштуу Дача айылына жүк ташуучу Boeing-747 учагы кулап түшүп, 39 кишинин өмүрүн алган. Анын ичинде экипаждын төрт мүчөсү да болгон.
